Սահմանադրական բարեփոխումները բացառում են մեկ կուսակցության իշխանության հաստատումը. Գալուստ Սահակյան

Սահմանադրական բարեփոխումները բացառում են մեկ կուսակցության իշխանության հաստատումը. Գալուստ Սահակյան

Սահմանադրական բարեփոխումները հնարավորություն են տալիս բացառել մեկ կուսակցության իշխանության հաստատումը: Այս մասին Ազգային ժողովում լրագրողների հետ զրույցում ասաց ՀՀ ԱԺ նախագահ Գալուստ Սահակյանը` անդրադառնալով Ռոբերտ Քոչարյանի վերջին հարցազրույցին, որում ՀՀ երկրորդ նախագահը պնդել էր, թե սահմանադրական բարեփոխումները միտված են երկրում մեկ կուսակցության իշխանության հաստատմանը: «Ես համաձայն չեմ երկրորդ նախագահի կարծիքի հետ նաև նրա համար, որ Հանրապետականը որքան որ եղել է քաղաքական մեծամասնություն, միշտ աջակցել է, որպեսզի այլ քաղաքական ուժերը ևս մասնակցեն պետական կառավարման ողջ գործընթացներին»,- «Արմենպրես»-ի հաղորդմամբ՝ նշեց Սահակյանը:

ԱԺ նախագահն ընդգծեց, որ սահմանադրական բարեփոխումներով առաջարկվում է փոխել պետական կառավարման մոդելը, որը կնպաստի կուսակցությունների կայացմանը, պետության կառավարման ողջ գործընթացին մասնակցելու հնարավորություն կտա: «Շատ եմ կարևորում նաև այն հանգամանքը, որ առաջարկվող փոփոխություններով կառավարման գործընթացին մասնակցելու հնարավորություն է ստանալու նաև ժողովուրդը»,- նշեց ԱԺ նախագահը:

Անդրադառնալով կարծիքներին, թե քարոզարշավի շրջանակներում անցկացվող «Այո և ոչ» ռեալիթի շոուն զավեշտի է վերածվել՝ Գալուստ Սահակյանն ընդգծեց, որ համաձայն չէ այդ տեսակետի հետ, քանի որ դա բավականին ակտիվացրել է հասարակությանը: «Սա կարևոր է այնքանով, որ գնում է ոչ թե այս կամ այն կուսակցության քարոզչությունը, այլ ժողովուրդը լսում է և «ոչ»-ի, և «այո»-ի կողմնակիցների փաստարկները»,- հավելեց Գալուստ Սահակյանը:

ԱԺ նախագահն անդրադարձավ ընդդիմադիրների կողմից բարձրաձայնվող այն խնդրին, թե իշխանությունները սահմանադրաիկան բարեփոխումների հանրաքվեին ընդառաջ սկսել են վարչական ռեսուրս կիրառել: Գալուստ Սահակյանը պարզաբանեց, որ դա ընդդիմադիրների գործելաոճն է՝ սկսած 90-ականներից: «Նրանք շատ տարիներ առաջվա սցենարի մասին են խոսում, երբ մարդկանց համոզում էին, թե քվեարկության վայրերում տեսանկարահանող սարքեր կան և նրանց համոզում էին քվեարկել այնպես, ինչպես իրենք կասեն: Ընդդիմությունը հոխորտալու փոխարեն լավ կանի վերահսկի քվեարկության ընթացքը, քանի որ դրա բոլոր հնարավորություններն ունի: Ամբողջ հանձնաժողովի կազմում լինելու է ընդամենը մեկ իշխանության ներկայացուցիչ, մնացածները ընդդիմության ներկայացուցիչներ են: Նրանք կարող են վստահված անձինք ունենալ, դիտորդներ են լինելու: Երբ այս ամենի մասին խոսում ես, նրանք էլի շարունակում են պնդել, թե մեկ է՝ խախտումներ են լինելու»,- ասաց Սահակյանը: Լրագրողներից մեկի դիտարիկմանը, թե ընդդիմության աչքը վախեցած է, ԱԺ նախագահը պատասխանեց. «Աչքները վախեցածների լեզուն մի քիչ կարճ է լինում»: