ԵՐԲ ՊԱՀԱՆՋՈՒՄ ԵՆ ԷԼԵԿԷՆԵՐԳԻԱՅԻ 7 ՏԱՐՎԱ ՎԱՂԵՄՈՒԹՅԱՆ ՊԱՐՏՔԵՐԸՏՐԱ

Արխիվ 12-16 19 Հունվար, 2016 9:37

ԵՐԲ ՊԱՀԱՆՋՈՒՄ ԵՆ ԷԼԵԿԷՆԵՐԳԻԱՅԻ 7 ՏԱՐՎԱ ՎԱՂԵՄՈՒԹՅԱՆ ՊԱՐՏՔԵՐԸՏՐԱ

Օրերս բավականին հետաքրքիր բողոք ստացանք: ՀԷՑ-ի ինչ-որ աշխատակիցներ քաղաքացիներից պահանջել են դեռեւս 2008-2009 թվականների էլեկտրաէներգիայի վարձը, սպառնալով` հակառակ դեպքում, հոսանքն անջատել: Եվ դա Ամանորի նախաշեմին:

Թե օրենքով քանի տարվա վաղեմության պարտքերն իրավունք ունի պահանջել ՀԷՑ-ը՝ պարզեցինք «Լեւ գրուպ» փաստաբանական գրասենյակի հիմնադիր-նախագահ, փաստաբան ԼԵՎՈՆ ԲԱՂԴԱՍԱՐՅԱՆԻՑ, ով նկատեց.

- Եթե երեք տարին անցել է, եւ քաղաքացին չի վճարել էլեկտրաէներգիայի դիմաց կուտակված պարտքը, ապա երբ շահագրգիռ անձը` պարտատերը կարող է հայց ներկայացնել դատարան: Սակայն պարտապանը եւս երեք տարուց ավելի հին պարտքի դեպքում մտնում է դատական պաշտպանության: Այդ հիմքով՝ երեք տարուց ավելի վաղ ժամանակահատվածի պարտքը չեղյալ է համարվում՝ դիտվելով որպես ժամկետանց: Եթե կան քաղաքացիներ, ովքեր ցանկանում են դիմել դատական պաշտպանվածության` գումարի բռնագանձման պահանջով, ապա «Լեւ գրուպ» փաստաբանական ընկերությունն առանց վճարի, անշահախնդիր պատրաստակամ կլինի «Իրավունք» թերթի հետ համագործակցելով` ներակայացնել վերոհիշյալ քաղաքացիների շահերը:

ԲԱՅՑ ՀԷՑ-Ը ՀՍՏԱԿ ՊԱՏԱՍԽԱՆ ՉՈՒՆԻ

Փորձեցինք պարզաբանումներ խնդրել ՀԷՑ-ի մամուլի պատասխանատու ՆԱՏԱԼՅԱ ՍԱՐՋԱՆՅԱՆԻՑ, ով տվեց բավականին տարօրինակ պատասխան.

- Որպեսզի Ձեր հարցին հստակ պատասխանենք, պետք է մեզ տրամադրեք բաժանորդի տվյալները եւ հասցեն, որ կարողանանք ասել` ՀԷՑ-ն իրավունք ունի՞ պահանջել, թե` ոչ:

- Խոսքը 7 տարվա վաղեմության պարտքի մասին է, այն դեպքում, երբ 3 տարին լրանալուց հետո օրենքով իրավունք չունեք:

- Ես արդեն պատասխանեցի, պետք է մեզ ասեք բաժանորդի գոնե անուն-ազգանունը:

- Չկա ստույգ բաժանորդի ազգանուն, հարցն ընդհանրական է: Պարզապես մեզ պետք է ՀԷՑ-ի մեկնաբնությունը՝ 7 տարվա վաղեմության պարտքը կարո՞ղ եք պահանջել:

- Կարծում եմ՝ կրկնվելու կարիք չկա:

ԻԼՈՆԱ ԱԶԱՐՅԱՆ