ԱՐՏԱԿ ՇԱԲՈՅԱՆԻ ՏԱՐԱԾԱԾ ՀԱՅՏԱՐԱՐՈՒԹՅՈՒՆԸ ՉԻ ՀԱՄԱՊԱՏԱՍԽԱՆՈՒՄ ԻՐԱԿԱՆՈՒԹՅԱՆԸ

ԱՐՏԱԿ ՇԱԲՈՅԱՆԻ ՏԱՐԱԾԱԾ ՀԱՅՏԱՐԱՐՈՒԹՅՈՒՆԸ ՉԻ ՀԱՄԱՊԱՏԱՍԽԱՆՈՒՄ ԻՐԱԿԱՆՈՒԹՅԱՆԸ

Այն հայտարարությունները, թե ալյուրի գինը 30 տոկոսով նվազել է` չի համապատասխանում իրականությանը: Նման եզրահանգման է եկել «Սպառողների խորհրդատվության կենտրոն» հասարակական կազմակերպության նախագահ ԿԱՐԵՆ ՉԻԼԻՆԳԱՐՅԱՆԸ, ով ալյուրի շուկայում կատարել է ուսումնասիրություններ.«Ալյուրի գնանկում տեղի ունեցել է, բայց ոչ թե 30, այլ 5-10 տոկոսով: Հարց է առաջանում, թե որտեղից են հորինել 30 տոկոս գնանկումը, մեր հանրապետություն 30 տոկոս գնակում գոյություն չունի»,-լրագրողների հետ հանդիպման ժամանակ տեղեկացրեց Կ. Չիլինգարյանը: Կատարված ուսումնասիրություններից հետո «Սպառողների խորհրդատվության կենտրոն» հասարական կազմակերպության նախագահն արդեն դիմել է Տնտեսական մրցակցության  պաշտպանության պետական հանձնաժողովին`հասկանալու համար, թե ինչ ուսումնասիրության հիման վրա են հայտարարել, որ ալյուրը 30 տոկոսով էժանացել է:

Ըստ նրա, եթե ալյուրի գինը 30 տոկոսով չի նվազել, ապա հացի գինը բնականաբար չի կարող նվազել: Դրան զուգահեռ Հայաստանի հացի շուկայում երկար տարիներ չի լուծվում վաճառվող հացի քաշի եւ որակի խնդիրը.«Ճիշտ է, շուկան մեզ մոտ ազատականացված է, որոշ առումով սա առավելություն է, սակայն բերել է նրան, որ ցանկացած վայրում հաց են արտադրում եւ հանում շուկա: Այսօր արտադրամասից հացը վատ պայմաններում են տեղափոխում խանութ: Այս ամենը չի վերահսկվում»,-փաստեց Կարեն Չիլինգարյանը:

Հացաբուլկեղենի շուկայում նույնպես գներն անփոփոխ են: Կ. Չիլինգարյանի բնորոշմամբ, Հայաստանում ապարնքների գները շատ դանդաղ են նվազում, իսկ թանկացումները լինում են միանգամից: Որպես օրինակ բանախոսը բերեց համաշխարհային շուկայում նավթի գների անկումը, ինչը չի ազդում Հայաստանի նավթի շուկայի վրա:

ԶՎԱՐԹ ԽԱՉԱՏՐՅԱՆ