«ՄԵՐ ԻՐԱՎԻՃԱԿՆ ԱՅՆՊԻՍԻՆ Է, ՈՐ ՉՊԵՏՔ Է ՁՎԻ ՄԵՋ ԻՆՉ-ՈՐ ԲԱՆ ՄԱՆ ԳԱԼ»

«ՄԵՐ ԻՐԱՎԻՃԱԿՆ ԱՅՆՊԻՍԻՆ Է, ՈՐ ՉՊԵՏՔ Է ՁՎԻ ՄԵՋ ԻՆՉ-ՈՐ ԲԱՆ ՄԱՆ ԳԱԼ»

Սահմանադրական բարեփոխումների հանրաքվեի «Այո»-ի եւ «Ոչ»-ի քարոզարշավը ակտիվորեն տեղափոխվեց մարզեր, եւ խումբ առ խումբ հանդիպումներ են տեղի ունենում տարբեր համայնքներում: Քարոզարշավի այսպիսի ընթացքի մասին "Իրավունքը" պարզեց ԱԺ նախագահ ԳԱԼՈՒՍՏ ՍԱՀԱԿՅԱՆԻ տեսակետը.

– Գործընթացը մի քիչ ծռում են հետեւյալ կերպ, որ պետք է ժողովուրդը կարողանա այդ գիտական փաստաթուղթը, իսկ աշխարհի բոլոր սահմանադրությունները գիտական են, առավոտից իրիկուն կարդա, ինչն իր հիմնական սկզբունքներն ունի: Իսկ այս այցերն ընդամենը ակտիվացնում է  ժողովրդին` ե՛ւ «ոչ» ասողներն են ակտիվանում, ե՛ւ «այո» ասողները: Եվ սա շատ անհրաժեշտ է. նախ` ակտիվանում է ժողովուրդը, հետո` ցանկանում է հասկանալ: Մի քանի օր հետո մեր բուկլետները լույս կտեսնեն, որը մի 15 րոպեի կարդալու նյութ է: Մարդիկ կկարդան եւ կհասկանան, թե բանն ինչումն է:

Ի դեպ, ԱԺ նախագահն անդրադարձավ նաեւ օրերս Ռուսաստանում Արցախի օրերին նվիրված մամուլի ասուլիսի ժամանակ ԼՂՀ նախագահ Բակո Սահակյանի այն հայտարարությանը, թե Ստեփանակերտի օդանավակայանը կարող է օգտագործվել Սիրիայում ՌԴ-ի ռազմական ուժերի կողմից իրականացվող հակաահաբեկչական գործողությունների համար.

– Մենք սկսել ենք բոլորի մտքերը չարչրկել, բայց մեր իրավիճակն այնպիսին է, որ չպետք է ձվի մեջ ինչ-որ բան ման գանք, այլ պետք է հասկանանք: Նախ` Բակո Սահակյանը նման հայտարարություն չի արել, այլ ընդամենը խոսել է Արցախի խնդիրների մասին: Իսկ ինչ վերաբերում է ահաբեկչությանը, դրա հիմնական թիրախը հենց Ղարաբաղն է, ուրեմն` չխոսե՞լ Ղարաբաղի մասին: Լրագրողները, որ մեկնաբանում են, թե իբրեւ նա ասել է ռուսական զորքերին պատրաստ է Ստեփանակերտի օդանավակայանը տրամադրել, ասեմ, որ օդանավակայանում այդպիսի ռազմական օդանավերի հարմարություններ էլ չկան, որ այդպես մտածես: Պարզապես, ռուսական միջավայր է եղել, այնտեղ էլ ընդդիմություն կա, եւ փորձել են ինչ-որ մեկնաբանություն քննարկելի դարձնել: Արդյունքում իրենց ադրբեջանամետության գաղափարախոսությունը տեղադրել են Բակո Սահակյանի մեկնաբանության մեջ, մերոնք էլ սկսել են այդ ուղղությամբ գնալ:

ՀՐԱՆՏ ՍԱՐԱՖՅԱՆ