«ԱՆԿԱԽ ՏՈՆԵՐԻՑ ԵՎ ՀԱՎԱՔՈՒՅԹՆԵՐԻՑ ՊԵՏՔ Է ՉԱՓԱՎՈՐ ՍՆՎԵԼ». Բժիշկ

«ԱՆԿԱԽ ՏՈՆԵՐԻՑ ԵՎ ՀԱՎԱՔՈՒՅԹՆԵՐԻՑ ՊԵՏՔ Է ՉԱՓԱՎՈՐ ՍՆՎԵԼ». Բժիշկ

Մի քանի օր առաջ պատրաստած ուտեստներին «թարմություն» հաղորդելու եւ այն սպառելու համար տանտիրուհիները դիմում են զանազան հնարքների, փոփոխում են ուտեստի արտաքին ձեւը, ինչից, բնականաբար, չի փոխվում վնասակարության աստիճանը: Այդ մասին «Իրավունքի» հետ զրույցում ասաց «Շտապբուժօգնություն» ՓԲԸ «Կենտրոն» ենթակայանի բժիշկ ՀԱՐՈՒԹՅՈՒՆ ԲԱԴԱԼՅԱՆԸ: Խոսքը տոնական օրերին մատուցվող սննդի մասին է:

Ըստ նրա՝  երբեմն թունավորում կարող է տեղի ունենալ նույնիսկ բավական ախորժելի տեսք ունեցող ուտեստից. համն ու հոտը խաբուսիկ են:

«Եթե սնունդը կորցրել է պիտանելիությունը, նույնիսկ առողջ մարդու վրա կարող է ոչ բարերար ազդեցություն թողնել: Իսկ այն մարդիկ, ովքեր ունեն աղեստամոքսային տրակտի հիվանդություններ` խոց, գաստրիտ, լյարդի հետ կապված խնդիրներ, պետք է էլ ավելի ուշադիր լինեն: Ոչ թարմ սնունդը նրանց կարող է շատ ավելի լուրջ բարդությունների առաջ կանգնեցնել, սրել վիճակը»,- զգուշացնում է բժիշկը:

Հ. Բադալյանի խոսքերով՝ ռիսկային խմբում են նաև սրտանոթային համակարգի հիվանդություններ ունեցողները: «Սննդամթերքի ու ալկոհոլային խմիչքների չարաշահումը ազդում է ինչպես սրտի աշխատանքի, այնպես էլ անոթային համակարգի վրա: Դա կարող է հանգեցնել արյան զարկերակային ճնշման տատանումների, հիպերտենզիաների, հիպերտոնիկ կրիզների,նաեւ կարող է առաջացնել նախաինֆարկտային վիճակ»:

Բժիշկը խորհուրդ է տալիս օգտագործել միատեսակ ալկոհոլային խմիչք: Այսինքն` չհամադրել գինին, օղին եւ կոնյակը: Անշուշտ, չափավոր:

Հ. Բադալյանի փոխանցմամբ` ալիմենտար (սննդային) խանգարումների ժամանակ մարդիկ երբեմն փորձում են ինքնուրույն կարգավորել առողջական վիճակը, ինչը սխալ է: «Բոլոր հիվանդանոցներում անկախ տոներից  ու ոչ աշխատանքային օրերից սահմանված է հստակ հերթապահությունների կարգ, միշտ կան հերթապահ բժիշկներ: Հարկ եղած դեպքում պետք է դիմել մասնագետի օգնությանը»:

Իսկ նման տհաճ իրավիճակներից զերծ մնալու համար, բժիշկը հիշեցնում է. «Անկախ տոներից եւ հավաքույթներից  պետք է չափավոր սնվել,  օգտագործել այնքան սնունդ, որքան անհրաժեշտ է օրգանիզմին, եւ ոչ թե չափից ավելի ծանրաբեռնել աղեստամոքսային տրակտը՝ հատկապես գիշերային ժամերին»:

Վ. ՄՈՒՐԱԴՅԱՆ