«ՀԱՍԿԱՑԵԼ ԷԻ, ԹԵ ՈՎ ԿԱՐՈՂ Է ԼԻՆԵԼ ԻՄ ՁՄԵՌ ՊԱՊԸ»

«ՀԱՍԿԱՑԵԼ ԷԻ, ԹԵ ՈՎ ԿԱՐՈՂ Է ԼԻՆԵԼ ԻՄ ՁՄԵՌ ՊԱՊԸ»

Երգչուհի ՍՈՖԻ ՄԽԵՅԱՆՆ իրեն երբեք չի պատկերացրել Ձյունանուշի կերպարում, ավելին` 2016-ից, ինչպես յուրաքանչյուր աղջիկ, սպասումներն աղջկական են` սպիտակ ու լուսավոր երազանքի նման: Երգչուհին էլ բոլորի պես հավատում է Ձմեռ պապիկի գոյությանը, բայց իրատեսական լինելով` երբեք որեւէ նյութական բան չի ակնկալել հեքիաթային բարի պապիկից, այլ ինքն է եղել նախաձեռնող:

- Սոֆի, Նոր տարվա գիշերը Ձմեռ պապիկից ի՞նչ սպասելիքներ ու ակնկալիքներ ունեք:

- Սովորաբար Նոր տարվա գիշերը Ձմեռ պապիկին չեմ սպասում, բայց յուրաքանչյուր տարի` ժամը 12:00-ին, անկախ ինձանից սկսում եմ մտքումս երազանքներ պահել, քննարկել:

- Որպես կանոն, տարվա ընթացքում դրանք իրականանո՞ւմ են:

- Այո, երբեմն էլ եթե չի լինում, ասում եմ` կարող է շատ չեմ խնդրել: Կամ էլ`  հասկանում եմ, որ ամեն ինչ լինում է իր ժամանակին:

- Իսկ Ձմեռ պապիկ գոյություն ունի՞:

- Փոքր ժամանակ հասկացել էի, որ իրականում նա գոյություն ունի, եւ թե ով կարող է լինել իմ Ձմեռ պապը: Ես հեքիաթի մեջ իրականն էի տեսնում, ոչ թե ասենք նստում էի ու սպասում Ձմեռ պապին: Երազանքներս շատ ավելի գլոբալ էին` ասում էի, տա Աստված, որ բոլոր Ձմեռ պապիներն ու ինձ հարազատ մարդիկ լինեն առողջ ու իմ կողքին, մնացածը հաստատ միասին կստեղծենք: Իրականում հավատում եմ, որ կա մեր պատկերացրած այդ հեքիաթը` շատ գեղեցիկ, բարի աչքերով, սպիտակ մորուքով, որը երկնային է:

- Նոր տարին շատ ընտանեկան տոն է, ընտանիքում կա՞ որեւէ հստակ կանոն` ասենք տոնածառը, տունը զարդարելու, կամ էլ միասին սեղան գցելու:

- Այո, մեծ մասամբ տոնածառը նախապես զարդարում ենք ընտանիքով, այդ պրոցեսին ներկա են լինում տան բոլոր անդամները:

- Իսկ Ձեզ վրա ե՞ք վերցնում զարդարանքի գործը:

- Բոլորով մասնակից էինք լինում մինչ անցյալ տարի, երբ մեր ընտանիքում եղավ լրացում` եղբայրս ամուսնացավ ու մեր շատ սիրելի Անին` հարսիկը, ստանձնեց այդ ծանր պարտականությունը: Նա իր ցանկությամբ մեր տոնածառն այնքան գեղեցիկ զարդարեց եղբորս հետ միասին, որ ես եւ ծնողներս ոչ միայն դիտորդի դերում էինք, այլ ինչ-որ տեղերում լուծումներ տալու: Իսկ ընդհանրապես Նոր տարուն պատրաստվելը, սեղան գցելը, իրար օգնելը պարտադիր է մեր տանը, որ հասցնենք մինչ 12:00-ն, մի խոսքով մեր տանն էլ է շատ հաճելի հայկական պրոցես` մեր ընտանիքն էլ բացառություն չէ, մենք էլ ենք հաճելի ու տաք մթնոլորտ ստեղծում, չէ որ ինչպես ասում են` ինչպես դիմավորես, այնպես էլ կլոր տարին կանցկացնես:

Զրուցեց ԼԻԼԻԹ ԵՂԻԱԶԱՐՅԱՆԸ