ԼԱՐԻՍԱ ԱԼԱՎԵՐԴՅԱՆԸ` ԿԱՐԵՆ ԱՆԴՐԵԱՍՅԱՆԻ ՀՐԱԺԱՐԱԿԱՆԻ ՄԱՍԻՆ. «ԻՄ ՌԵՅՏՆԻՆԳԸ ՀԱՍԵԼ ԷՐ ԵՐԿԻՆՔ»

ԼԱՐԻՍԱ ԱԼԱՎԵՐԴՅԱՆԸ` ԿԱՐԵՆ ԱՆԴՐԵԱՍՅԱՆԻ

ՀՐԱԺԱՐԱԿԱՆԻ ՄԱՍԻՆ. «ԻՄ ՌԵՅՏՆԻՆԳԸ ՀԱՍԵԼ ԷՐ

ԵՐԿԻՆՔ»

Մարդու իրավունքների առաջին   պաշտպան Լարիսա Ալավերդյանը, «Իրավունք»-ի հետ զրույցում անդրադառնալով Կարեն Անդրեասյանի հրաժարականին, ասաց, մեր իշխանությունը մարդու իրավունքների երրորդ պաշտպանի համար  դրսեւորեց ոչ համարժեք վերաբերմունք: «Բայց ես հրաժարականին լավ չեմ վերաբերվում: Կարեն Անդրեասյանը պետք է աշխատեր  մինչեւ իր պաշտոնավարման ավարտը»,- ասաց  տիկին Ալավերդյանը:

Լարիսա Ալավերդյանը դժվարանում է ասել` ո՞րն է  Կարեն Անդրեասյանի հրաժարականի պատճառը, սակայն հորդորում է իշխանությանը հոգեբանական ճնշում չկիրառել. «Երեք պաշտպաններին էլ հանրությանը ներկայացրել է իշխանությունը, բայց երեքի հանդեպ էլ կիրառել է հոգեբանական ճնշում»:

- Տիկին Ալավերդյան, կարծիք կա, որ  մարդու իրավունքի երեք պաշտպաններին կարծես հանրությունն ու իշխանությունը չի ընդունում:  Համաձա՞յն եք տեսակետին: Եթե այո, ի՞նչ հիմնավորմամբ:

-Ամեն մեկի մասով տարբեր պատճառներ կարող են լինել: Երբ իշխանությունն իմ հանդեպ իրականացնում էր կոպիտ հետապնդումներ, ժողովրդի վերաբերմունքը վերին աստիճանի լավ էր: Ռեյտնինգների չափում կար. իմ  ռեյտինգը հասել էր երկինք: Իշխանությունը պետք է իր մեջ ձեւավորի վերաբերմունք մարդու իրավունքների պաշտպանի ինստիտուտի հանդեպ: Այդ ինչպե՞ս է, որ երեք տարբեր մարդիկ, եւ երեքից էլ եղել են դժգոհություններ:

- Կարեն Անդրեասյանի թե՛ առաջին, թե՛ երկրորդ հայտարարությամբ այդպես էլ պարզ չդարձավ նրա հրաժարականի իրական պատճառը: Ինչո՞ւ է նա այսքան հարցեր անպատասխան թողնում:

- Ես նման հարցերի չեմ կարող պատասխանել:

- Իսկ ինչպե՞ս կգնահատեք Անդրեասյանի աշխատանքը` որպես մարդու իրավունքների առաջին պաշտպանի:

- Նա գրագետ իրավաբան է, ձեռնարկել է դրական քայլեր, հետեւողական է եղել շատ հարցերում: Հասկանալի է, որ ՄԻՊ-ը այն պաշտոնը չէ, որից գոհ լինի մեծամասնությունը: Խնդիրների մեծ մասը չի լուծվում, որի պատճառը ՄԻՊ-ը չէ:

- Չե՞ք կարծում, որ եվրոկոնվենցիան, որով առաջնորդվել են երեք պաշտպաններն էլ, գուցե մի փոքր խորթ է մեր ժողովրդին, դրա համար էլ մարդու իրավունքների պաշտպանի ինստիտուտը հանրությունը չի ընդունում:

- Կարծում եմ` եվրոկոնվենցիան ճիշտ չի ընկալվում մեր հանրության կողմից: ՄԻՊ-ից ակնկալում են ավելի շատ, քան կարող  է անել: Մնացյալը դրա հետեւանքն է:

«ԱՄՆ-Ի ՎԵՐԱԲԵՐՄՈՒՆՔԸ ԱԴՐԲԵՋԱՆԻ ՃԳՆԱԺԱՄԻ ՀԱՐՑՈՒՄ ՄԻԱՆՇԱՆԱԿ ՉԷ»

- Մի փոքր խոսենք արտաքին քաղաքական խնդիրների մասին: Ադրբեջանում  մի քանի  օր   է`բողոքի ակցիաներ են մանաթի արժեզրկման պատճառով: Դա կհանգեցնի՞ քաղաքական  ճգնաժամի:

- Ոչ, դա կնճշվի ուժային մեթոդներով, քաղաքացիներին կվախեցնեն: Չեմ կարծում, որ բողոքի ակցիաները  քաղաքական ճգնաժամի պատճառ կդառնան:

- Հնարավո՞ր է, որ բողոքի  ակցիաներն ուղղորդվում են երրորդ ուժի կողմից:

- Ոչ: Չարժե, որ ամեն անգամ երրորդ ուժ փնտրենք: Անգամ ԱՄՆ-ի վերաբերմունքը միանշանակ չէ:

- Հաշվի առնելով` իրանա-ադրբեջանական կնճռոտ հարաբերությունները` Իրանն է գուցե ուղղորդում այս բողոքի ակցիաները:

- Ոչ: Իրանը հիմա գլոբալ խնդիրներ ուներ, իսկ Ադրբեջանն այն վիճակում չէ, որ իր Իրանն իր ուշադրությունը սեւեռի այդ երկրում տիրող իրավիճակի վրա:

ՍՈՆԱ ԴԱՎԹՅԱՆ