ԱՐՏԱՍԱՀՄԱՆԻՑ ԴԻՏՈՐԴՆԵՐՆ ԱՌԱՎՈՏՅԱՆ ԵՂԵԼ ԵՆ ԸՆՏՐԱՏԵՂԱՄԱՍՈՒՄ, ԲԱՅՑ…

ԱՐՏԱՍԱՀՄԱՆԻՑ ԴԻՏՈՐԴՆԵՐՆ ԱՌԱՎՈՏՅԱՆ ԵՂԵԼ ԵՆ ԸՆՏՐԱՏԵՂԱՄԱՍՈՒՄ, ԲԱՅՑ…

Սահմանադրական  հանրաքվեն  շարունակվում է:  Հայաստանում ընթացող սահմանադրական փոփոխությունների հանրաքվեին, ժամը 14.00-ի դրությամբ, մասնակցել է ընտրողների ընդհանուր թվի 24.26 տոկոսը: Այս մասին հայտարարել է ԿԸՀ անդամ Սեյրան Շահսուվարյանը:

«Իրավունք»-ի թղթակիցը այսօր ժամը 11:05-ին եղել է 13/32 ընտրատեղամասում, որը գտնվում է   Պարույր Սեւակի անվան 123 դպրոցում:

Տեղեկացնենք, որ նույն դպրոցում մի քանի մետր հեռավորության վրա  տեղակայված էր մեկ այլ ընտրատեղամաս`  13/33-ը:

«Իրավունք»-ի հետ զրույցում հանձնաժողովի նախագահ Համբարձում Զավոյանը  ընտրատեղամաս է եկել 06: 45-ին:  Ընտրատեղամասը բացվել է  08:00-ին, առաջին ընտրողը ընտրատեղամաս է եկել 08:02-ին:   Քվեարկության մասնակիցների թիվը 1960  է: Մինչ ժամը 11:00-ը ընտրությանը մասնակցել է 200 ընտրող:  Հանձնաժողովի նախագահը չհերքեց, որ  քաղաքացիները ակտիվ մասնակցում են ընտրական գործընթացին: Ավելին`  մենք նկատեցինք, որ մի քանի րոպե  կուտակում առաջացավ ընտրատեղամասում, որը ամեն կերպ փորձում էին կարգավորել հանձնաժողովի նախագահն ու քարտուղարը:

Հանձնաժողովի նախագահից  հետաքրքրվեցինք`  դրսից դիտորդներ եղե՞լ են, պրն Զավոյանը դրական պատասխանեց. «Այո,  կային, բայց խնդրեցին դուրս եկան, նորից գալու են»:

Մեր հարցին` որ երկրի ներկայացուցիչներն են եղել,  նախագահն ասաց. «Արտասահմանից էին, բայց մեզ մոտ չենք նշել, ուղղակի իրենց վկայականով գրանցվել են»:

Հետաքրքրվեցինք նաեւ` այլ կուսակցություններից վստահված անձինք կա՞ն: «Միայն ՕԵԿ-ից»,- պատասխանեց  պրն Զավոյանը:

Ի դեպ,   13/33 հանձնաժողովի  քարտուղարը  եւս, այսպես ասած, ձեռի հետ օգնում էր  13/32 ընտրատեղամասին`  ընտրողների կուտակումները վերացնելու համար:

ՍՈՆԱ ԴԱՎԹՅԱՆ