ՎԱԼԵՐԻ ՊԵՐՄՅԱԿՈՎԸ ԻՐԵՆ ՄԵՂԱՎՈՐ Է ՃԱՆԱՉՈՒՄ ԱՄԵՆ ԻՆՉՈՒՄ

ՎԱԼԵՐԻ ՊԵՐՄՅԱԿՈՎԸ ԻՐԵՆ ՄԵՂԱՎՈՐ Է ՃԱՆԱՉՈՒՄ

ԱՄԵՆ ԻՆՉՈՒՄ

Հունվարի 22-ին Գյումրիի ռուսական կայազորային դատարանում շարունակվեց Վ. Պերմյակովի դատավարությունը: Երրորդ դատալսումը նույնպես 30 րոպե ուշացումով սկսվեց: Նիստը մեկնարկեց միջնորդությամբ: Տուժողների իրավահաջորդների ներկայացուցիչները միջնորդեցին տրամադրել ռուսական կողմի մոտ գտնվող քրեական գործի փաստաթղթերը; Փաստաբաններին հետաքրքրում էր՝ արդյոք այլ քրեական գործեր հարուցվել են, թե ոչ, նկատի ունենալով Պերմյակովի առողջական խնդիրները՝ արդյոք Պերմյակովն ապօրինաբար բանակ չի զորակոչվել : Միջնորդությունը չառարկեցին ոչ դատախազը, ոչ ամբաստանյալը: Դատավոր Հարություն Մովսիսյանը որոշեց միջնորդության քննարկումը հետաձգել՝ պատճառաբանելով, թե գործի ուսումնասիրելու համար գործի քննությանը վերաբերող ավելի լուրջ հանգամանքներ կան: Դատարանի որոշումից դժգոհեցին տուժողների իրավահաջորդները: Սպանված Հասմիկ Ավետիսյանի քույր Ռիտա Պետրոսյանն անգամ տեղից բղավեց. «Ամեն անգամ մեր միջնորդությունները մերժում եք, էսի եղավ ձև»: Դատավորը խիստ արձագանքեց. «Բան ունես ասելու, ոտքի կանգնի»: «Հա ունեմ, եթե մեզ չեք բավարարելու, դատը մի վարեք»,-ըմբոստացավ Ռիտա Պետրոսյանը: Դատական նիստը շարունակվեց:

Ընթերցվեց մեղադրական եզրակացությունը: Վալերի Պերմյակովը դատարանին հայտնեց՝ համաձայն է մեղադրանքի հետ, իրեն մեղավոր է ճանաչում ամեն ինչում: Մեղադրողը միջնորդեց լսել տուժողի իրավահաջորդներին, վկաներին, հրապարակել գործում առկա փաստաթղթերը, այնուհետեւ հարցաքննել ամբաստանյալին: Լուսինե Սահակյանը հանդես եկավ միջնորդությամբ՝ վկաներին դուրս հրավիրել դահլիճից և պայմաններ ապահովել, որպեսզի դադարեցվի ձայնի հեռարձակումը ուղիղ եթերում: Միջնորդությունը բավարարվեց: Առաջինը վկայությամբ հանդես եկավ Ռիտա Պետրոսյանը, ով պատմեց դեպքի օրը իրեն հայտնի մանրամասները: «11-ի երեկոյան Հասմիկ Ավետիսյանը և երեխան մեր տանն էին: Հաջորդ օրը առավոտյան հարսիս պիտի տանեի հիվանդանոց տղայիս հետ: Հագնվա, մի ներքին ձայն ինձ հուշեց, որ չգնամ հետները: Ասեցի գնամ քրոջս հետ սուրճ խմեմ: Տան հագուստով էի, նույնիսկ հեռախոս չէի վերցրել հետս: Սովորականի պես ֆռցրել եմ փականը, դուռը բացել եմ: Առաջինը տեսա, որ ապակին չկար: Հունվարի 7-ին՝ մորս մահվան օրը, նոր դուռ էին գնել, մտածեցի՝ տաք եղանակ է, որոշել են էսօր փոխել: Երբ բացեցի դուռը մտա, սառնություն զգացի, երեխաների ձայնը չլսեցի, զարմանալիորեն առաջ գնացի, զալի դուռը բացելուն պես Աիդայիս տեսա էդ վիճակին, ես մտածեցի գազ է տրաքել, որ մանավանդ ապակիներն էլ չկար: Առաջ վազեցի, հաջորդ սենյակում քույրս էր ամուսնու հետ, Արաքսիաս տեղի մեջ էր: Ես ինձ կորցրեցի ու Սերյոժային չփնտրեցի»: Այս խոսքերից հետո ընթացքում կտրուկ վատացավ Ավետիսյանների դստեր՝ Լուսինեի ինքնազգացողությունը Բժշկական միջամտությունից հետո նրան ստիպված եղան դահլիճից դուրս տանել:Դատական նիստը մոտ 20 րոպե ընդմիջվեց, որից հետո Ռիտա Պետրոսյանը շարունակեց պատմել՝ նկարագրելով սպանության օրվա ահասարսուռ տեսարանները: «Սաղ էս կողմ, էն կողմ կվազեին, հարևանները գիտեին, բայց բան չէին ասում»,-լացակումած ավելացրեց վկան:

3 ժամ տևած դատական նիստը հետաձգվեց, քանի որ տուժողների իրավահաջորդներն, ովքեր որպես վկա պետք է հանդես գային, ի վիճակի չէին: Հաջորդ նիստը նշանակվեց հունվարի 29-ին ժամը 12:00-ին: