ԻՆՉՈ՞Ւ ԱՎԵՏԻՍՅԱՆՆԵՐԸ` ՀԱՐՑԻ ՊԱՏԱՍԽԱՆԸ ՀԱՐԱԶԱՏՆԵՐԸ ՉԳՏԱՆ

Ուղիղ մեկ տարի է անցել Գյումրիում Ավետիսյանների յոթհոգանոց ընտանիքի, այդ թվում՝ երկու մանկահասակ երեխաների դաժան սպանդից: Չնայած մի ողջ ընտանիքի սպանության մեջ մեղադրվող ոճրագործ Վալերի Պերմյակովն արդեն Հայաստանի դատարանի առաջ է կանգնած, սակայն Ավետիսյանների հարազատները, մասնավորապես Ավետիսյանների փեսան` Արթուրը, դեռ անցած տարի տեղի ունեցած առաջին դատական նիստը շոու է համարում.

«ՑԱՎ, ԶԱՅՐՈՒՅԹ, ԼԱՑ, ՅՈԹ ՀՈԳՈՒ ԱՆՄԵՂ ԱՐՅՈՒՆ» -Չգիտեմ` էդ ի՞նչ էր, թատերական ներկայացո՞ւմ, շոո՞ւ, թե ինչ, բայց ոչ դատական նիստ: Այն տպավորություն էր, որ դատավորը պատրաստ չէր այդ նիստին: - Կխնդրեինք հետադարձ հայացք նետել մեկ տարի առաջվա այս օրվան: - 2015 թվականի հունվարի 12-ը երբեք մեր հիշողություններից չի ջնջվի. ցավ, զայրույթ, լաց, յոթ հոգու անմեղ արյուն: Ամենացավալին այն է, որ մեկ տարի է անցել, բայց մենք էդպես էլ չկարողացանք ստանալ մեզ ամենաշատը հուզող հարցի պատասխանը` ինչո՞ւ Ավետիսյանները, ինչո՞ւ Ավետիսյանների նորածին բալեքը: Այս հարցի պատասխանը, մեզ թվում է, երբեք էլ չենք ստանա: Էնպես, ոնց որ չեն սպիանա մեր վերքերը. տարիներն էլ ի զորու չեն մոռացնելու, մեղմելու այն ցավը, որ մեզ տվեց ոճրագործը: Մենք չենք հավատում, որ այդ չգիտես ինչ կոչվածը, ըստ նա խոսքերի, պատահական է մտել Ավետիսյանների բնակարան՝ ջուր խմելու, սակայն վախենալով դեմը դուրս եկած Ավետիսյանից` գնդակահարել է նրան, եւ նույն վախի պատճառով՝ գնդակահարել է նաեւ ընտանիքի մյուս անդամներին, ովքեր քնած են եղել: Եթե իրականում էդպես լիներ, նա ոչ թե պետք է սկսեր գնդակահարել, այլ մեկին սպանելով՝ վախից կփախչեր: Բացի այդ, եթե նա իրոք վախից սպանած լիներ Ավետիսյաններին, ապա հայտնաբերվելուց հետո կխոստովաներ եւ կասեր՝ չէի ցանկանում, կներեք. ինչպես անում են շատ հանցագործներ ձերբակալվելուց հետո: Բայց մինչ օրս նման բան չտեսանք: - Ի՞նչ եք կարծում, հնարավո՞ր է, որ Պերմյակովի սատայանապաշտ լինելը, որի մասին հայտարարեցին Ձեր ներկայացուցիչները, դառնար Ձեր հարազատների սպանության դրդապատճառը: - Մենք էլ ոչնչից չենք զարմանա: Չեմ կարող ասել` դա է պատճառը, թե` ոչ: Փաստն այն է, որ նա սպանել է յոթ հոգու, ու թե ինչու կամ ինչ դրդապատճառով, դա մեր՝ հարազատներս ցավը չի մեղմի: Պարզապես, գոնե կիմանանք, թե ինչու «զոհաբերվեց» Ավետիսյանների ընտանիքը: «ՊԵՐՄՅԱԿՈՎԸ ԿԲԱՑԻ ԲՈԼՈՐ ՓԱԿԱԳԾԵՐԸ» Մենք փորձեցինք զրուցել նաեւ ոճրագործի փաստաբան ԷԴՈՒԱՐԴ ԱՂԱՋԱՆՅԱՆԻ հետ, ով կտրականապես հերքեց իր պաշտպանյալի սատանայապաշտ լինելը. - Չկա նման բան, համենայնդեպս, ներկա պահին քրեական գործի նյութերից ես նման եզրակացության գալ չեմ կարող: Հետեւապես՝ չեմ կարող կիսել կամ համաձայնել այն տեսակետների հետ, որ իր սատանայապաշտ լինելն է սպանության դրդապատճառը: Այսինքն, որպես դրդապատճառ, ես դա չեմ կարող դիտել այս պահի դրությամբ: - Այդ դեպքում, ըստ Ձեզ, ո՞րն է դրդապատճառը: Դուք մի առիթով նշել էիք, որ հանդիպել եք Պերմյակովի հետ, եւ նա հայտնել է, թե որն է իր այդ սարսափելի հանցագործության իրական պատճառը: - Բնականաբար՝ ես խոսել եմ պաշտպանյալիս հետ: Հավատացեք՝ Պերմյակովը դատական նիստերի ժամանակ ասելու շատ բան ունի, կանդրադառնա նաեւ բուն հանցագործությանը: Ինչ վերաբերում է մեր խոսակցության բովանդակությանը, ապա այս պահին ես իրավասու չեմ այն հրապարակել: Սպասեք դատաքննությանը, երբ գա իր դիրքորոշումը հայտնելու պահը, շատ ուշագրավ բաներ ի հայտ կգան: Նա ինձ խնդրել է այդ մասով չխոսել, ասել է, որ ցանկանում է իրենից դուրս գա այդ դիրքորշումը, ինչպես նաեւ՝ մեղավոր ճանչում է իրեն, թե` ոչ: - Այսինքն հնարավոր է, որ դատաքննության ընթացքում իրեն մեղավոր չճանաչի՞: - Ամեն բան էլ հնարավոր է: Ճիշտ կլինի սպասենք, երբ կգա իր ցուցմունք տալու ժամանակը: Պերմյակովը կբացի բոլոր փակագծերը, եւ այդ ժամանակ շատ հետաքրքիր բաներ ի հայտ կգան: Ես կարող եմ մի բան ասել՝ Պերմյակովի համար միեւնույնը չէ այս դատական գործընթացը, ինչպես նաեւ՝ իր ճակատագիրը: - Բայց դատական նիստերի ընթացքում նա իրեն շատ անտարբեր է պահում: - Չկա նման բան, նա իրեն շատ անմիջական է պահել նաեւ ինձ հետ առանձնազրույցի ժամանակ: Ես նույնիսկ նրան հարցրի՝ որեւէ կաշկանդվածություն ունի՞, թե` ոչ, եւ նա միանշանակ վստահեցրեց, որ չկա նման բան: Կրկնեմ՝ Պերմյակովի համար մեկ չէ իր ճակատագիրը, պարզապես նա այդպես է ցույց տալիս: ԻԼՈՆԱ ԱԶԱՐՅԱՆ