ԱՃԵՄՅԱՆՑԻՆԵՐԸ ՊԱՏՐԱՍՏՎՈՒՄ ԵՆ ՀՈԲԵԼՅԱՆԻ

ԱՃԵՄՅԱՆՑԻՆԵՐԸ ՊԱՏՐԱՍՏՎՈՒՄ ԵՆ ՀՈԲԵԼՅԱՆԻ (+Տեսանյութ)

Թատերասեր Գյումրու միակ թատրոնում արդեն մի քանի ամիս է, ինչ աշխատանքային գործընթացը սովորականից ավելի բուռն է, տրամադրությունը՝ տոնական. աճեմյանցիները պատրաստվում են տոնել հայկական հնագույն թատրոններից մեկի դարուկեսյա հոբելյանը: Այդ մասին «Իրավունքը» տեղեկացավ թատրոնից:

Նոյեմբերի 29-ին աճեմյանական բեմում  հոբելյանական «Դատավարություն» է լինելու, վկաների դերում՝ հայ բեմի մեծանուն արտիստներն ու բոլոր նրանք, ովքեր իրենց մասնագիտական կենսագրությամբ ու ստեղծագործական աշխատանքով կապված են Գյումրու դրամատիկականին: Հոբելյանական երեկոյի ընթացքում Վ. Աճեմյանի անվան թատրոնի արտիստների հետ մեկ բեմում կլինի Գյումրու ժողովրդական գործիքների պետական նվագախումբը, Գյումրու պետական սիմֆոնիկ նվագախումը, «Բամբիռ» ֆոլկ- ռոք խումբն ու Վանաձորի «Հորովել»  երգի-պարի անսամբլը:

Նույն օրը, նախքան տոնական երեկոն, հյուրերը կկտրեն նաեւ Մհեր Մկրտչյանի անվան փոքր բեմի կարմիր ժապավենը. 70 հանդիսականի համար նախատեսված դահլիճ ունենալու գաղափարը տարիների պատմություն ունի, այն թղթից գործի է վերածվել 150-ամյակի հոբելյանական միջոցառումների շրջանակում:

«Թատրոնը՝ ժամանակի ափի մեջ». թատրոնի ճեմասրահում այս խորագրով լուսանկարների եւ ներկայացումների մանրակերտերի ցուցահանդեսն էլ կպատմի 150-ամյա թատրոնի դիտարժան ներկայացումների  մասին:

«Դար ու կես եւ 60 րոպե». այսպես է վերնագրված արդեն թատրոնի ողջ պատմությունն ամփոփող փաստավավերագրական ֆիլմը: Այն 150-ամյա թատրոնի անցած ուղու մասին է: Արխիվային նյութեր, մասնագիտական գրականություն, ժամանակի մամուլ, թատրոնի մարդկանց հուշեր ու պատառիկներ՝ անցած տարիների բեմական կյանքից. Ֆիլմի սցենարը կազմվել է այս հիմքերով, նկարահնումներն իրականացվել են հանրապետության տարբեր քաղաքներում, հարցազրույցներում թատերական գործիչներ են, ռեժիսորներ ու դերասաններ, ովքեր աշխատել ու ստեղծագործել են աճեմյանական թատրոնում:

Ֆիլմի հեղինակները փաստում են՝  թատրոնի դարուկեսը 60 րոպեում պատմող  ֆիլմն անհրաժեշտություն լինելուց բացի նաեւ նվեր է թատրոնին. մինչ այժմ, թատրոնի ողջ տարեգրությունն ամփոփող ֆիլմ չի ստեղծվել:

Ֆիլմի ստեղծմանը մասնակցել են ՀՀ ժողովրդական արտիստ, պրոֆեսոր Նիկոլայ Ծատուրյանը, ՀՀ ժողովրդական արտիստ, պետական մրցանակի դափնեկիր Ալբերտ Մկրտչյանը, ՀՀ ժողովրդական արտիստ Երվանդ Ղազանչյանը, Արթուր Սահակյանը, ՀԹԳՄ նախագահ Հակոբ Ղազանչյանը, Բաբկեն Չոբանյանն ու Գյումրու դրամատիկականի արտիստական ողջ կազմը:

Հոբելյանական միջոցառումների շրջանակում Գյումրու դրամատիկականում կազմվել եւ հրատարակության է հանձնվել նաեւ թատրոնի տարեգրությունն ամփոփող գրքույկ, որի էջերում հնագույն թատրոնն է՝ ստեղծման օրից մինչեւ այսօր:

Նշենք նաեւ, որ հոբելյանական միջոցառումներն անցկացվում են ՀՀ մշակույթի նախարարության աջակցությամբ:

Վ. ՄՈՒՐԱԴՅԱՆ