Գիսանե Պալյան. «ԵՍ ՍՈՎՈՐ ԵՄ ԱՍԵԼ ԱՅՆ, ԻՆՉ ՏԵՍՆՈՒՄ ԵՄ ԵՎ ԶԳՈՒՄ ԵՄ»

Գիսանե Պալյան. «ԵՍ ՍՈՎՈՐ ԵՄ ԱՍԵԼ ԱՅՆ, ԻՆՉ ՏԵՍՆՈՒՄ ԵՄ ԵՎ ԶԳՈՒՄ ԵՄ»

Վաղը` հունվարի 17-ին, կկայանա ArmBody.Project-ի «Լավագույններից լավագույնը» երաժշտական 2-րդ մրցույթի երկրորդ փուլը, որի ժամանակ մասնակիցները կկատարեն հայկական երգեր: Մրցույթի, մասնակիցների եւ ժյուրիի կազմում իր մասնակցության մասին էլ ծավալվեց «Իրավունքի» զրույցը երաժիշտ, երգահան, հեռուստատեսային երաժշտական բազմաթիվ հաղորդումների պրոդյուսեր ԳԻՍԱՆԵ ՊԱԼՅԱՆԻ հետ:

-Տիկին Պալյան, որքանո՞վ էր բարդ նախորդ փուլում մասնակիցներից ընտրել միայն 23 հոգու:

-Դեռեւս նախընտրական փուլից մենք ընտրության բարդությունը զգացինք, բայց, եթե մեզ մոտ լինում է իր ձայնային տվյալներով կասկածելի մասնակից, անպայման նրան հնարավորություն ենք տալիս մյուս փուլում ներկայանալու:  Այնպես որ, մրցույթը փուլ առ փուլ բարդանում է մասնակիցների համար, ավելի նեղանում է իրենց շրջանակները եւ ավելի բարդ է այդ ընտրությունը կատարել:

- Հետաքրքիր է Ձեր կարծիքը` մասնակից սկսնակ երգիչների երաժշտական ճաշակի ու ձայնային տվյալների մասին:

- Լավ մասնակիցներ ունենք, որոնք շատ խոստումնալից են: Օժշտված են լավ տվյալներով, պարզապես, պետք է շատ աշխատեն իրենց վրա: Ուրախ եմ, որ այսպիսի կորիզ ունենք:

- Մեծ փորձ ունենալով երաժշտական մրցույթներին ժյուրիի կազմում լինելու` ի՞նչ կասեք այս մրցույթի ձեւաչափի մասին:

- Կյանքում շատ ազնիվ մարդ եմ եւ թե՛ հեռուստանախագծերում, թե՛ այս պարագայում, ես սովոր եմ ասել այն, ինչ տեսնում եւ զգում եմ: Ընդհանրապես այսպիսի ստրատեգիա ունեմ` անպայման նշել մասնակցի լավ կողմը, որովհետեւ լավ կողմեր բոլորի մոտ էլ կան, եւ նաեւ նշել բացասական կողմը, որպեսզի մասնակիցն իմանա, թե ինչն է իր մոտ լավ ստացվում, ինչը` վատ ու ինչի վրա պետք է աշխատել: Մեր դերը հենց դրանում է, որ ոչ միայն դատենք ու ասենք` դու անցար, դու չանցար, այլ ուղորդենք, թե ինչ անեն այդ մարդիկ հետագայում: Չէ որ իրենք նոր են սկսում եւ նոր պետք է փորձ ձեռք բերեն:

- Մրցույթը որքանո՞վ կարող է հեռանկար ունենալ սկսնակ երգիչների համար:

- Այսօր սկսնակ երգիչների համար, ընդհանրապես, շատ քիչ են հարթակներն, ինչի համար ցավ եմ ապրում: Այսօր շատերը հնարավորություն չունեն ցուցադրելու իրենց ձայնային կարողությունները, որովհետեւ, օրինակ, երաժշտական հեռուստանախագծերը, որոնց մարդիկ մասնակցում էին ու ինչ-որ ձեւով առաջ գնում, նախորդ տարի չկար: Բայց այս երեխաներն աշխատում են իրենց վրա եւ իրենց պետք է այդ հարթակը, այդ բեմը, որպեսզի իրենց ցույց տան իրենց եւ ստուգեն իրենց ուժերը: Մինչդեռ չկար այդ հարթակը, իսկ «Լավագույններից լավագույնը» երաժշտական մրցույթը ինչ-որ տեսակի հարթակ է, որպեսզի մասնակիցները իրենց դրսեւորեն, ցույց տան, լսեն մասնագետների կարծիքներ, լինեն մրցակցության մեջ:

- Այո, բայց մեր օրերում շատերը հենց խուսափում են այդ մրցակցությունից. պարզապես, մի օր իրենց երգիչ են հայտարարում եւ վերջ:

- Շատ կարեւոր է ցանկացած մրցակցություն, իսկ դրա բացակայությունը լրիվ լճացման է բերում: Իսկ այդ մրցակցության արդյունքում, եթե անգամ չանցնեն էլ հաջորդ փուլ, դա պետք է ընդամենը խթան լինի ավելի շատ աշխատելու: Մի խոսքով` չնայած իմ զբաղվածությանը, ես մեծ հաճույքով համաձայնեցի լինել այս մրցույթի ժյուրիի կազմում, որովհետեւ ճիշտ գործ է արվում:

ՀՐԱՆՏ ՍԱՐԱՖՅԱՆ