Լ.ԲԱՂԴԱՍԱՐՅԱՆ. «ՈՒԼԻՍԻ» ՄԱՐԶԻՉԸ ԿԱՇԱՌՔ ՉԻ ՎԵՐՑՐԵԼ, ՉԻ ՏՎԵԼ, ԽԱՂՆ ԷԼ ՉԻ ԾԱԽԵԼ

Լ.ԲԱՂԴԱՍԱՐՅԱՆ. «ՈՒԼԻՍԻ» ՄԱՐԶԻՉԸ ԿԱՇԱՌՔ ՉԻ ՎԵՐՑՐԵԼ, ՉԻ ՏՎԵԼ, ԽԱՂՆ ԷԼ ՉԻ ԾԱԽԵԼ

ԱԱԾ կողմից քննվող քրեական գործի շրջանակներում կալանավորված Երեւանի «Ուլիս» ֆուտբոլային ակումբի գլխավոր մարզիչ Գագիկ Սիմոնյանի փաստաբան՝«Լեվ գրուպ» իրավաբանական ընկերության նախագահ Լեւոն Բաղդասարյանը հունվարի 23-ին «Ազդակ» լրագրողական ակումբում կայացած մամուլի ասուլիսի ժամանակ լրագրողների հետ խոսեց իր պաշտպանյալի մասին. «Տեղեկացնեմ, որ այնքանով, որքանով տիրապետում եմ քրեական գործի նյութերին իմ պաշտպանյալի մասով, կարծում եմ, որ իմ պաշտպանյալը չի կատարել այնպիսի արարք, որ նախատեսված է ՀՀ քրեական օրենսգրքով: Դրված է հոդված կաշառք վերցնելու եւ խաղը ծախելու, իմ պաշտպանյալը կաշառք չի վերցրել, կաշառք չի տվել, խաղն էլ չի ծախել»: Լեւոն Բաղդասարյանը նաեւ նշեց, որ իր պաշտպանյալը վերջին խաղի շրջանակներում խաղադրույք չի կատարել.«Չնայած դա գործի հետ կապ չունի, բայց եթե մենք դիտարկում ենք՝ նա կամ իր անունից հորդորած երրորդ անձը խաղադրույք կատարել է, թե ոչ, վերջինիս անունից հայտարարում եմ, որ ոչ»: Իսկ այն հարցին թե ինչ վերաբերմունք ունեն այս ամենի նկատմամբ ակումբի ֆուտբոլիստներն ու մյուս անդամները պարոն Բաղդասարյանը պատասխանեց. «Ես ակումբի անունից չեմ կարող հայտարարություն անել, որովհետեւ չունեմ լիազորություն: Ես դժվարանում եմ ասել թե ակումբի այլ անդամներ ի՞նչ գործառույթներ են իրականացրել տվյալ քրեական գործի հետ կապված եւ նախաքննությունն ինչ գնահատական կտա: Ես ընդամենը կարող եմ ասել իմ պաշտպանյալի հետ կապված, բացառապես իմ պաշտպանյալի հայտարարությունից ելնելով, որ նա չի կատարել արարք, որը նախատեսված է ոչ միայն այն հոդվածով, որն իրեն առաջադրվել է այլեւ՝ որեւէ արարք նախատեսված ՀՀ քրեական օրենսգրքով: Բայց ակումբի այլ անդամներ որեւէ բան արել են թե ոչ դժվարանում եմ ասել»: Իսկ «Իրավունքի» հարցին թե այդ դեպքում ինչի՞ արդյունքում է Գագիկ Սիմոնյանի անունը հայտնվել այս սկանդալի կենտրոնում Լեւոն Բաղդասարյանը նշեց. «Եկեք չշտապենք, գնում է նախաքննություն, եւ նախաքննության ընթացքում վստահ եմ՝ շատ հարցերի պատասխաններ կտրվեն»:

Հիշեցնենք, որ ՀՀ ԱԱԾ տարածած հաղորդագրության համաձայն՝ 2015 թ. նոյեմբերին Երեւանի «Ուլիս » ֆուտբոլային ակումբի գլխավոր մարզիչ Գագիկ Սիմոնյանը, ֆուտբոլիստ (պաշտպան) Հայկ Հունանյանը, «Ուլիս 2» ակումբի ադմինիստրատոր Արա Ազարյանը եւ մարզչի օգնական Ռուբեն Առուշանյանը հանցավոր համաձայնությամբ, «Տոտո» բուքմեյքերական գրասենյակի աշխատակցի միջոցով, կատարել են 1000-3000 դոլար խաղադրույքներ եւ ապահովելով խաղերի կանխատեսելի արդյունքները, ստացել են ապօրինի շահույթ, որը համապատասխան մասնաբաժիններով բաշխվել է վերը նշված անձանց եւ առաձին ֆուտբոլիստների միջեւ:

ՔՐԻՍՏԻՆԵ ՊԵՏՐՈՍՅԱՆ