«2015Թ.-ԻՆ ԱՐՁԱՆԱԳՐՎԵԼ Է ԱՐՏԱԳԱՂԹԻ ՏԵՄՊԵՐԻ ՄԻ ՓՈՔՐ ԱՃ»

Արխիվ 12-16 27 Հունվար, 2016 11:16

«2015Թ.-ԻՆ ԱՐՁԱՆԱԳՐՎԵԼ Է ԱՐՏԱԳԱՂԹԻ ՏԵՄՊԵՐԻ ՄԻ ՓՈՔՐ ԱՃ»

«Իրավունքի» զրուցակիցն է ՀՀ տարածքային կառավարման եւ արտակարգ իրավիճակների նախարարության միգրացիոն պետական ծառայության պետ ԳԱԳԻԿ ԵԳԱՆՅԱՆԸ, ում հետ փորձեցինք զրուցել 2015 թվականի միգրացիոն տեղաշարժի, ՌԴ մուտքի արգելանքի վերացմանն ուղղված աշխատանքների եւ ներկայիս իրավիճակի վերաբերյալ:-Հասցրե՞լ եք ամփոփել տարին, ինչպիսին է իրավիճակը միգրացիոն տեղաշարժի առումով:

- Պետք է ասեմ, որ համեմատած նախորդ տարվա, 2015 թվականին արձանագրվել է արտագաղթի տեմպերի մի փոքր աճ, բայց թե ինչով է պայմանավորված` դեռ վերջնական ասել չենք կարող: Պետք է սպասենք մինչեւ ամսվա վերջ, երբ ԱՎԾ-ն էլ կհրապարակի իր տվյալները: Սա ընդամենը` սահմանահատումների թվի վրա հիմնված նման եզրահանգում է, եւ այս պահին խոսել արտագաղթի տեմպերի ավելացման պատճառների մասին, այդքան էլ ճիշտ չէ: Ինչպես գիտեք՝ ՌԴ-ի կիրառած մուտքի արգելանքներից հետո, 2014թ.-ին բավական թվով մարդիկ չէին կարողանում լքել երկիրը: Այսինքն՝ այս գործոնն ինչ-որ տեղ պետք է դանդաղեցներ արտահոսքի տեմպը, բայց, փաստորեն դա էլ չի խանգարել: Եթե արտահոսքը պակասեր, կարող էինք ասել, որ դա է պատճառը, բայց հիմա դժվարանում եմ ասել:

- Անդրադառնանք նաեւ ՌԴ մուտքի արգելանքներին: Դեռ շարունակվո՞ւմ է «դեպորտները» չեղյալ համարելու դիմումների հոսքը:

- Այո, ինչպես անցած տարի, այնպես էլ այս տարի շարունակում ենք ՌԴ մուտքի արգելանքի վերացման համար դիմումներ ստանալ: Այս տարի արդեն հասցրել ենք ստանալ բավական թվով դիմումներ, արդեն մի քանի փաթեթ ուղարկել ենք ՌԴ՝ մուտքի արգելանքը վերացնելու առաջարկով: Այսպես ասեմ՝ ՌԴ մուտքի արգելանքը վերացնելու խնդիրը դեռ առկա է. քաղաքացիները շարունակում են պարբերաբար բախվել այդ խնդրին:

- Այս տարի արդեն քանի՞ դիմում եք հասցրել ստանալ:

- Այս տարի արդեն հասցրել ենք ստանալ 137 դիմում, որից 106-ը արդեն ուղարկել ենք վերանայման:

- Կա՞ն դիմումներ, որ առհասարակ դրական լուծում չեն ստանում:

- Այո, իհարկե: Եթե քաղաքացին ունենում է արտաքսման հետ կապված դատական որոշում, դա արդեն հաստատ մերժված դիմում է: Եվ շատ են դեպքերը, երբ քաղաքացիները չեն ասում, որ կա դատարանի որոշումը, բայց եթե ազնվորեն ասում են, մենք գործերն անիմաստ տեղը ՌԴ չենք ուղարկում` փոխարենը խորհուրդ տալով, որ տվյալ քաղաքացու լիազորված անձը ՌԴ-ում դիմի դատարան՝ որոշումը բեկանելու խնդրանքով:

- Իսկ ունե՞ք վիճակագրություն, թե որ մարզերից են առավել շատ դիմումներ ստացվում:

- Անկեղծ ասած՝ հստակ վիճակագրություն այդ առումով չունենք. բոլոր մարզերից էլ պարբերաբար դիմումներ ստանում ենք: Այս տարվա սկզբին էլ արդեն հասցրել ենք դիմումներ ստանալ Արագածոտնի, Արմավիրի, Շիրակի մարզերից: Ավելի շատ դիմումներ, ամեն դեպքում, ստանում ենք երեւի հենց Շիրակի մարզից:

- Դիմումների արձագանքը շո՞ւտ է ստացվում:

- Մեկ-երկու ամսվանից ոչ ուշ:

- Իսկ ե՞րբ խնդիրը քիչ թե շատ կլուծվի:

- Դժվարանում եմ ասել: Քաղաքացիներին միակ հորդորս է, որ օտար երկրում հայտնվելով՝ նախ ծանոթանան իրենց իրավունքներին եւ պարտականություններին, չխախտեն ՌԴ միգրացիոն օրենսդրությունը, որպեսզի հետագայում նման խնդիրների առաջ չկանգնեն:

ԻԼՈՆԱ ԱԶԱՐՅԱՆ