ՄԱՐՏՈՒՆ ԳՐԻԳՈՐՅԱՆԸ` ՇՆԵՐԻՆ ԿՌՎԵՑՆԵԼՈՒ ՈՒ ԻՐ ԲԱՐԵԿԵՑՈՒԹՅԱՆ ՄԱՍԻՆ. «ՊԱԽԿՎԵԼՈՒ ՊԱՏՃԱՌ ՉՈՒՆԵՄ»

ՊԱՏԳԱՄԱՎՈՐԸ` ՇՆԵՐԻՆ ԿՌՎԵՑՆԵԼՈՒ ՈՒ ԻՐ

ԲԱՐԵԿԵՑՈՒԹՅԱՆ ՄԱՍԻՆ. «ՊԱԽԿՎԵԼՈՒ ՊԱՏՃԱՌ ՉՈՒՆԵՄ»

Գյումրեցի պատգամավոր Մարտուն Գրիգորյանը, ով ըստ լուրերի, Գյումրու քաղաքապետի hավանական թեկնածու է, հայտնվել է լրատվամիջոցների ուշադրության կենտրոնում: Օրեր առաջ «Չէին սպասում» հաղորդաշարը նկարահանել է պատգամավորի տունը, ընտանիքի անդամներին: Նա էկրանիցայն կողմ ասել էր, որ հպարտանում էր իր «պիտբուլ» տեսակի շներով եւ հայտարարում, որ դրանք շնամարտի են մասնակցում ու արդեն մեծ անուն ունեն:

«Իրավունք»-ը պատգամավորից հետաքրքրվեց ` նա չգիտի՞, որ, այսպես ասած, հակաբնապահպանական է շուն կռվեցնելը, առավելեւս, որ նա գյուղատնտեսության եւ բնապահպանության հարցերի մշտական հանձնաժողովի նախագահն է: Շուն կռվացնելու մասին հայտարարությունները պատգամավորը հիմարություն որակեց, ապա ասաց, որ ինքը նման հայտարարություն չի արել: «Ես կրկնել եմ այն մարդկանց խոսքերը, որոնք ինձ այդ շները նվիրել են եւ ասել, որ դրանք կռվող շներ են»,- ասաց պատգամավորը:

«Չէին սպասում» հաղորդաշարում Մարտուն Գրիգորյանը հորդորել էր արտերկրում կայացած մեր հայրենակիցներին գալ Շիրակի մարզում ներդրումներ անել: Ինչո՞ւ պատգամավորը ճոխ ու շքեղ ապրելակերպից չի հրաժարվում եւ ներդրումներ անում, այլ հորդորում է այլոց: «Ինչքան հնարավորություն ունեմ Գյումրիում ներդրում անելու` ծերանոցներ, սոցիակապես անապահով խավ, մանկատներ, կարող եք Մարտուն Գրիգորյանի կայքէջում կարդալ: Ու էդ ժամանակ կհասկանաք` ձեր տված հարցը շահադիտական նպատակով է տրվում»,- պատասխանեց նա:

Հակադարձեցինք` շահադիտական նպատակով չեն հնչում հարցերը, ապա շարունակեցինք, թե ինչպե՞ս է Մարտուն Գրիգորյանը եւ նրա նման սոցիալապես ապահովված պատգամավորները գլուխը հանգիստ դնում բարձին, եթե Գյումրիում մինչեւ հիմա տնակներում ապրողներ կան: Պատգամավորի խոսքով` այդ հարցն ամբողջ պետությամբ չենք կարող լուծել. «Մեկ պատգամավորն ի՞նչ կարող է անել Գյումրիի տնակներում ապրողների համար: Պետական բյուջեն չի կարողանում այդ հարցը լուծել, պատգամավորի բյուջեով հնարավո՞ր է դա անել: Իմ, այսինքն`պատգամավորի, խնդիրը չէ գյումրեցիներին բնակարաններ բաժանելը կամ գնելը: Դա պատգամավորի իրավունքների կամ պարտականությունների մեջ չի մտնում: Ես 16 տարեկանից աշխատել եմ, ապահովված ընտանիքի զավակ եմ: Ամեն մարդու ձեռքբերումն էլ իրենն է: Մտեք Գյումրի ու հարցրեք` իմ ընտանիքն ու ես մեր ձեռքբերումից ինչքան ենք բաժին հանել»:

Մեր մյուս հարցին` չի՞ կարծում, որ այդ հաղորդումը նրա վարկանիշի վրա վատ անդրադարձավ, պատգամավորը բացասական պատասխանեց. «Միայն դրական առումով: Նորմալ է, որ ընտրողն իր պատգամավորին ճանաչում է նաեւ ընտանեկան միջավայրում: Ես այդ առումով պախկվելու պատճառ չունեմ»:

Ի դեպ, պատգամավորը չի հետաքրքրվում ՀՀԿ-ՀՅԴ հավանական կոալիցիայով:

ՍՈՆԱ ԴԱՎԹՅԱՆ