ՀՈԲԵԼՅԱՆՆԵՐԻՆ ԱՆԴՐԱԴԱՌՆԱԼԸ ՄԻԱՅՆ ՆԱԽԱՐԱՐՈՒԹՅԱՆ ԳՈՐԾԸ ՉԷ

ՀՈԲԵԼՅԱՆՆԵՐԻՆ ԱՆԴՐԱԴԱՌՆԱԼԸ ՄԻԱՅՆ ՆԱԽԱՐԱՐՈՒԹՅԱՆ ԳՈՐԾԸ ՉԷ

ՀՀ մշակույթի նախարարությունում մինչեւ սույն թվականի փետրվարի 15-ը բոլոր ստեղծագործական միություններից ստացված առաջարկությունները կամփոփվեն, եւ հայտնի կդառնա, թե այս տարվա հոբելյաններից որոնք կնշվեն ու ինչպիսի հանդիսավորությամբ: Այս մասին փորձեցինք մանրամասներ պարզել մշակույթի նախարարի տեղակալ ԱՐԹՈՒՐ ՊՈՂՈՍՅԱՆԻՑ, ով նախեւառաջ նշեց իր անձնական մոտեցումը.

-Հոբելյանները նշելը մեր գործունեության ուղղություններից մեկն է, եւ, ըստ իս, իհարկե, պետք է անդրադառնալ եւ հանրահռչակել մեր մեծերին, սա նաեւ մեր պարտքն է: Բայց ավելի շատ հոբելյաններին անդրադառնալիս` պետք է փորձենք մնայուն բաներ ստեղծել: Երեկոներ կազմակերպելը շատ լավ է, հանրահռչակում է այդ մարդու կենսագրությունը, նրա կատարած աշխատանքը, հավաքվում ենք, հիշում, բայց ավելի լավ է տվյալ գործչի մասին փորձենք գիրք հրատարակել, սկավառակներ թողարկել, ստեղծագործություններից մեկը տպագրել եւ այլն:Մի այսպիսի մոտեցում կա. վերջին տարիներին դիմում են` այս կամ այն արվեստագետի հոբելյանը նշելու համար անհատներ, բարեկամներ, հարազատներ, միություններ եւ տպավորություն է ստեղծվում, թե հոբելյաններին անդրադառնալը եւ կազմակերպելը միայն նախարարության գործն է: Իհարկե, նախարարությունն ունի պարտավորություն, բայց այս գործունեությամբ ակտիվ զբաղվելը բերել է նրան, որ շատ ստեղծագործական միություններ միայն կարող են ֆիքսել, թե այս տարի ունենք այս հոբելյանները եւ ներկայացնել նախարարությանը` առանց կոնկրետ առաջարկների, առանց իրենց գործունեության մեջ դա ներառելու: Սա բացասական տենդենց է, եւ մենք փորձում ենք այնպես անել, որ հոբելյաններ նշելու առաջարկություններ ներկայացնողներից պարտադիր ստանանք նաեւ իրենց առաջարկները:

- Ո՞րն է նախարարության որդեգրած քաղաքականությունն այս հարցում, որովհետեւ, եթե, օրինակ, նշվում է այսինչ արվեստագետի 60-ամյակը, բայց չի նշվում 65-ը, կրկին թիրախում է հայտնվում նախարարությունը:

- Ընդհանրապես, մենք ներքին իրավական ակտ էինք ստեղծել, որ հոբելյանը 25-ականներն են, այսինքն` 50-ից բարձր տարիք ունեցողներին` գումարած 25-ներով էինք առաջ շարժվում: Բայց հետո տեսանք, որ կան մեծեր, որոնց, այսպես ասած, բոլոր «կլոր» ամյակները նշելու հանրային պահանջ կա: Իսկ ժողովուրդը «կլոր» ամյակ ասելով` հասկանում է գումարած 5: Այնպես որ, սա տարբերակված մոտեցում է, այլ` ոչ օրենք կամ իրավական ակտ: Նշել-չնշելը որոշվում է տվյալ անձի ունեցած ավանդով, հասարակական պահանջով, այն նախաձեռնություններով, որը ցուցաբերվում է: Իհարկե, հենց տարվա սկզբին ունենում ենք բոլոր 5-ով կամ զրոյով ավարտվող 70-ից բարձր տարիք ունեցող մշակութային գործիչների անունների ցանկը, որն ի մի ենք բերում ու լուրջ քննարկումներ ծավալում դրա շուրջ:

- Որքանո՞վ է հաջողվում ողջ ցանկը մեկ տարում հասցնել իրականացնել:

- Իհարկե, ամբողջ պլանավորած ցանկը կարող է այնպես ստացվել, որ չիրականանա, որովհետեւ նախաձեռնողները, թեպետ ներկայացնելիս շատ ակտիվ են, բայց իրականացնելիս օբյեկտիվ կամ սուբյեկտիվ խնդիրներ են ունենում: Սակայն, նախարարությունը բոլոր նախաձեռնությունների հետ բանակցում է եւ բոլորի հետ այն նշելու ձեւաչափ է ընտրում: Նախորդ տարվա հոբելյաններն այնքան շատ են, որ այդքանը անգիր թվարկել կդժվարանամ, բայց կարող եմ ասել, որ մենք անդրադարձել ենք մոտ 42 հոբելյանի, որի շրջանակում 50-ից ավելի միջոցառումներ ենք իրականացրել` երեկոներ, համերգներ, ներկայացումներ, փառատոններ, շնորհանդեսներ, 21 հեռուստահաղորդում է եղել տարվա հոբելյանների մասին, ինչպես նաեւ հատուկ ֆիլմեր, հեռուստաեթերներ: Տպագրվել է 28 գիրք, որից 5-ը նոտաներ, 23-ը` ուղղակի նվիրված այդ մարդկանց: Եվ սա ես նշում եմ առանց Ցեղասպանության 100-րդ տարելիցի միջոցառումների, եթե դա էլ փորձեմ գումարել շատ մեծ քանակություն կլինի, որովհետեւ ընդհանուր առմամբ`  տարելիցները եւ հոբելյանները միեւնույն ցանկի տակ է նշվում:

ՀՐԱՆՏ ՍԱՐԱՖՅԱՆ