ԷԴՎԱՐԴ ՄԻԼԻՏՈՆՅԱՆ. «ՉԵՄ ԿԱՐՈՂ ՆՐԱՆ ԶՈՌՈՎ ԾԵՐԱՆՈՑ ՏԱՆԵԼ»

ԷԴՎԱՐԴ ՄԻԼԻՏՈՆՅԱՆ. «ՉԵՄ ԿԱՐՈՂ ՆՐԱՆ

ԶՈՌՈՎ ԾԵՐԱՆՈՑ ՏԱՆԵԼ»

Արդեն մի քանի օր է էլեկտրոնային մամուլում խոսվում է, որ Գուրգեն Մահարու այրին` ՀՀ Գրողների միության անդամ, գրող Անտոնինա Մահարին հիվանդ, մենակ, անօգնական, առանց հոսանքի, ցուրտ բնակարանում գամված է անկողնուն: ՀՀ գրողների միության նախագահ ԷԴՎԱՐԴ ՄԻԼԻՏՈՆՅԱՆՆ «Իրավունքի» հետ զրույցում ասաց, որ տիկին Մահարին, անկախ ամեն ինչից, միշտ իրենց ուշադրության կենտրոնում է:

-Մենք միշտ որոշակի աջակցություններ ցուցաբերում ենք եւ շարունակելու ենք ցուցաբերել: Մեր միությունում Մարգո անունով հրաշալի աշխատակից ունենք, ով ամեն օր գնում է նրա մոտ, զրուցում է, խնամում է:

-Ասում են` հարեւաններն են խնամում նրան:

- Այո, մեր գրողներից Ազատ Շահինյանն էլ է նրա հարեւանը, Ազատի կինն էլ է գնում, խնամում. բա հայ մարդու լավագույն հատկություններից մեկն էլ դա է:

- Պարոն Միլիտոնյան, ասում են, որ նա ծայրահեղ վատ պայմաններում է, նույնիսկ լույսն է անջատված:

- Ընդհանրապես, նա այդ իմաստով շատ ժուժկալ կին է, բայց մենք առաջարկել ենք իրեն, որ օգտագործի էլեկտրաէներգիան` մենք իր փոխարեն վճարումները կանենք: Նույնիսկ ասել ենք, որ կարող ենք աջակցել մեր հնարավորության սահմաններում: Մեր պոլիկլինիկան նրան անվճար սպասարկել է, նաեւ որոշակի ֆինանսական աջակցություն ենք ցուցաբերում: Այդ առումով, ՀՀ մշակույթի նախարարության հետ էլ համագործակցում ենք, Մահարու գրքերն են տպագրվել, անտիպներն են տպվել:

- Վերջին անգամ տիկին Մարգոն ե՞րբ է այցելել տիկին Մահարուն:

- Հենց այսօր երկու անգամ է այցելել:

- Վերջին տվյալներով` նա կրկին անկողնային պառկա՞ծ է:

- Սիրելիս, 93 տարեկան կին է... Շատ կցանկանամ, որ աշխույժ ման գա, ոտքի լինի: Մենք մի քանի գրողներ ունենք 90-ն անց, որ կուզենամ ոտքի վրա լինեն, բայց հիմա տարիք է, ինչ ասեմ, ես չեմ որոշողը: Հիմա մենք այս վիճակում որքան կարող ենք, մեր հնարավորությունների սահմանում աջակցում ենք, մշտապես կապի մեջ ենք իր հետ, մեզ չէ, որ պետք է հիշեցնեն, թե գրողների հետ ոնց պիտի աշխատենք: Ցավալին այն է, որ շատ գրողներ ունենք, որոնք դժվարությունների մեջ են, ծայրահեղ վատ են ապրում, հիվանդ են, բժշկական աջակցության կարիք ունեն, մենք դրանք հոգում ենք: Իմիջիայլոց, մեր միությունը եզակի միություններից է, որ բժշկական բոլոր հարցերով զբաղվում է, մի մասին էլ` պետպատվերի շրջանակում: Նաեւ անվճար մեր ստեղծագործական տներում ապրում են ու ստեղծագործում, բոլոր գրողները օգտվում են դրանից: Մեր միության անդամների մեծ մասը 65-ից բարձր են, պարզ է, որ այդ տարիքից հետո առողջական ու ֆիզիկական խնդիրներ են առաջանում, իհարկե, այս հարցով մենք էլ, նախարարությունն էլ պետք է զբաղվեն:

- Պարոն Միլիտոնյան, իսկ առաջարկվե՞լ է տիկին Մահարուն, տեղափոխել ծերանոց:

- Ամեն ինչ կախված է մարդու ցանկությունից, ես չեմ կարող նրան զոռով ծերանոց տանել (ի դեպ, ասվածը նաեւ սահմանված է ՀՀ օրենքով. հեղինակ), դա իմ որոշելիք խնդիրը չէ, եթե մեզ դիմում են, ու մենք կարող ենք օգտակար լինել, մեր հնարավորությունների սահմանում օգնում ենք: Պետք չէ շատ հիվանդագին բան դարձնել, մանավանդ` Մարգոն էլ ասաց, որ ինքն էլ հաճույքով չի ընդունում, որ իր շուրջ ստեղծվել է այս ամենը:

ԼԻԼԻԹ ԵՂԻԱԶԱՐՅԱՆ