Զարմացած

Ժամանակ առ ժամանակ ընդդիմադիր պատգամավոր ԹԵՎԱՆ ՊՈՂՈՍՅԱՆԸ զարմանալի, կամ ժողովրդի խոսքով ասած` մազալու առաջարկություններ է անում: Եթե ժամանակին տարակուսանք է առաջացրել ամենայն լրջությամբ արված նրա առաջարկությունը, որ ՀՀ ժողովրդագրական խնդիրները պետք է լուծել` մեր երկրում չինացիներ եւ ֆիլիպինցիներ բնակեցնելով, ապա հիմա էլ խորհրդարանական լսումների ժամանակ նա մի շարք առաջարկություններ արեց բանակի հետ կապված: Առաջարկություններից մեկը բավականին ողջամիտ էր` զինպատրաստության շրջանակներում դպրոցականներին տանել ոչ միայն զորամասեր, այլ նաեւ նրանց ցույց տալ իրական մարտական դիրքերը, ապա երկրորդ առաջարկությունն ապշեցուցիչ է` Իսրայելի օրինակով նաեւ աղջիկներին զորակոչել բանակ: Զարմանալի է, ինչպես պարոն Պողոսյանը չի ընկալում հայերի եւ հրեաների մենթալիտետի, ավանդույթների, մոտեցումների տարբերությունը: Եվ եթե Իսրայելում աղջիկների զորակոչը բնական է, քանզի այդ ժողովուրդն ունի մայրիշխանության կայուն ավանդույթներ, ապա, գրողը տանի, ինչի՞ է նման նույն բանն առաջարկել հայերին: Ուստի զարմանալով հանդերձ, մնում է միայն հիշատակել մեր հայ տղամարդկանցից շատերի արձագանքը` ի՞նչ է, մենք մեռել ենք, որ աղջիկներին բանակ տանեն:

Եթե Զարուհի Փոստանջյանի մասին ՀՀԿ ներկայացուցիչները բավականին կոշտ են արտահայտվում, ու սկզբում Վահրամ Բաղդասարյանը , այնուհետ` Գալուստ Սահակյանը նրան խորհուրդ տվեցին ժամանակին խմել դեղերը, ապա Լյովիկ Զուրաբյանի նկատմամբ վերաբերմունքն ավելի մեղմ է: Այսպես, նոր սահմանադրությունը տապալված տեսնելու նրա երազանքը ՀՀԿ խմբակցության ղեկավարը այսպես մեկնաբանեց. «Դա այդ գործչի վաղեմի երազանքն է: Նրա մոտ նոր մանկություն է արթնացել, եւ դա նրա մանկական երազանքն է: Իհարկե, նրա մանկությունը մի փոքր երկար է ձգվում, բայց ոչինչ, մենք դա կհանդուրժենք»: Սակայն, ի տարբերություն կուսակիցների, զարմանալիորեն բավականին դաժան գտնվեց ԱՐՄԵՆ ԱՇՈՏՅԱՆԸ: Խոսելով ընդդիմության մշտական մեղադրանքից, թե ՀՀԿ ուզում է վերարտադրվել, նա ասաց. «Ասում են` իշխանությունները ուզում են վերարտադրվել: Ինձ ցույց կտաք մի կուսակցություն, որ չի ուզում գալ իշխանության: Էլ ինչ քաղաքական ուժ, որի գոնե տեսական նպատակը ընտրությունների միջոցով իշխանության գալը չէ: Եթե մարդիկ միավորվում են ինչ-որ կազմակերպության մեջ, ինչ-որ գաղափարների շուրջ ու ինչ-որ ծրագիր ունեն ու չեն ուզում լինել իշխանություն, ապա այդ կառույցները պետք է լինեն ՀԿ-ներ, արհեստակցական միություններ, քաղաքացիական նախաձեռնություններ, եւ երբեք` քաղաքական կուսակցություններ: Իշխանությունը կուզենա վերարտադրվել նաեւ գործող Սահմանադրությամբ: Արդյոք դեմոկրատները ԱՄՆ-ում, սոցիալիստները Ֆրանսիայում եւ քրիստոնեադեմոկրատները Գերմանիայում չեն պատրաստվում նորից մասնակցել ու հաղթել գալիք ընտրություններին: Արդյոք, նույն Լեւոն Տեր-Պետրոսյանը 2008-ին չէր ուզում վերարտադրվել` որպես ՀՀ նախագահ: Արդյոք այլ գործիչներ, եթե շանս ունենային, ուղիղ չէին բարձրաձայնի քաղաքականություն վերադառնալու մասին»:
Իսկ նախկին վարչապետ ՀՐԱՆՏ ԲԱԳՐԱՏՅԱՆԻ սիրտը փոփոխություններ է ուզում. «Հայաստանում կառավարման որակը վատ է վեց տարի շարունակ: Հիմա էլ չեն ընդունում, որ պետք է անցնեն տնտեսական այլ քաղաքականության: Պետք է փոխվեն մարդիկ, պետք է փոխվեն մոտեցումները: Պետք է փոխվի ամբողջ տնտեսական քաղաքականությունը»: Շատ բարի, իշխանություններն էլ փոփոխություն են ուզում, ու այդ պատճառով առաջարկում են սահմանադրական բարեփոխում` այսինքն, փոփոխությունները հիմքից սկսել: Զարմանալի է, փոփոխությունների կողմնակից լինելով` ինչո՞ւ է Հրանտ Բագրատյանը «ոչ»-ի, այլ ոչ թե «այո»-ի ճամբարում: Թե՞ փոփոխություններ ասելով` նա հասկանում է իր վարչապետության ժամանակների վերադարձը, երբ իր իսկ ձեռքով պաշտոնական շրջանառության մեջ մտավ «որձ կովի» գաղափարը:  
Ինչպես հայտնի է, Թուրքիան Ռուսաստանից բացատրություններ է պահանջել ահաբեկիչների ռմբակոծության համար, եւ Անկարայում ռուս դեսպանին բացատրություն տալու են կանչել: Սակայն բավականին զարմանալի է, թե հատկապես ինչն է այդքան կատաղեցրել թուրքին: Ռուսները ռմբակոծել են ժամանակին Քեսաբը դատարկած Սիրիայի թուրքմեն գրոհայինների դիրքերը, իսկ սիրիական բանակի հետ մարտում շանսատակ է եղել այդ գրոհայինների հրամանատարը: Եվ ի՞նչ եք կարծում, ի՞նչ անուն էր կրում այժմ ոչ եւս եղած այդ հրոսակը: Ոչ ավել, ոչ պակաս ԱԲԴՈՒԼ ՀԱՄԻԴԻ անվան ջոկատ: Դե հիմա պարզ է, թե ինչու այդքան մղկտաց Էրդողանի սիրտը, որ նույնիսկ սկսեց Մոսկվայի դեմ վայրահաչել: Ախր, հարվածել են այնպիսի հոգեհարազատ մի բանի...

Զարմացած է
ՀՈՎՀԱՆՆԵՍ ԳԱԼԱՋՅԱՆԸ