«Եթե ոչ Ձմեռ պապը, ապա մենք մեր ուժերով այդ երազանքը կիրագործենք»

«ԵԹԵ ՈՉ ՁՄԵՌ ՊԱՊԸ, ԱՊԱ ՄԵՆՔ ՄԵՐ ՈՒԺԵՐՈՎ ԱՅԴ

ԵՐԱԶԱՆՔԸ ԿԻՐԱԳՈՐԾԵՆՔ»

Թեպետ դրսում սկսվել է ամանորյա եռուզեռը, ընդամենը երեկ  օրենսդիրներն ավարտեցին արտահերթ նստաշրջանի աշխատանքը: Այդ ընթացքում «Իրավունքը» ուշիուշով հետեւել է, թե որ պատգամավորների աշխատասենյակներն են տոնական տեսք ստացել: Դրանցից առանձնացրել ենք ԱԺ ՀՀԿ խմբակցության պատգամավոր ԼԵՎՈՆ ՄԱՐՏԻՐՈՍՅԱՆԻ աշխատասենյակը, որտեղ հենց նախասրահում մեզ ժպտաց մի մեծ տոնածառ: Չնայած` պարոն Մարտիրոսյանն ասաց, որ այդ գործում իր ներդրումը չկա, այլ աշխատակիցների «ձեռքի գործն է», բայց, այնուամենայնիվ, մեր զրույցը նրա հետ ծավալվեց տոնական հարցերի շուրջ:

– Որքան էլ առ այսօր օրենսդրական գործունեությամբ եք զբաղված, հետաքրքիր է, թե սկսվե՞լ են Ձեր ընտանիքում ամանորյա նախապատրաստությունները, եւ ինչքանով եք Դուք այդ ամենի մասնակիցը:

– Բացարձակապես որեւէ մասնակցություն չեմ ունեցել, որովհետեւ նաեւ ընտանիքում դեռ որեւէ գործողություն այդ ուղղությամբ չենք կատարել: Բայց մեր ընտանիքում լինելու է ավանդական սեղան` ավանդական կերակրատեսակներով, տոնածառ, երեխաներին նվերներ եւ ընկերներին, ազգականներին ու բարեկամներին այցելություններ:

– Մինչեւ քանի՞ տարեկանն եք հավատացել Ձմեռ պապին:

– Չեմ հիշում, երեւի մինչեւ 7-8 տարեկանը` ինչպես որ յուրաքանչյուր մարդ: Բայց հիմա մեծ որդիս, որը 9 տարեկան է, արդեն վերլուծություն է կատարում, որ միգուցեեւ չկա Ձմեռ պապ: Իսկ փոքր տղաս, որը 6 տարեկան է, հոգով, սրտով հավատում է, որ Ձմեռ պապ կա, եւ սպասում է նրան ու նրա բերած նվերներին:

– Կա՞ հիշարժան մի Ամանոր, որը կառանձնացնեք մյուս ամանորներից:

– Չեմ կարողանում մտաբերել, որովհետեւ բոլոր ամանորներն էլ մեզ մոտ ավանդական են` ընտանիքի գրկում, տանը` երեխաների, ծնողների հետ: Եվ դրանք բոլորն էլ իրար շատ նման են եւ դրական:

– Իսկ նշո՞ւմ եք Ամանորը Ձեր եղբոր` Գարիկ Մարտիրոսյանի ընտանիքի հետ:

– Բայց ոչ այս տարի, որովհետեւ մենք տարբեր քաղաքներում ենք բնակվում: Իհարկե, փորձում ենք Ամանորից հետո կամ առաջ ինչ-որ մի տեղ ընտանիոք հանդերձ հավաքվել` կա՛մ Հայաստանում, կա՛մ Ռուսաստանում, կա՛մ արտերկրում: Իսկ թե ինչպես կստացվի այս տարի, դեռ չենք որոշել:

– Ո՞ւմ կհամարեք տարվա Ձմեռ պապ եւ Ձյունանուշ:

– Նայած ինչ ենք դնում այդ հասկացողության տակ: Որպես բարի պապիկ` այս պահին չեմ մտաբերում որեւէ մեկին: Իսկ տարվա Ձյունանուշ կարելի է համարել Քիմ Քարդաշյանին, որովհետեւ նա իր այցով Հայաստան մեծ գործ կատարեց` միջազգային հանրության ուշադրությունը հրավիրելով Հայոց ցեղասպանության իրողության եւ ընդհանրապես Հայաստանի վրա` որպես պետություն` տեղեկացվածությունն ավելացնելու առումով: Նրա հետեւորդները իր բոլոր քայլերին հետեւում են սոցցանցերում, եւ դա մեծ նշանակություն ունեցավ տեղեկատվության եւ մեր երկրի PR-ի համար: Դրա համար էլ իրեն կհամարեմ ոչ միայն տարվա Ձյունանուշ, այլեւ տարվա կին:

– Ամեն դեպքում, եթե հնարավորություն ունենայիք` այսօր էլ Ձմեռ պապին նամակ գրելու, ի՞նչ կխնդրեիք նրանից:

– Բազմաթիվ բաներ կցանկանայի, ոչ թե ինձ համար, այլ մեր երկրի ու մեր ժողովրդի: Նախեւառաջ կցանկանայի ծովից ծով Հայաստան, մեր հողերի վերադարձ` Մասիս սարով, Դաշտային Ղարաբաղով, Սուրմալուի նահանգով, Ղարսով, Արդահանով... ողջ Արեւմտյան Հայաստանով ու Կիլիկիայով: Կարծում եմ` յուրաքանչյուր հայրենասեր հայ հենց դա էլ կխնդրեր Ձմեռ պապից: Հուսով եմ` մի օր, եթե ոչ Ձմեռ պապը, ապա մենք մեր ուժերով այդ նպատակը կիրագործենք:

– Ի՞նչ եք ակնկալում 2016 թվականից:

– Ակնկալում եմ մեր երկրի զարգացում, առաջխաղացում, էլ ավելի ժողովրդավարացում: Սահմանադրության փոփոխություններն ընդունվեցին հանրաքվեով, եւ մեծ աշխատանք կա կատարելու հաջորդ տարի` մինչեւ նույնիսկ տարվա կեսը` օրենքների ընդունման առումով: Այստեղ առաջին հերթին Ընտրական օրենսգիրքն է, որը նախանշելու է 2017 թվականի խորհրդարանական ընտրությունների ընթացքը, որոնք այսուհետ լինելու են հիմնական, համապետական ընտրությունները, քանի որ ՀՀ նախագահ ընտրվելու է Ազգային ժողովի կողմից, այլ ոչ թե համաժողովրդական քվեարկությամբ: Եվ ակնկալում եմ, որ ակտիվ աշխատանք է կատարվելու Ազգային ժողովում` մեր օրենսդրության կատարելագործման առումով: Իսկ արտաքին քաղաքականության ասպարեզում մեզ մոտ շարունակում է կարեւոր մնալ Արցախի խնդրի խաղաղ կարգավորման նպատակը, մեր հարեւանների հետ բարիդրացիական հարաբերություններ հաստատելու փորձը, մեր ավանդական դաշնակիցների հետ հետագա հարաբերությունների խորացումը:

ՀՐԱՆՏ ՍԱՐԱՖՅԱՆ