ՕԵԿ-ԱԿԱՆՆԵՐԻ ԼՌՈՒԹՅԱՆ ՈՒՂՏԸ ԴՈՒԲԱՅԻ ՔԵՖԵՐԻ ՄԱՍԻՆ

ՕԵԿ-ԱԿԱՆՆԵՐԻ ԼՌՈՒԹՅԱՆ ՈՒՂՏԸ ԴՈՒԲԱՅԻ ՔԵՖԵՐԻ ՄԱՍԻՆ

ՕԵԿ պատգամավոր Լեւոն Դոխոլյանից այսօր «Իրավունք»-ը կրկին հետաքրքրվեց`  ինչու է ՕԵԿ ղեկավար Արթուր Բաղդասարյանը գաղտնի պահում այն վայրը, որտեղ տեղի է ունեցել նրա որդու հարսանիքը:

Հիշեցնենք` Արթուր Բաղդասարյանն իր տված հարցազրույցում հաստատել է այն լուրը, որ բացի Երեւանից` Դուբայում եւս տեղի է ունեցել  միջոցառում: ՕԵԿ ղեկավարը, սակայն, խնամքով մինչ այժմ թաքցնում է հայաստանյան ռեստորանային համալիրի անունը:

«Ես զարմանում եմ, լրագրողական ձեր հետաքրքրության վրա»,- ժպտալով ասաց ՕԵԿ պատգամավորը, ապա շարունակեց. «Արթուր Բաղդասարյանը հարցազրույց է տվել: Ես կոռեկտ չեմ համարում այդ հարցին պատասխանել»:

Ռեստորանի անունը պետական գաղտնիք չէ, որ ՕԵԿ ղեկավարն ու ՕԵԿ պատգամավորները «հավքի իր թեւով, օձն իր պորտո» ասացվածքով առաջնորդվելով չեն հայտնում ռեստորանի անունը: «Կոռեկտությունից ելնելով: Ես, օրինակ, իմ երեխաներին կնքել եմ, սակայն չեմ ցանկանա ասել` որտեղ է եղել արարողությունը»,- ասաց հարսանիքին մասնակցած ՕԵԿ-ական պատգաավորը:

Միգուցե ռեստորանային համալիրի անվան հրապարակումը Բաղդասարյանի որդու հարսանյաց արարողությանը քաղաքական երանգավորո՞ւմ կտա: «Ոչ, ոչ: Դա ամեն մարդու անձնական գործն է: Չի ցանկանում, չի հայտնում»,- պատասխանեց օրենսդիր մարմնի անդամը:

ՍՈՆԱ ԴԱՎԹՅԱՆ