ԱՆԻՄԱՍՏ ՈՒՏԵԼԻՔՆԵՐՈՎ ՁԵՐ ՕՐԳԱՆԻԶՄԸ ՄԻ՛ ԾԱՆՐԱԲԵՌՆԵՔ. Բժիշկ

ԱՆԻՄԱՍՏ ՈՒՏԵԼԻՔՆԵՐՈՎ ՁԵՐ ՕՐԳԱՆԻԶՄԸ ՄԻ՛ ԾԱՆՐԱԲԵՌՆԵՔ. Բժիշկ

- Հարգելի բժիշկ, առջեւում հանգստյան օրերն են: Իսկ դա նշանակում է, որ մի քանի օր անկանոն սնվելու եմ: Կա՞ "մեղքերս քավելու" որեւէ տարբերակ:

Հարցին պատասխանել է ՀՀ ԱՆ Ֆիզիկական բժշկության եւ կուրորտաբանության ԳՀԻ սննդաբան, գաստրոէնտերոլոգ ՎԱՐԴԱՆՈՒՇ ՊԵՏՐՈՍՅԱՆԸ.

- Հաճախ ստացվում է այնպես, որ հենց հանգստյան օրերին ռեժիմին չեն հետեւում, սնվում են անկանոն եւ չափից շատ:Ամեն ինչ դեռ այնքան էլ վատ չէ, եթե դա շարունակական եւ մշտական բնույթ չի կրում: Իսկ եթե ձեզ հատուկ է հանգստյան օրերին անկանոն սնվելը, ցանկացած անառողջ սնունդ ընդունելը, մարմնի զանգվածին չհետեւելը` շաբաթվա ընթացքում "մեղքերը քավելու" եւ քաշը վերականգնելու պայմանով, ապա կարող եք համոզված լինել, որ գիրանալուց հետո` անընդհատ նույն քաշին գալով հանդերձ, ոչ միայն չեք օգնում, այլեւ նույնիսկ վնասում եք ձեր առողջությանը:Քաշը պետք է պահել ստաբիլ: Անընդհատ գիրանալ-նիհարելը մեծ սթրես է ձեր օրգանիզմի համար: Սա հատկապես վտանգավոր է դառնում, եթե դուք ունեք առողջական խնդիրներ (շաքարային դիաբեթ, ճնշման խնդիր, արյան մեջ խոլեստերինի բարձր մակարդակ, սրտանոթային համակարգի հիվանդություններ):Մի պահ կանգ առեք եւ մտածեք հետեւանքների մասին:Հանգստյան օրերին ռեժիմը խախտելու դեպքում հարկավոր է հիշել մի քանի պարզ կանոն, որոնք կօգնեն չվնասել առողջությանը եւ պահպանել քաշը:

• Եթե արդեն չափն անցել եք, կարեւոր է ոչ թե բաց թողնել հաջորդ ճաշը, այլ ուղղակի չափաբաժինը փոքրացնել: (Եթե, մեղքի զգացումից դրդված, բաց են թողնում "շատակերությանը" հաջորդող ճաշը, դրանից հետո հաջորդ սննդի ընդունման ժամին արդեն այնքան մեծ է լինում սովի զգացումը, որ որպես կանոն, ուտում են էլ ավելի շատ, կրկնակի չափաբաժնով, որը վերջնականապես "մեղքերը քավելու" գործը փչացնում է):

• Եթե դրսում եք պատրաստվում ճաշել, ընտրեք ոչ հագեցած ճարպերով, առողջ սնունդ: Երբ բերեն` կանաչիներով, գույնզգույն բանջարեղեններով զարդարված, հետաքրքիր ու հագեցնող պատվերը, կողքինները հաստատ կփոշմանեն իրենց կատարած ընտրությունից:

• Քաղաքից դուրս գնալու դեպքում, շատ ավելի հաճելի կլինի ինքներդ պատրաստեք ու տանեք ինչ-որ թեթեւ կերակրատեսակ, որը համ կհյուրասիրեք մյուսներին ու կզարմացնեք, համ էլ առանց մեղքի զգացումի եւ առողջությանը վնաս տալու` հանգիստ կուտեք ինքներդ:

• Հանգստյան օրերը տանն անցկացնելու դեպքում պետք է պատրաստ լինել նաեւ սննդամթերքով: Նախապես պատրաստեք սառնարանը հանգստյան օրերին` լցնելով այն բանջարեղենով, մրգերով, կաթնամթերքով եւ այլ անվնաս սննդամթերքներով:

• Մի մոռացեք շարժվել: Օրական առնվազն 40 րոպե անհրաժեշտ է ակտիվ լինել ֆիզիկապես: Այցելեք մարզասրահներ, կամ լողի գնացեք, եթե ժամանակի խնդիր է, երեխաներ ունեք, կարելի է հաճելին օգտակարի հետ զուգակցել` խաղացեք երեխաների հետ ակտիվ խաղեր, կամ որոշ վարժություններ կատարեք, պարեք միասին, եթե չի ստացվում 40 րոպե անընդմեջ, կարող եք 10-15 րոպեով օրվա մեջ լրացնել:Ամեն շաբաթ եւ կիրակի հիշեք, որ ձեր օրգանիզմն էլ հանգստի կարիք ունի, եւ մի ծանրաբեռնեք նրան անիմաստ ուտելիքներով եւ հիշեք նաեւ, որ երբ դուք քնած եք, նա դեռ միեւնույն է աշխատում է նույնիսկ ձեր քնի ընթացքում եւ հանգստյան օրերին էլ արժանի է հանգստի` ավելի քան դուք նրան թույլ եք տալիս:Գնահատեք ձեր առողջությունը:

ՎԼԱԴ ՄՈՒՐԱԴՅԱՆ