«ԱՅՍ ՊԱՐԱԳԱՅՈՒՄ ՀԱՅԱՍՏԱՆԸ ՀԱՐԱԲԵՐԱԿԱՆ ԱՊԱՀՈՎ ԵՐԿԻՐ Է»

«ԱՅՍ ՊԱՐԱԳԱՅՈՒՄ ՀԱՅԱՍՏԱՆԸ ՀԱՐԱԲԵՐԱԿԱՆ ԱՊԱՀՈՎ ԵՐԿԻՐ Է»

Երեկ ՀՀ կառավարության նիստից հետո արտաքին գործերի նախարարի տեղակալ ՇԱՎԱՐՇ ՔՈՉԱՐՅԱՆԸ լրագրողներիս հետ զրույցում անդրադարձավ վերջին օրերին արտաքին քաղաքական իրադարձություններին եւ այդ ֆոնին` հայաստանյան զարգացումներին: «Իրավունքը» նախեւառաջ պարոն փոխնախարարից հետաքրքրվեց, թե ինչպիսի՞ն է ՀՀ ԱԳՆ-ի դիրքորոշումն այն հարցի վերաբերյալ, որ ռուս-թուրքական լարվածության համատեքստում ՌԴ Պետդուման օրինագիծ է մշակել Հայոց ցեղասպանության ժխտումը քրեականացնելու համար.

–Սա Ռուսաստանի Պետդումայի գործն է: Մենք ողջունում ենք, որ Ռուսաստանի Դաշնությունը ճանաչել է Հայոց ցեղասպանությունը եւ միշտ կողմ ենք եղել, որ քրեականացում լինի: Այսօր դեռեւս 4 պետություն է ընդունել Հայոց ցեղասպանության ժխտումը քրեականացնող օրենք: Այնպես որ, տեսնենք, թե ինչպիսին կլինեն զարգացումները:
– Ըստ Ձեզ, ռուս-թուրքական հարաբերությունների սրացումը ինչպիսի՞ անդրադարձ կունենա Հայաստանի վրա:
– Այս խնդիրը մի կողմից վերաբերում է մեր դաշնակցին, մյուս կողմից` անմիջական հարեւանին: Դրա համար, բնական է, որ մենք պետք է ուշիուշով հետեւենք բոլոր զարգացումներին:
– Աշխարհաքաղաքական այս իրավիճակում որքանո՞վ եք հնարավոր համարում ՀՀ եւ Ադրբեջանի նախագահների հանդիպումն առաջիկայում, եւ ի՞նչ կարելի է ակնկալել դրանից:
– Բազմիցս հայտարարել եմ եւ նորից եմ կրկնում` ակնկալիքներ կարող են լինել մի դեպքում` եթե ադրբեջանական կողմը վերջ դնի իր այդ ամեն ինչ կամ ոչինչ մոտեցմանը: Եվ երկրորդ` չփորձի ուժի դիրքերից կորզել իր համար ավելի նպաստավոր լուծում, որովհետեւ այդ անհնարին է: Բայց քանի դեռ Ադրբեջանում չի երեւում այլ մոտեցում, ես լուրջ ակնկալիքներ չունեմ: Մյուս կողմից` սա չի նշանակում, որ նմանատիպ հանդիպումները պետք չեն, նույնիսկ պատերազմող երկրների դեպքում լինում են հանդիպումներ, բանակցություններ:
– Անդրադառնանք նաեւ օրերս Նորք-Մարաշում հայտնաբերված հանցավոր խմբին. տեղի ունեցածը հանրության լայն շրջանակներում որակվում էր որպես  ահաբեկչության նախապատրաստում, ու փորձում էին այն ասոցացնել «Իսլամական պետություն» ահաբեկչական խմբավորման հետ:
– Միջազգային ահաբեկչությունը լրիվ ուրիշ բան է եւ, ցավոք սրտի, մենք դրա ականատեսն ենք: Ահաբեկչությունն այն է, ինչ տեղի ունեցավ Փարիզում, ռուսական ինքնաթիռի հետ: Հետեւաբար պետք չէ դրանք նույնացնել:
– Այնուամենայնիվ, ահաբեկչության վտանգը որքանո՞վ է այսօր սպառնում Հայաստանին:
– Ահաբեկչության վտանգն ամբողջ աշխարհին է սպառնում: Մենք պետք է ճիշտ տարբերակենք, որովհետեւ կան ահաբեկչության տարբեր ձեւեր: Ուստի` պետք է հստակ հասկանանք` ինչի մասին ենք խոսում: Եթե խոսքը վերաբերում է միջազգային ահաբեկչությանը, ապա ցանկացած պետություն միշտ պետք է զգուշավոր լինի: Համենայնդեպս, այս պարագայում Հայաստանը հարաբերական ապահով երկիր է:

ՀՐԱՆՏ ՍԱՐԱՖՅԱՆ