ՇԱՆԹ ՀԱՐՈՒԹՅՈՒՆՅԱՆԻ ԳՈՐԾՈՎ ԴԱՏԱՎՈՐԻ ԵՎՐՈՆԵՐՆ ԱՎԵԼԱՑԵԼ ԵՆ

ՇԱՆԹ ՀԱՐՈՒԹՅՈՒՆՅԱՆԻ ԳՈՐԾՈՎ ԴԱՏԱՎՈՐԻ ԵՎՐՈՆԵՐՆ ԱՎԵԼԱՑԵԼ ԵՆ

«Իրավունք»-ը բարձրաստիճան անձանց էթիկայի հանձնաժողովից տեղեկանում է, որ   նախորդ տարի Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանի դրամով եւ արտարժույթով` եվրոյով գումարներն ավելացել են: Նախորդ տարվա  սկզբում դատավորը հայտարարագրել է 4,000,000, տարվա վերջում `7.000.000 դրամ: Անցյալ տարվա սկզբում  հայտարարագրված 3,950.00 եվրոն 2014 թ-ի վերջում ավելացել է մոտ հազար եվրոյով:  Դոլարով  ամրագրված  եկամուտները տարվա սկզբում ու վերջում նույնն են մնացել:

Մնացական Մարտիրոսյանը անշարժ ու շարժական գույք, արժեթղթեր չի հայտարարագրել: 2012 թ-ի համեմատ`դատավորի եկամուտները 2014 թ-ին մի փոքր ավելացել են:

Դատավորի կնոջ` Լուսիկ Մարտիրոսյանի եկամուտները բավական համեստ են` 4,000,000 դրամ եւ աշխատանքի վարձատրությունից ստացվող  հասույթ` 607,172 դրամ:

Դատավորի  դուստրերից մեկի` Մարիամ Մարտիրոսյանի հայտարարագրից էլ պարզ  է դառնում, որ  դատավորի դուստը եկամուտներ ստանում է  ոչ միայն աշխատավարձից, այլեւ վարկերից:

Ո՞վ է  Մնացական Մարտիրոսյանը: Դատավոր, ով բազմիցս  է հայտնվել լրատվամիջոցների ուշադրության կենտրոնում, քանի որ քննել է հիմնականում քաղաքական բնույթի աղմկահարույց  գործեր` «7»-ի գործ, Շանթ Հարությունյանի ու նրա ընկերների, «Հայկական ժամանակ» թերթի  գլխավոր խմբագիր, ՀԱԿ պատգամավոր Նիկոլ Փաշինյանի  դատավարություն:

«Իրավունք»-ը եւս առիթ  է ունեցել անդրադառնալ Մնացական Մարտիրոսյանի կողմից քննված գործերից մեկին: Կենտրոն եւ Նորք-Մարաշ վարչական շրջանների ընդհանուր իրավասության դատարանում 2012-ին  կայացվեց «Ռեգնում» լրատվական գործակալության երեւանյան գրասենյակի պատասխանատու Ռուբեն Գրձելյանի եւ Կոտայքի մարզի դատախազ Մեսրոպ Մանրիկյանի որդու` Ալբերտ Մանրիկյանի դեմ հարուցված քրեական գործով դատավճիռը: Ալբերտ Մանրիկյանը մեղավոր ճանաչվեց Քրօրի 117 հոդվածով (դիտավորությամբ թեթեւ մարմնական վնասվածք հասցնելը) եւ դատապարտվեց 50 հազար դրամի չափով տուգանքի:

Ի դեպ, այս տարի օգոստոսին ՄԻՊ  Կարեն Անդրեասյանը դիմել էր դատավորների ընդհանուր ժողովի էթիկայի եւ կարգապահական հարցերի հանձնաժողովին Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանի նկատմամբ վարույթ հարուցելու վերաբերյալ: Սակայն ՄԻՊ-ի դիմումը մերժվել է:

ՍՈՆԱ ԴԱՎԹՅԱՆ