Արամ Թորգոմյան. «ԻՆՉ ԼԻՆԵԼՈՒ Է, ԿԼԻՆԻ ԱՌԱՆՑ ԱՂԻ ԲԼԻԹ ՈՒՏԵԼՈՒ ԷԼ»

Արամ Թորգոմյան. «ԻՆՉ ԼԻՆԵԼՈՒ Է, ԿԼԻՆԻ ԱՌԱՆՑ ԱՂԻ ԲԼԻԹ ՈՒՏԵԼՈՒ ԷԼ»

Մինչ սիրո բարեխոս Սուրբ Սարգսի տոնի առթիվ իրարանցում է տիրում երիտասարդների շրջանում, եւ շատերը հույս ունեն աղի բլիթ ուտելով` երազում տեսնել իրենց ցանկալի ասպետին կամ դիցուհուն, «Իրավունքը» զրուցեց մոդել, դերասան ԱՐԱՄ ԹՈՐԳՈՄՅԱՆԻ հետ` բացահայտելով նրա ռոմանտիկ կերպարն ու որոշ մանրամասներ պարզելով առաջիկա ծրագրերից:

-Արամ, որքանո՞վ է քեզ համար առանձնանում Սիրահարների տոնը:

- Ինձ համար սովորական օր է, իսկ տոնն առանձնանում է նրանով, որ դրսում ավելի շատ ես հանդիպում ժպտացող մարդկանց:

- Համարո՞ւմ ես քեզ ռոմանտիկ անձնավորություն:

- Եթե անկեղծ, երբ սիրում ես, ուզած-չուզած դառնում ես ռոմանտիկ ու սկսում ռոմանտիկ քայլեր անել, հետեւաբար ես էլ բացառություն չեմ:

- «Իրավունքի» հետ նախորդ զրույցում նշել էիր, որ ազատ է սիրտդ, որովհետեւ չես գտել այնպիսի մարդու, ով կարող է հարմարվել բնավորությանդ: Հետաքրքիր է` այսօր է՞լ է ազատ Արամ Թորգոմյանի սիրտը եւ ի՞նչ է փոխվել բնավորության մեջ:

- Բնավորությունս անփոփոխ է, իսկ անձնականս փակ է բոլորի համար: Չեմ ցանկանում խոսել անձնականի մասին:

- Այնուամենայնիվ, պատրաստվո՞ւմ ես տոնի առթիվ անակնկալ մատուցել որեւէ աղջկա:

-Այո, պատրաստվում եմ, բայց չակերտները չեմ ուզում բացել:

- Ընդհանրապես, ի՞նչ խենթությունների ես պատրաստ հանուն սիրելիի:

- Բացի բնավորությունս փոխելուց, գրեթե ամեն ինչի:

- Գաղտնիք չէ, որ երկրպագուհիների մեծ բանակ ունես, կհիշե՞ս ամենաանհավանական սիրո խոստովանությունը, որը ստացել ես ֆեյսբուքյան նամակով կամ իրական կյանքում:

- Մի աղջկա կողմից ստացել եմ 450 սիրո խոստովանություն` հաղորդագրություն տեսքով, բայց նամակները մնացին անպատասխան, որովհետեւ վերջում բլոկ (արգելափակել) էր արել: Ուղղակի, նա ինձնից պատասխան չէր ակնկալում, այլ, պարզապես, բարձրաձայն երազում էր նամակներով:

- Իսկ ինչպե՞ս ես վերաբերում, երբ աղջիկն է առաջին քայլն անում:

- Նորմալ, որովհետեւ ամեն մարդ ազատ է խոսելու, արտահայտելու այն, ինչ իր մեջ կուտակված է:

-Շատ երիտասարդներ իրենց երկրորդ կեսին տեսնելու հույսով` աղի բլիթ են ուտում, դու է՞լ ես նրանց թվում:

- Երբեք չեմ փորձել, ինչ լինելու է, կլինի առանց աղի բլիթ ուտելու էլ:

- Նախորդ տարին բավական բուռն էր քեզ համար` ստեղծագործական իմաստով` թե՛ որպես դերասան, թե՛ որպես մոդել: Ի՞նչ նորություններով կրկին կհիշեցնես քո մասին երկրպագուհիներիդ:

- Նորություններ շատ կլինեն: Հիմա արդեն սկսել ենք նոր աշխատանքներ տանել, կլինեն տարբեր հետաքրքիր նախագծեր, որոնք հուսամ` բոլորին կհետաքրքրի:

- Քանի որ օրը տոնական է, ի՞նչ կմաղթես սիրահարներին եւ նրանց, ովքեր դեռ չեն գտել իրենց երկրորդ կեսին:

- Սիրեք եւ սիրվեք, Աստված թող լինի բոլոր սիրող սրտերի հետ: Իսկ ովքեր չեն գտել իրենց երկրորդ կեսին, դա ընդամենը ժամանակի հարց է, սպասե՛ք…

ՀՐԱՆՏ ՍԱՐԱՖՅԱՆ