ԵԹԵ ԳՈՂԱՆՈՒՄ ԵՆ, ՈՒՐԵՄՆ ՍԵՎԱՆՈՒՄ ԴԵՌ ՄԻ ՔԻՉ ՍԻԳ ԿԱ

ԵԹԵ ԳՈՂԱՆՈՒՄ ԵՆ, ՈՒՐԵՄՆ ՍԵՎԱՆՈՒՄ ԴԵՌ ՄԻ ՔԻՉ ՍԻԳ ԿԱ

Պարզապես «հերոսական» աշխատանքի մասին վկայող փաստեր օրերս ներկայացրեցին ՀՀ բնապահպանության նախարարությունից: Պատկերացրեք՝ բնապահպանական պետական տեսչությունն անցած շաբաթ հինգ օրում իրականացված շրջայցերի ընթացքում նախ ապօրինի անտառահատումների ուղղությամբ է «ահռելի» գործ արել, եւ. «Տավուշի տարածքային բաժնի վարույթին հանձնված գործի քննության արդյունքում ֆիզիկական անձի նկատմամբ կայացվել է 100 հազ.դրամի վարչական տուգանքի որոշում: Վայոց ձորի տարածքային բաժնի հայտնաբերած խախտման համար ֆիզիկական անձի նկատմամբ կայացվել է 100.0հազ.դրամի վարչական տուգանքի որոշում ...»:

Այսպիսով՝ հայաստանյան անտառը ոչնչացումից «փրկելով»՝ անցել են Սեւանի կենդանական աշխարհին: Այս ուղղությամբ էլ արդյունքները «ցնցող» են. «Երեւանի տարածքային բաժնի կողմից իրականացված շրջայցերի ընթացքում առգրավվել է տիրազուրկ 83կգ ¥175հատ¤ սիգ տեսակի ձուկ»: Դրանից զատ՝ 21 հատ «տիրազուրկ» սիգ հայտնաբերել են Գյումրիում, 17հատ՝ Աբովյանում, 208 հատ էլ՝ Գեղարքունիքում:
Այս հերոսություններից հետո պարզապես նման փաստ ներկայացնենք. մայրաքաղաքի փողոցներից մեկի ¥անունը չտանք, քանի որ նման տասնյակ փողոցներ կարող ենք ներկայացնել¤ կոնկրետ հատված արդեն ամիսներ շարունակ երկու-երեք կին են «մասնավորեցրել»՝ տեղում կազմակերպելով թարմ եւ ապխտած սիգ ձկան «բացօդյա ցուցահանդես-վաճառք»: Նույն փողոցում, քիչ ներքեւ տեղակայված են ձկան վաճառքով զբաղվող նաեւ երկու խանութ, որտեղ նույնպես այդ նույն ժամանակահատվածում սիգն անպակաս է: Ընդ որում ֆիքսենք՝ այս ընթացքում վաճառքի գները որոշակիորեն նվազել են, ինչը տնտեսագիտական տերմիններով նշանակում է առաջարկի գերազանցում պահանջարկի նկատմամբ: Շեշտենք նաեւ հետեւյալը. մի շարք հայտնի ձկնաբուծարաններ մեզ տեղեկացրին, որ իրենք սիգ չեն բուծում. «Դա մյուս ձկնատեսակների համեմատ ավելի բարդ է, եւ նախընտրում ենք սիգով չզբաղվել: Մանրածախ վաճառքում հիմնականում Սեւանի սիգն է»: Եվ վաճառողներն էլ իրենց հերթին են քանիցս հաստատել, թե, այո, վաճառում են Սեւանի սիգը: Էլ չասած, որ հիշատակված «բացօդյա» վաճառական կանանց խոսքի բարբառային առանձնահատկությունն արդենիսկ վկայում է, որ Սեւանի կողմերից են:
Այս մասին ժամանակին խոսելու առիթներ ունեցել են, ավելին՝ պատկան բոլոր մարմինների ուշադրությունը հրավիրել սիգի նման ապօրինի վաճառքի վրա: Եվ երբ միայն ամիսներ անց է Բնապահպանության նախարարությունը ողջ Երեւանից հինգ օրում հայտնաբերած 175 սիգից խոսում, իրոք դա «ցնցող» տպավորություն է թողնում: Այն էլ՝ «տիրազուրկ» սիգի, ինչը նշանակում է, որ ձկան վաճառքով զբաղվող խանութներից 1 սիգ անգամ չեն հայտնաբերել, իսկ, օրինակ, հիշատակված այն երկու-երեք կանայք «անտեսանելի» էին: Բայց չէ, հենց երեկ, երբ նախարարությունն այդ «հերոսական» թվերն էր ներկայացնում, առիթ ունեցանք հենց նույն «բացօդյա ցուցահանդես-վաճառքի» մոտով անցնել: Երեւի կռահեցիք՝ ամեն ինչ իր տեղում էր, այդ թվում՝ հենց գետնին դրված կեղտոտ արկղերից վաճառվող երեք-չորս տասնյակի չափով ձկները:
Ի դեպ, այս իրավիճակը լավ եւ վատ կողմ ունի: Լավն այն է, որ պետության հաշվին երկար ժամանակ Սեւան բաց թողնված ձկները հասցրել են մի քիչ վերակենդանացնել լճի ֆաունան, եւ որսագողությունը նորից դարձել է եկամտաբեր: Եվ վատը. թե այդ որսագողության հիմնական եկամուտը որ կոնկրետ գրպաններում է կուտակվում, դժվար չէ կռահել այն վերահսկողությունից, որը պատկան մարմինները կիրառում են այդ մեծ թալանի «դեմն առնելու» համար: Մի խոսքով՝ շուտով նորից Սեւանում սիգ չի մնա:

ՔԵՐՈԲ ՍԱՐԳՍՅԱՆ