ՍԱՀՄԱՆԱԴՐՈՒԹՅԱՆ 37-ՐԴ ՀՈԴՎԱԾՈՒՄ ՎՏԱՆԳ ՉԿԱ

Արխիվ 12-16 18 Նոյեմբեր, 2015 11:28

ՍԱՀՄԱՆԱԴՐՈՒԹՅԱՆ 37-ՐԴ ՀՈԴՎԱԾՈՒՄ ՎՏԱՆԳ ՉԿԱ

Henaran.am-ը դիմել է ՍԻՄ նախագահ, ԱԺ պատգամավոր ՀԱՅԿ ԲԱԲՈՒԽԱՆՅԱՆԻՆ պարզելու եւ փարատելու այն քաղաքացիների մտահոգությունը, որ եթե Սահմանադրության 37-րդ հոդվածի 1-ին, 2-րդ եւ 3-րդ կետերը չփոփոխվեն, քրիստոնյա հանրույթի համար դժվար կլինի «կողմ» քվեարկել մայր օրենքին, ըստ որի` վտանգվում է հայկական ավանդական ընտանիքի մոդելը, այն հակասում է Աստծո խոսքին. երեխայի շահը առաջնային է համարվում, մինչդեռ քրիստոնեական արժեհամակարգը սահմանում է հակառակը` ծնողների դաստիարակության իրավունքը եւ պատասխանատվությունը երեխաների նկատմամբ: Սակայն պատգամավորի պնդմամբ` քրիստոնյաները մտահոգվելու պատճառ չունեն. «Այդ կետերը քննարկումների ընթացքում վերանայվել են եւ ենթարկվել փոփոխությունների»:

Նա տեղեկացրել է, որ Սահմանադրության առաջին տարբերակներում այդ կետը իրենց մտահոգել է, որի վերաբերյալ անձամբ Բաբուխանյանը Ազգային ժողովի ամբիոնից ներկայացրել է իր անհանգստությունը:
«Մեր կուսակցությունը նամակով դիմել է հանձնաժողովին, եւ մանրակրկիտ ուսումնասիրելուց հետո հոդվածը ենթարկվել է փոփոխության: Շատ լավ է, որ հետեւում են սահմանադրական բարեփոխումներին: Սահմանադրական այդ կետը փոփոխելու ցանկություն ենք ունեցել, քանի որ կուսակցությունը, մեր խմբակցությունը Ազգային ժողովում ազգային գաղափարախոսության, արժեհամակարգի, քրիստոնեական բարոյականության կողմնակից է»,- henaran.am-ի հետ զրույցում ասել է ՍԻՄ նախագահը:
Բաբուխանյանը համոզված է` մտահոգվելու կարիք չկա, սահմանադրական փոփոխված փաթեթը զերծ է վերոնշյալ վտանգներից. «Վստահեցնում եմ, որ մենք միակարծիք ենք եւ պետք է հետեւենք հայ ազգային արժեհամակարգին եւ քրիստոնեական պահանջներին: Մյուս կողմից` պետք է վստահեցնենք, որ այդ կետում որեւէ նման վտանգ չկա: Ավելին ասեմ` վերոնշյալ կետը սահմանում է երեխաների իրավունքները, եւ մանրամասնությունները պետք է տրվեն օրենքներով, որտեղ մենք էլ ավելի մանրամասն կբացենք այդ դրույթները, որոնք համապատասխանում են մեր ազգային արժեհամակարգին»:
Բաբուխանյանը հավելեց` Սահմանադրության ամբողջ կոնցեպցիայի հիմքում ընկած է ազգային պատկերացումների ձեւավորման, ընտանիքի, երեխաների եւ ծնողների փոխհարաբերությունների ամրապնդման գաղափարը: