Եթե դեսպանությունները հայտարարում են՝ դա Հռոմի Պապը չէ, որպեսզի սրբության տեղ դնենք. Գալուստ Սահակյան

Եթե դեսպանությունները հայտարարում են՝ դա Հռոմի Պապը չէ, որպեսզի սրբության տեղ դնենք. Գալուստ Սահակյան

«Քաղաքական և նաև աշխարհաքաղաքական վիճակի տրամաբանությանը տեղյակ եք, յուրաքանչյուր հայտարարություն մենք զգում ենք, թե որտեղից է գալիս և ինչի համար է: Այսինքն՝ եթե դեսպանությունները հայտարարում են, դա Հռոմի Պապը չէ, որպեսզի սրբության տեղ դնենք»,- ասել է Գալուստ Սահակյանը ԱՄՆ դեսպանատան սահմանադրական հանրաքվեի շուրջ արված հայտարարության վերաբերյալ:
Լրագրողների հարցին` արդյո՞ք ՀՀ իշխանությունները մտավախություն չունեն, որ կարող է ընտրախախտների «սև ցուցակ» կազմվել, վիզաների, դրամաշնորհների հատկացումը մերժվել, Գալուստ Սահակյանը պատասխանեց. «Ես չեմ կարծում, որ Հայաստանին որևէ մեկն այնքան գրանտեր է տալիս և դա այն արժևորումն է, որ Հայաստանում շատ մեծ օգուտներ է տալիս, եթե չտան, շատ մեծ վնասներ կլինի: Այդ գրանտերը տրվելու են, դրանք ոչ թե տալիս են մեկ ուղղվածության օգնության, դրանց մեջ նաև քաղաքական ընդերք կա, իսկ քաղաքական ընդերքը երբեք չի պակասում»:

Ինչ վերաբերում է «սև ցուցակներին» ԱԺ նախագահը նշեց. «Մեր ցուցակներն այն ժամանակ Ամերիկան արդեն կազմել էր, այսօր չի ուզում հետ նահանջի: Սև ցուցակները պիտի այն ժամանակվա մեծ աշխարհի բոլոր պետությունների համար կազմեն, որոնք իրենց աչքերը հառած տեսնում էին, թե մի ողջ ժողովրդի ինչպես են ոչնչացնում: Այնպես որ մեր փաստարկներն ավելի բարձր են: Պարզապես մենք մեր քաղաքական տրամաբանությամբ, պետության գաղափարախոսությամբ թշնամիներ չենք որոնում, փորձում ենք բարեկամական կապեր ստեղծել բոլոր երկրների հետ: Բայց դա չի նշանակում, որ մենք անզեն զինյալներ ենք, մենք էլ ենք տիրապետում մեր գործիքներին, մեր մոտեցումներին»:

Իսկ ՀԱԿ-ի  Սահմանադրական դատարան դիմելու նախաձեռնության առնչությամբ Գ Սահակյանը չի կարծում , որ նրանց  հաջողվի հավաքել 27 ստորագրություն: Նա ընգծեց, որ Սահմանադրության նախագիծն ԱԺ-ում 104 կողմ ձայն է ունեցել, 12 դեմ, 3 ձեռնպահ:

«ՀԱԿ-ի կողմից սա արվում է, որպեսզի գոնե խորհրդարանում կամ ընդհանրապես հասարակության մեջ որպես ցուցիչ լինի, որ ամենաարմատական ընդդիմությունը ՀԱԿ-ն է»,- ասաց ԱԺ նախագահը: