«ԵՎՐԱՏԵՍԻԼԻ» ԱԿՆԿԱԼԻՔՆԵՐԻ ՄԱՍԻՆ ՎԱՆԳԱՆ ԷԼ ԿԴԺՎԱՐԱՆԱՐ ԳՈՒՇԱԿԵԼ

«ԵՎՐԱՏԵՍԻԼԻ» ԱԿՆԿԱԼԻՔՆԵՐԻ ՄԱՍԻՆ

ՎԱՆԳԱՆ ԷԼ ԿԴԺՎԱՐԱՆԱՐ ԳՈՒՇԱԿԵԼ

Մինչ ողջ հայությունը երկընտրանքի մեջ է` «այո» թե «ոչ» ասել Սահմանադրական բարեփոխումների հանրաքվեին, այդ նույն հայությունը օրեր առաջ միահամուռ «ԱՅՈ» ասաց «Մանկական Եվրատեսիլում» Մալթան ներկայացնող փոքրիկին, ինչը եւ ճակատագրական եղավ ե՛ւ մեր մասնակցի, ե՛ւ մալթացի փոքրիկի համար: Հայաստանի նվիրաբերած 12 միավորը մալթացի փոքրիկին բերեց հաղթանակ, իսկ մեզ` երկրորդ հորիզոնական: Ինչեւէ, հայաստանյան ժյուրիի կազմում ընդգրկված երգչուհի ԷՄՄԱ ԱՍԱՏՐՅԱՆԸ, ում սաներն են վերջին տարիներին ներկայացնում Հայաստանը «Մանկական Եվրատեսիլում», «Իրավունքի» հետ զրույցում հորդորեց համաքաղաքացիներին չմեղադրել հայաստանյան ժյուրիին, քանի որ հենց այդ հանրությունն է անաչառորեն բարձր միավորներ նվիրել Մալթայի ներկայացուցչին:

«ԵՐԵԽԱՆԵՐԻ ՀԵՏ ԱՆՑԵԼ ԵՄ ԲԱՐԴՈՒԹՅՈՒՆՆԵՐԻ ՄԻՋՈՎ»

- Գրեթե ամեն տարի Ձեր սաներն են մեկնում «Մանկական Եվրատեսիլ», այդ առումով, որպես այս մրցույթի «գիտակ», ինչպե՞ս կգնահատեք մեր այս տարվա մասնակցի` Միկայի ելույթը:
- Չէ, գիտակ չեմ միշտ նորանոր անակնկալներով լի մրցույթին, բայց որ թիմն անչափ լավ էր աշխատում եւ Միկայի «մեջքին» կանգնած էր, դա ակնհայտ է: Շատ բաներ էլ ավելի փորձառու եւ թիմային են դարձրել: Քանզի երեխաների հետ անցել եմ բարդությունների միջով, կարող եմ ասել` Դալիթան առաջինն էր, շատ տանջվեցինք ու շատ բաներ ինքնուրույն ենք արել, չնայած որ Հայաստանում էր ընթանում մրցույթը: Նույնը կարող եմ ասել, որ Մոնիկայի ժամանակ էր: Բեթթիիս ժամանակ թիմն արդեն ձեւավորվեց, ու ամեն ինչ ավելի հեշտ ընթացավ: Փառք Աստծո, Միկայի ժամանակ ամեն ինչ ավելի թիմային էր ու միասնական, կասեմ, որ Միկան շատ պատշաճ եւ պրոֆեսիոնալ ներկայացավ:
- Այս տարի, կարծես թե, հաղթանակին «մազ» էր մնում, բայց ինչպես հասարակության շրջանում է լայն քննարկվում, մեղավորը հայաստանյան ժյուրին էր` իր սխալ հաշվարկով: Այսինքն` ըստ հասարակության, եթե մենք մեր մրցակցին 12 միավոր չշռայլեինք, ապա հաղթանակը մերը կլիներ: Որպես ժյուրիի կազմում ընդգրկված` ի՞նչ կասեք այս մասին:
- Նախ ասեմ, որ առաջին մրցանակակիրն էլ արժանի բալիկ էր: Հետո ծիծաղելի է, որ հասարակությունը քննարկում է ժյուրիին, որովհետեւ հենց այդ նույն հասարակությունն էր ամենաշատ ձայները շատ արդար կերպով նվիրել Մալթայի ներկայացուցչին մոռանալով, որ մեր հայ մասնակցի մրցակիցն է:

