Եթե Ռուստամյանը մեկ անգամ էլ պնդի` իշխանությունը հեղինակազրկված է, հետեւություն կանենք. Վահրամ Բաղդա

Եթե Ռուստամյանը մեկ անգամ էլ պնդի` իշխանությունը հեղինակազրկված է, հետեւություն կանենք. Վահրամ Բաղդասարյան

Եթե ՀՅԴ խմբակցության ղեկավար Արմեն Ռուստամյանը մեկ անգամ էլ պնդի, որ իշխանությունը հեղինակազրկված է, մենք հետեւություն կանենք: Այս մասին NEWS.am-ի հետ զրույցում ասաց ՀՀԿ խմբակցության ղեկավար Վահրամ Բաղդասարյանը` անդրադառնալով Ռուստամյանի այն հայտարարությանը, որ իշխանությունը հեղինակազրկված է:

«Արմեն Ռուստամյանն ու մեր դաշնակցական ընկերները բա իրենց թույլ կտան վարկաբերկված մարդկանց հետ շփվեն, եթե մեզ հետ շփվում են, ուրեմն դա նշանակում է` վարկաբեկված չենք»,-ասաց Վահրամ Բաղդասարյանը:

Մեր ճշտող հարցին` այդ դեպքում ինչ է նշանակում Ռուստամյանի պնդումը, Բաղդասարյանը նախ փորձեց խմբագրել ապագա կոալիցիոն գործընկերոջը, թե «եթե»-ները հանել են լրագրողները, խոսքի իմաստը խեղվել է: Երբ բառացի մեջբերեցինք Արմեն Ռուստամյանի ասածը, Բաղդասարյանը վրդովվեց. «Եթե մեկ անգամ էլ Արմեն Ռուստամյանը դա պնդի, մենք հետեւություն կանենք»:

Թե ինչպես է արտահայտվելու այդ «հետեւությունը», Բաղդասարյանը չմանրամասնեց:

Նշենք, որ փետրվարի 1-ին Ազգային Ժողովում իշխանության հետ կոալիցիա կազմելու անհրաժեշտությունն հիմնավորելով` Արմեն Ռուստամյանը նշեց, որ դա իրավիճակը փրկելու միակ ճանապարհն է: Չզլացավ հայտարարել, որ իշխանությունը հեղինակազրկված է:

«Հայաստանում ուրիշ դաշտ չի մնացել իրական գործ անելու համար: Եթե իշխանությունը հեղինակազրկված է, բոլորիս պրոբլեմն է, չէ՞, իսկ մենք համարում ենք, որ իրավիճակի վրա իրական ազդեցություն ունեցողը դա է: Հիմա մտնում ենք կոալիցիա, որ իշխանության մոտեցումները փոխվեն, երկրում իրավիճակ փոխվի… Ոչինչ թող մեր վարկանիշի անկման հաշվին երկրի վիճակը փոխվի»: