«ՁՄԵՌ ՊԱՊ ՉԿԱ». Կարեն Գյուրջյանն անիրական բարի պապիկին նամակ գրելու փոխարեն, նշանվում է

«ՁՄԵՌ ՊԱՊ ՉԿԱ». Կարեն Գյուրջյանն անիրական բարի

պապիկին նամակ գրելու փոխարեն, նշանվում է

Ի տարբերություն շատ-շատերի, ովքեր այս օրերին գերզբաղված են տոնական սեղանի պատրաստությամբ եւ փորձում են մինչ Ամանոր ավարտին հասցնել հնարավոր բոլոր կիսատ թողած գործերը, իսկ երազանքների ու նպատակների իրագործման հարցում հույսները դրել են Ձմեռ պապին նամակ գրելու վրա, վարսահարդար ԿԱՐԵՆ ԳՅՈՒՐՋՅԱՆԸ որոշել է Ամանորը կրկնակի տոն դարձնել: Այս տարվա «Լավագույն ոճաբան» անվանակարգին արժանացած Կ. Գյուրջյանը ժամեր անց կօրինականացնի իր սիրավեպը` նշանադրությամբ, ինչի մասին էլ ծավալվեց «Իրավունքի» զրույցը նորափեսայի հետ:

- Կարեն, իհարկե, վստահ եմ, որ այս օրերին Ձեզ շատ են ուղղել այս հարցը, բայց, այնուամենայնիվ` ինչո՞ւ որոշեցիք հենց դեկտեմբերի 31-ին կազմակերպել նշանադրության արարողությունը:

- Ճիշտն ասած, ուղղակի, հանգամանքների բերումով չէինք կարող նշանադրությունն անել մինչեւ դեկտեմբերի 19-ը, քանի որ դեռ տատիկիս մահվան տարելիցը չէր լրացել: Բայց ես ու Սվետան ուզում էինք, որ այն անպայման լինի այս տարի, իսկ այս տարվա ամենահետաքրքիր օրը ամսի 19-ից հետո 31-ն էր…

- Ձեզ և Ձեր գործունեությանը հետեւող մի շարք աղջիկներ այսօր հաստատ կասեն` նա էլ լքեց ցանկալի փեսացուների շարքը: Որքանո՞վ էր բարդ հրաժարվելը «ազաբի» կարգավիճակից:

-Ճիշտն ասած, ես երբեք էլ չեմ գտնվել այն մարդկանց ցուցակում, որոնք դժվարությամբ են հրաժարվում «ազաբի» կարգավիճակից: Իսկ Սվետային տեսնելու առաջին իսկ վայրկյանից ես պատրաստ էի հրաժարվել նույնիսկ իմ ամենասիրելի ուտեստից (կատակում է.-հեղինակ):

- Ո՞վ է նա, որ կարողացավ գրավել Ձեր սիրտը:

- Կլինեմ հակիրճ` երազանքներիս աղջիկը:

- Հետաքրքիր է, թե ինչպե՞ս եք ծանոթացել:

-Ծանոթացել ենք իմ աշխատանքի բերումով նա իմ լավ հաճախորդն էր, շեշտում եմ հաճախորդն ԷՐ:

- Ձեր սիրո պատմությանն ուշիշով հետեւում է նաեւ ֆեյսբուքյան հանրությունն ու դրա վառ վկան են բազմաթիվ մեկնաբանություններն ու «լայքերը»: Ո՞րն է գաղտնիքը, որ ձեր զույգն այդքան սիրվեց:

-Գաղտնիք չկա, պարզապես սիրվեց… Ինչպես հայրս է ասում` դրական լիքցքեր ենք հաղորդում, երբ միասին ենք: Միգուցե այդպես էլ կա:

- Արդեն որոշվա՞ծ է ամուսնության օրը, թե՞ մտադիր եք նշանված լինելու կոչումը երկար վայելել:

- Դեռ չենք որոշել, բայց ամենայն հավանականությամբ` ամռանը:

- Ինչպիսի՞ հարսանեկան արարողություն եք պատկերացնում` հայկական ավանդական, թե՞ գերժամանակակից արտասահմանյան:

- Լինելով հայ եւ հայ ընտանիքում դաստիարակված մարդ` միանշանակ հայկական ավանդական…

- Ձեր սիրելի մուլտհերոս Բարտ Սիմսոնի հայրը երեք զավակ ունի, կհետեւե՞ք նրա օրինակին, թե ավելի կողմ եք 7 որդով սեղան նստելու մաղթանքներն իրականություն դարձնելուն:

- Վատ չէր լինի Հոմեր Սիմսոնի պես երկու աղջիկ, մեկ տղա ունենայի, բայց այդ արդեն Աստված կորոշի:

- Ի՞նչ եք այսօր սպասելու Ձմեռ պապից, թե՞ արդեն Ձեր երազանքն իրագործվել է:

- Ձմեռ պապ չկա:

- Հավատո՞ւմ եք ամանորյա հրաշքների:

- Ինձ թվում է` բոլոր մարդիկ, ովքեր երազելու ունակություն ունեն, հավատում են հրաշքների:

- Ո՞րը կլինի 2016 թվականի հունվարի մեկի առաջին մաղթանք-կենացը` որպես նորափեսա:

- Բոլորին մաղթում եմ առողջություն, հաջողություն, սեր ու անսահման սպասելու ունակություն, քանի որ բոլորս միշտ սպասում ենք…

ՀՐԱՆՏ ՍԱՐԱՖՅԱՆ

Հ.Գ.- Մեզ մնում է շնորհավորել Կ.Գյուրջյանին եւ Սվետային ու մաղթել երկար ու ձիգ տարիների անսպառ երջանկություն, սեր ու նորանոր ձեռքբերումներ: