ԱՄՆ-Ն ՄՏՐԱԿԻ ՈՒ ԲԼԻԹԻ ՔԱՂԱՔԱԿԱՆՈՒԹՅՈՒՆՆ Է ՎԱՐՈՒՄ ԻՐԱՆԻ ՀԱՆԴԵՊ

ԱՄՆ-Ն ՄՏՐԱԿԻ ՈՒ ԲԼԻԹԻ ՔԱՂԱՔԱԿԱՆՈՒԹՅՈՒՆՆ Է

ՎԱՐՈՒՄ ԻՐԱՆԻ ՀԱՆԴԵՊ

Երեկ հայտնի դարձավ, որ ԱՄՆ-ն ու ԵՄ-ն չեղյալ  են համարել Իրանի  դեմ կիրառվելիք պատժամիջոցները: Խոսքը, մասնավորապես, վերաբերում է պատժամիջոցներին, որոնք ներդրվել էին իրանական ատոմային ծրագիրը խափանելու ԱՄՆ մտադրությամբ: Սակայն ԱՄՆ-ն  նաեւ հայտարարել էր, որ ԱՄՆ իշխանությունները պատժամիջոցներ են ընդունել 11 ընկերությունների եւ անձանց դեմ, որոնք մասնակցել են բալիստիկ հրթիռների փորձարկումներին։

Պատժամիջոցային ցուցակում հայտնվել է Իրանի 6, մեկ Չինաստանի քաղաքացի, ԱՄԷ 2 եւ չինական մեկ ընկերություն: Իրանագետ Արամ Մանուկյանն «Իրավունք»-ի հետ զրույցում ասաց, որ պատժամիջոցների չեղարկումը կուժեղացնի Իրանի դերը տարածաշրջանում, որը կազդի տարածաշրջանում բոլոր խաղացողների վրա:  Հայաստանը եւս շահում  է իրավիճակից, քանի որ Թուրքիայի դերը կթուլանա տարածաշրջանում:

Պատժամիջոցների վերացմամբ ԱՄՆ-ն ու ԵՄ-ը հույս ունեն Իրանին ետ պահել ՌԴ-ի հետ սերտ հարաբերություններ հաստատելուց եւ օգտագործել Իրանի ներուժը`  ահաբեկիչների դեմ պայքարի հարցում:

Ինչ վերաբերում է ԱՄՆ-ի կիրառած  պատժամիջոցներին 11  ընկերությունների դեմ,  վերլուծաբանի խոսքով` ԱՄՆ-ն ու իր դաշնակիցները պնդում են` պատժամիջոցները պետք է հանվեն աստիճանաբար, իսկ ավելի կոնկրետ` քիչ  զիջումներով  կորզել  շատ բան:

ՍՈՆԱ ԴԱՎԹՅԱՆ