ԻՐԱՆԱԳԵՏ. «ՓՈՐՁ ԿԿԱՏԱՐՎԻ ԱՎԵԼԻ ԱԿՏԻՎԱՑՆԵԼ «ԱՐԴԱՐՈՒԹՅԱՆ ԲԱՆԱԿ» ԱՀԱԲԵԿՉԱԿԱՆ ԿԱՌՈՒՅՑԸ»

ԻՐԱՆԱԳԵՏ. «ՓՈՐՁ ԿԿԱՏԱՐՎԻ ԱՎԵԼԻ ԱԿՏԻՎԱՑՆԵԼ «ԱՐԴԱՐՈՒԹՅԱՆ ԲԱՆԱԿ» ԱՀԱԲԵԿՉԱԿԱՆ ԿԱՌՈՒՅՑԸ»

Իրանագետ Վարդան Ոսկանյանն իր ֆեյսբուքյան էջում  գրել է. «Լրատվական գործակալությունները տեղեկացնում են, որ Սաուդյան Արաբիայի արտգործնախարար Ադիլ բին Ահմադ ալ-Ջուբայրը մեկնել է Պակիստան: Ակնհայտ է, որ նախատեսված հանդիպումների ընթացքում քննարկվելու են նաև իրանա-սաուդական լարված հարաբերությունները:

Ամենայն հավանականությամբ ալ-Ջուբայրի՝ Իսլամաբադ այցի ետնաբեմում փորձ կկատարվի Պակիստանի տարածքից ավելի ակտիվացնելու նաև տեղի իշխանությունների թողտվությամբ գործող հակաիրանական ուժերը՝ հատկապես թմրանյութերի առևտրի և ահաբեկչության մեջ ներքաշված այնպիսի ծայրահեղական խմբավորում, ինչպիսին կեղծ բելուջական ազգայնականության շղարշով հանդես եկող իրականում սալաֆիական ուղղվածության «Ջայշ ալ-Ադլ» («Արդարության բանակ») ահաբեկչական կառույցն է:

Ուշագրավ է, որ ընդամենը մի քանի օր առաջ իրանական անվտանգության ուժերը երկրի հարավարևելյան Սիստան և Բելուջստան նահանգում չեզոքացրել էին հենց նույն ահաբեկչական խմբավորման տեղական բջիջներից մեկը՝ խմբավորում, որը դատելով պարբերաբար ԶԼՄ-ներ սպրդող տեղեկատվությունից, գործում է մի կողմից սաուդական և պակիստանյան, իսկ մյուսից՝ իսրայելական գաղտնի օժանդակության պայմաններում»: