«ԻՆՉՔԱՆ ԷԼ ԱՅԴ ՈՒԺԵՐԻՆ ԱՋԱԿՑԵՆ ԶԱՆԱԶԱՆ ԱՐՏԱՍԱՀՄԱՆՅԱՆ ԱԳԵՆՏՆԵՐ»

«ԻՆՉՔԱՆ ԷԼ ԱՅԴ ՈՒԺԵՐԻՆ ԱՋԱԿՑԵՆ ԶԱՆԱԶԱՆ ԱՐՏԱՍԱՀՄԱՆՅԱՆ ԱԳԵՆՏՆԵՐ»

ԱԺ արտահերթ նիստի ժամանակ ՀՀԿ խմբակցության պատգամավոր Արտաշես Գեղամյանը անդրադարձ կատարեց արտաքին ուժերի պատվեր կատարող «նարնջագույն» ընդդիմադիրներին, որոնք այդ նպատակով վերջերս հաճախ օգտագործում են ԱԺ ամբիոնը: Ակնարկն ակնհայտորեն վերաբերում էր նախեւառաջ Զարուհի Փոստանջյանին: Պատգամավորը բավականին մանրամասն թվարկեց օտար ուժերի կողմից կիրառվող հակապետական հեղաշրջման տեխնոլոգիաները, այդ թվում` տեղեկատվական-քարոզչական դաշտում երկրի ղեկավարի անձի «նպատակային թիրախավորումը»:

Անդրադառնալով արտաքին-քաղաքական մարտահրավերների շահարկմանը` Արտաշես Գեղամյանը նաեւ չզլացավ հիշատակել ՀՀ տարբեր միջազգային պատվիրակությունների եւ ԱԳՆ-ի գործադրած ջանքերի շնորհիվ ձեռք բերած կոնկրետ հաջողությունները, այդ թվում` ռուսների կտրուկ պատասխանը Դավութօղլուի` Բաքվում արված սադրիչ հակահայկական հայտարարություններին, եւ եզրակացրեց. «Բավական է զենք լինել թշնամու ձեռքին, բավական է իշխանության դեմ խոսել: Չի կարելի չարձանագրել, որ հատկապես արտաքին քաղաքականության առումով ինչ հաջողություններ ենք ունենում: Ես ձոներ չեմ անում…»:
«Ես չեմ հասկանում` ինչպես կարելի է իշխանությունների այս հսկայական աշխատանքը չտեսնել. սա ոչ այլ ինչ է, քան թշնամություն: Սակայն թշնամությունը չի անցնի, ինչքան էլ այդ ուժերին աջակցեն զանազան արտասահմանյան ագենտներ»,- մատնանշեց Արտաշես Գեղամյանը: