ՕՐԵՐՍ ԻՆՔՆԱՍՊԱՆ ԵՂԱԾ ԿԻՆԸ «ԿԻՍԱԲԱՑ ԼՈՒՍԱՄՈՒՏՆԵՐԻ» «ՊԱՇՏՈՆԱԹՈՂ ԷՄՄԱՆ» ԷՐ (Տեսանյութ)

ՕՐԵՐՍ ԻՆՔՆԱՍՊԱՆ ԵՂԱԾ ԿԻՆԸ «ԿԻՍԱԲԱՑ ԼՈՒՍԱՄՈՒՏՆԵՐԻ» «ՊԱՇՏՈՆԱԹՈՂ ԷՄՄԱՆ» ԷՐ (Տեսանյութ)

Օրեր առաջ Գեղարքունիքի մարզի Աստղաձոր գյուղում առաստաղի գերանից կախված վիճակում հայտնաբերվել է 34-ամյա Էմմա Նազարյանի դին: Տեղի ունեցած ինքնասպանության մասին Աստղաձորի գյուղապետ ՌՈԲԵՐՏ ԽԱՉԱՏՐՅԱՆԸ  նշել էր հետեւյալը. «Էմման 5 տարի առաջ ամուսնալուծվել էր: Դատարանի որոշմամբ` իր անչափահաս երեխաները մոր խնամքին էին տրվել, սակայն երեխաներից ոչ ոք չէր ցանկացել նրա հետ ապրել: Նրա մոտ տարօրինակություններ էին առաջացել եւ ապրում էր իր ծնողների հետ»: Մինչդեռ «Ընտանեկան բռնության» հարցերով զբաղվող տարբեր հկ-ներ խնդիրը տեղափոխել են այլ հարթություն եւ հայտարարել. «Ամուսնության 12 տարվա ընթացքում մշտապես ենթարկվելով ընտանեկան բռնության, իսկ ամուսնալուծվելուց հետո 5 տարի շարունակ ապօրինաբար զրկված լինելով սեփական երեխաներին տեսնելու, խնամելու եւ անգամ նրանց ձայնը լսելու իրավունքից՝  34-ամյա Էմմա Նազարյանը հունվարի 17-ին դիմեց ինքնասպանության: Երիտասարդ կինը դարձավ ընտանեկան բռնության, իրավական անգործության ու անտարբերության զոհ: Նրա ծնողները պնդում են, որ ինքնասպանության պատճառը տարիներ շարունակ երեք երեխաներից զրկված լինելու եւ նրանցից հեռու ապրելու կարոտն էր, չնայած որ երկու տարի առաջ դատարանի որոշմամբ 2 անչափահաս երեխան հանձնվել էին Էմմա Նազարյանի խնամակալությանը»:

Ով է ճիշտ, ով սխալ իրականում գուցե շատ երկար քննություն պահանջվեր պարզելու համար, սակայն «Իրավունքին» հայտնի է դարձել, որ Է. Նազարյանը դեռեւս 2012 թվականին իր ընտանեկան խնդիրների մասին բարձրաձայնել է «Կիսաբաց լուսամուտներ» առաջին հայկական թոք-շոուի ժամանակ: Իսկ թե ի՞նչ է պարզվել հաղորդման ընթացքում դիտեք եւ դատեք ինքներդ: Սակայն, մինչ տեսանյութը դիտելը հավելենք, որ վերոնշյալ գյուղում տարածված շշուկների համաձայն, ինքնասպան եղած կինն, իսկապես, տարօրինակություններ է ունեցել: Ավելին` վերջիններս զարմացած են, որ տեղի ունեցածը դարձել է տարբեր հկ-ների թիվ մեկ քննարկման թեման. «Էդքան մտահոգ էին, թող նախապես օգնեին, ոչ թե մեռնելուց հետո, գոնե հիմա թողնեն խեղճի հոգին խաղաղվի»:

ՀՐԱՆՏ ՍԱՐԱՖՅԱՆ