Թե ինչպես ու ում շնորհիվ խորհրդային «Բարեկամության» այգին վերանվանվեց «Սիրահարների այգի»

ԹԵ ԻՆՉՊԵՍ ՈՒ ՈՒՄ ՇՆՈՐՀԻՎ ԽՈՐՀՐԴԱՅԻՆ «ԲԱՐԵԿԱՄՈՒԹՅԱՆ» ԱՅԳԻՆ ՎԵՐԱՆՎԱՆՎԵՑ

«ՍԻՐԱՀԱՐՆԵՐԻ ԱՅԳԻ»

Երեւանի Սիրահարների այգին, որը 2007 թվականին վերակառուցվեց ու դարձավ առաջին եւ միակ ճապոնական այգին Հայաստանում (այն իրականացվել է շվեյցարաբնակ լանդշաֆտային ճարտարապետ, ճապոնական եւ արևելյան պարտեզների մասին բազմաթիվ աշխատությունների հեղինակ Պիեռ Ռամբախի կողմից), գոյություն է ունեցել դեռեւս 18-րդ դարից, սակայն այն ժամանակ կոչվել է «Կոզեռնի այգիներ»: Ի դեպ, հենց այդ ժամանակ էլ տնկվել են այգու ծառերի մեծ մասը: Իսկ 1949 թվականին` ռուս բանաստեղծ Ալեքսանդր Պուշկինի ծննդյան 150 ամյակի առթիվ, այգին անվանվում է «Պուշկինի այգի»: Բայց 21 տարի անց` 1970 թվականին, այգին եւ նրան կից պողոտան (այժմյան եւ նախկինում էլ Մարշալ Բաղրամյան) վերանվանվում է «Բարեկամության»` խորհրդային ժողովուրդների եղբայրությունն ընդգծելու համար։

Ի վերջո, Հայաստանի անկախությունից հետո, 1995 թվականին Երեւանի պատգամավորների խորհրդի որոշմամբ` այգին վերանվանվում է Երեւանի «Սիրահարների այգի»։ Իսկ թե ինչո՞ւ հենց «Սիրահարների այգի», պարզաբանում է այգու անվանման հեղինակը` ՀՀ գրողների միության անդամ, բանաստեղծ, հրապարակախոս ՌՈՒԶԱՆ ԱՍԱՏՐՅԱՆԸ. «Ուզում էի մի անուն տալ այգուն, որը տարբերվեր մինչ այդ առաջարկված անուններից: Երեւան քաղաքի «Անվանակոչությունների հանձնաժողովի» անդամ էի, շատ առաջարկներ եղան, բայց հանձնաժողովի նախագահ Գեւորգ Վարդանյանն անվերջ մերժում էր: Կասկածելով, որ իմ առաջարկն էլ կմերժվի, այնուամենայնիվ, քաջություն ունեցա առաջարկել` ասելով, որ աշխատավայրիս դիմացն է, ամեն օր սիրող զույգեր եմ տեսնում այգում, եկեք սիրով լցնենք մեր քաղաքը: Մութ ու ցուրտ օրերի դահլիճը լցվեց ժպիտներով, ոչ ոք չէր հավատում, որ առաջարկս կանցնի եւ` ի զարմանք ներկաների, Վարդանյանն ասաց. «Այս մեկն էլ թող Ռուզանի ասածով լինի»: Շնորհակալ եմ, սիրելի պրոֆեսորին», - ընդգծել է տիկին Ասատրյանն ու դիմել երիտասարդներին. «Իսկ ձեզ` մեր կյանքի ծաղիկներ, անսպառ սեր ու երջանկություն եմ մաղթում, թող հայոց գենը սերնդի պակաս չունենա, այգին թող հավերժ փայփայի Ձեր սերը…»:

ՀՐԱՆՏ ՍԱՐԱՖՅԱՆ