ԲԱՌԱՑԻՈՐԵՆ ԳՈՒՆԱԳԵՂ ԴԱՐՁԱԾ ԾՆՆԴՅԱՆ ՏԱՐԵԴԱՐՁ

Արխիվ 12-16 22 Հունվար, 2016 10:29

ԲԱՌԱՑԻՈՐԵՆ ԳՈՒՆԱԳԵՂ ԴԱՐՁԱԾ ԾՆՆԴՅԱՆ ՏԱՐԵԴԱՐՁ

Փոքրիկների ծննդյան տարեդարձին նրանց ոչինչ այնպես չի ուրախացնում, ինչպես գույնզգույն ու հետաքրքիր տորթը: Բայց պարզվում է, որ ծննդյան տորթը կարող է ոչ թե ուրախացնել, այլ իսկական փորձանքի մեջ գցել փոքրիկին:

Օրերս սպառողներից մեկը` Սոնա Հակոբյանը Երեւան քաղաքի տորթերի «Կեսգիշեր» (նախկինում` «Սոնատ») մասնագիտացված խանութից իր փոքրիկի տարեդարձի առիթով գնել էր տորթ: Տարեդարձն ուրախ եւ ջերմ մթնոլորտում է անցել, մինչեւ այն պահը, երբ փոքրիկի ընկերները եւ ընտանիքի անդամները կերել են տորթը: Այդ պահին էլ ամեն բան նորմալ էր թվում, միայն թե ուտելուց հետո պարզվեց, որ բոլորի լեզուները եւ շրթունքները տորթից գունավորվել է՝ ստանալով կապույտ երանգ: Անհանգստությունն իսկական խուճապի է վերածվել, երբ երեխաների դեմքը լվացել են օճառով, սակայն գունավոր հետքերն այդպես էլ չեն մաքրվել: Ս. Հակոբյանը պատմեց, որ բոլորի ձեռքերը եւ դեմքը գունավոր նյութերից մաքրվել է միայն երկու օր անց: Բայց դրանից հետո էլ վախը մնում է. տարեդարձի մասնակիցները մտավախություն ունեն, որ տորթին տված գունանյութերը կարող են վնասել երեխաների առողջությանը:

Այսպիսով՝ «Կեսգիշեր» խանութը կարծես թե բառացիորեն է ընկալել իր իսկ «Մենք կպարգեւենք ձեզ գունավոր տարեդարձ» կարգախոսը՝ գունագեղ տեսք տալով նաեւ տարեդարձի մասնակիցներին: Եվ եթե սրան ավելացնում ենք Սոնայի ներկայացրած այն տեղեկությունը, որ տորթի վրա բացակայել է նաեւ արտադրման եւ պիտանելիության ժամկետները, պատկերը նոր միայն ամբողջական կդառնա:

Խնդրի վերաբերյալ մեկնաբանություն ստանալու համար «Իրավունքը» զրուցեց տորթերի խանութի տնօրեն Տաթեւ Պարոնյանի հետ, սակայն նրա բացատրությունը, մեղմ ասած, տարօրինակ է թվում: Մեր զրուցակցի խոսքով՝ խանութի աշխատակիցներն իրենց բոլոր հաճախորդներին գնումներից առաջ զգուշացնում են, որ գունավոր տորթերը բերանը գունավորում են. «Պետք չէ անհանգստանալ, երբ փոքրիկի լեզուն տորթից գունավորվել է, այստեղ վտանգավոր բան չկա: Այդ գունանյութերը քիմիայից չեն, որ վտանագավոր լինեն: Մենք դրանք ձեռք ենք բերում մասնագիտացված խանութներից, այնպես որ պետք չէ աղմուկ բարձրացնել»: Երեւի խանութի աշխատակիցները մոռացել են իրենց հաճախորդներին հիշեցնել նաեւ, որ վաճառվող տորթի արտադրության ժամկետը պահվում է խիստ գաղտնի: Չնայած ինչո՞ւ ասեն, երբ հայաստանյան գրեթե բոլոր նման վաճառակետերում էլ խմորեղեններիը միշտ «հենց նոր» են վառարանից հանվել:

Ոչ քիմիական գունավորող նյութ. սա, թերեւս, իսկական «հրաշք» է, որին, երեւի, կարելի է միայն Հայաստանում հանդիպել: Բայց, եթե այդ մասին Սոնային խանութում զգուշացրած լինեին եւ նա դրանից հետո համաձայնվեր այդ տորթը գնել, ապա հազիվ թե այդ տորթն ուտողները խուճապի, երկօրյա վախի եւ անհանգստության մեջ հայտնվեին՝ իմանալով, որ այդ գունավորումը նորմալ է, այդպես էլ նախատեսված էր: Իսկ թե որքանով են տարբեր գունանյութերը` վտանգավոր կամ անվտանգ, փորձեցինք պարզել սննդաբան, դիետոլոգ Վարդանուշ Պետրոսյանից: Եվ ահա, նրա խոսքով՝ սննդամթերքի մեջ թույլատրվում է օգտագործել ներկանյութեր, սակայն դրանք վտանգավոր են: Կան կայունացուցիչներ, ներկեր, հոտավետիչներ, որոնք չեն կարող երկար ժամանակ մնալ սննդամթերքում. «Հատկապես փոքրիկների դեպքում խորհուրդ չեմ տալիս դրանք օգտագործել: Նրանց սննդակարգում դրանք պետք է բացառել, քանի որ հնարավոր է գունանյութերից առաջանան տարբեր մեծ ու փոքր վտանգներ` սկսած ալերգիկ ռեակցիաներից մինչեւ մաշկային խնդիրներ: Բոլոր գունանյութերը չէ, որ պետք է օգտագործեն սննդի մեջ: Այս դեպքում, եթե ներկն այդքան ժամանակ մնացել է երեխայի լեզվի վրա, ուրեմն ամեն ինչի վրա էլ այդպես կմնա»,- փաստեց սննդաբանը՝ ծնողներին հորդորելով արհեստական գունավորիչներով տորթեր չգնել:

Նշենք, որ դեպքի առիթով ԳՆ Սննդամթերքի անվտանգության պետական ծառայության կողմից խանութում իրականցվում է դիտարկում. «Մեզ մոտ է այդ տորթի նմուշը: Կփորձենք պարզել՝ այն վտանագավո՞ր է, թե պարզապես ներկանյութ է»,- «Իրավունքի» հետ զրույցում տեղեկացրեց ծառայության մամլո խոսնակ Նվարդ Առաքելյանը:

ԶՎԱՐԹ ԽԱՉԱՏՐՅԱՆ