«ԼԱՎ ԵՐԳԻՉ ԼԻՆԵԼԸ «ԵՎՐԱՏԵՍԻԼՈՒՄ» ՆՎԱԶԱԳՈՒՅՆ ԴԵՐ Է ԽԱՂՈՒՄ»

-Մշտապես ասվել ու ասվում է այս մրցույթի քաղաքականացված լինելու մասին, արդյո՞ք ժամանակը չէ, որ մենք էլ սկսենք դիվանագիտորեն մոտենալ դրան:
- Կարծում եմ` քաղաքականությունն ու ոչ միայն, մեծ ծախսերն ու հսկա փիարը, որոնք արվում են նախօրոք, ինչը եւս կապված է բավականին մեծ եւ լուրջ գումարների հետ, ավելի մեծ դեր են խաղում մեծերի «Եվրատեսիլում»: Ու հաջող երգը, մաքուր ու լավ կատարումը, կամ էլ` լավ երգիչ լինելը «Եվրատեսիլում» նվազագույն դեր է խաղում: Փորձն էլ դա արդեն ցույց է տվել: Իսկ ինչ վերաբերում է քաղաքականության մեջ խառնվելուն` երաժշտին հարիր չէ:
- Ձեզ համար, բացի Միկայի ելույթից, ո՞ւմ կատարումն էր վառ ու հաղթող:
- Հենց առաջին մրցանակակիրն էլ ասես ծնվել էր, որ բերանը բացեր ու մարգարիտներ շարեր նոտաների տեսքով: Նա այն սեւամորթների շարքում էր, որ երբ երգում է, չես էլ հիշում` սիրունիկ է, թե` ոչ, հագուստը գեղեցիկ է, սազում է, թե` ոչ: Ի դեպ, հավանեցի նաեւ 3-րդ համարի տակ հանդես եկող աղջնակին:

«ԻՎԵՏԱՆ ԱՅԴ ՄՐՑՈՒՅԹԻՆ ՏԻՊԻԿ ԱՐՏԻՍՏ Է»

-Ի՞նչ կասեք, այս տարի մեծերի «Եվրատեսիլում» Հայաստանը ներկայացնող Իվետա Մուկուչյանի մասին, ի՞նչ եք կարծում` հաղթանակի ակնկալիքներ ունենա՞նք:
- Կարծում եմ` շատ ճիշտ ընտրություն է, Իվետան այդ մրցույթին տիպիկ արտիստ է: Իվետան «Եվրատեսիլի» բեմում իրեն կզգա` ինչպես ձուկը ջրում: իսկ «Եվրատեսիլի» ակնկալիքների մասին Վանգան էլ կդժվարանար գուշակել:

«ՀՈՒՍԱՄ` 2016-ԻՆ ՉԵՄ ԾՈՒԼԱՆԱ»

-Այս ամենից դուրս, ի՞նչ է կատարվում Ձեր ստեղծագործական կյանքում, թե՞ Ձեզ լրիվ նվիրել եք դասախոսությանը:
- Կարծես թե` վերջին տարբերակն է (ծիծաղում է- Լ.Ե.): Բացի Ալ. Սպենդիարյանի անվան երաժշտական դպրոցից, արդեն նաեւ Կոմիտասի անվան կոնսերվատորիայում եմ դասավանդում: Դրա հետ միասին, նաեւ Ջազ նվագախմբի հետ, ճիշտ է ոչ հաճախ, բայց ելույթներ ունենում եմ: Ունեմ նոր երգեր, հատկապես անհամբեր սպասում եմ մի երգի, որի հիման վրա  նպատակ ունեմ տեսահոլովակ նկարահանել` էլի բոլոր հավասարներից դուրս: Սպասում եմ Մարտին Միրզոյանի լուրին, թե երբ գործիքավորումը պատրաստ կլինի: Ասեմ, որ երգին սպասում եմ դեռ 2014 թվականի օգոստոս ամսից: Ժամանակ առ ժամանակ ինձ «խեղդում» է ինչ-որ ծրագրով փոքրիկ բենդի հետ հանդես գալու ցանկությունը: Հուսամ` չեմ ծուլանա ու եկող տարվա ընթացքում ջազային ծրագրով կներկայանամ, գուցե եւ որոշ հեղինակային երգերով նույնպես, որոնց հանդիսատեսը ծանոթ է, բայց արդեն ներկայացնեմ կենդանի նվագակցությամբ: Ինչեւէ, առաջ Աստված:

Զրուցեց ԼԻԼԻԹ ԵՂԻԱԶԱՐՅԱՆԸ