«ԱՆՆԱ ՀԵԴՎԻԳ ԲՅՈՒԼ» ԿԱՄ «ՎԵՐՋԻՆ ԱՂՈԹՔԸ» ՖԻԼՄԻ ԻՆՏԵՐՆԵՏԱՅԻՆ ՊՐԵՄԻԵՐԱՆ (ՏԵՍԱՆՅՈՒԹ)

«ԱՆՆԱ ՀԵԴՎԻԳ ԲՅՈՒԼ» ԿԱՄ «ՎԵՐՋԻՆ ԱՂՈԹՔԸ» ՖԻԼՄԻ ԻՆՏԵՐՆԵՏԱՅԻՆ ՊՐԵՄԻԵՐԱՆ (ՏԵՍԱՆՅՈՒԹ)

«Sharm Pictures» –ը եւ  «Yan Team Production» –ը ներկայացնում են «Աննա Հեդվիգ Բյուլ» կամ «Վերջին աղոթքը» փաստավավերագրական ֆիլմի ինտերնետային պրեմիարան: Այն պատմում է էստոնացի միսիոներ ԱՆՆԱ ՀԵԴՎԻԳ ԲՅՈՒԼԻ մասին, ով 1909 թվականին առաջին անգամ ոտք դրեց Արեւմտյան Հայաստան, Մարաշ, Կիլիկիա եւ այդ ժամանակվանից դարձավ  հայերի մեծ բարեկամը` հետագայում իր կյանքը նվիրելով  Եղեռնից փրկված հայ որբերին եւ այրիներին: Նա իր գործունեությունը շարունակեց նաեւ Սիրիայում, Հալեպում` զբաղվելով տարագիր հայերի կենսական կարեւորության հարցերով, դարձավ հազարավոր որբերի մայրը, իսկ այրիների համար եղավ քույր:

26 րոպե տեւողությամբ ֆիլմը հիմնված է իրական փաստերի` Բյուլի եւ նրան հասցեագրված որբերի նամակների վրա: Ֆիլմում տեղ են գտել նաեւ 1909-ից  մինչեւ 1980 ական թվականներին հայերի ճակատագրին վերաբերող   պատմական ակնարկներ: Ներկայացվում է նաև Հայոց ցեղասպանության պատմական իրողությունը, ինչպես նաեւ Հալեպում հայերի կյանքը` 1915 թվականից հետո: Կյանքի վերջին տարիները Բյուլ Մայրիկն անցկացրել է գերմանական ծերանոցներից մեկում։  90-անց զառամյալ կինը՝ մահվան մահճում պառկած, մոռացել էր այն 6 լեզուները, որոնց նա ազատորեն տիրապետում էր եւ աղոթում էր հայերեն։

«Իմ սիրտը հայկական է», -այսպես է ասել Բյուլ Մայրիկը: Եվ այդ սիրտը միշտ նրանց հետ էր, ում ջերմացրել էր, փրկել:  Հայերի մեկ սերունդ չէ, որ փայփայում է նրա մասին հիշողությունները:

Ֆիլմը նկարահանվել է Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի պատվերով:

Ֆիլմի ռեժիսորը Վահե Յանն է, սցենարի հեղինակը`Սոնա Ալեքսանյանը, պրոդյուսեր` Կարեն Ղազարյանը, օպերատոր` Ռոբերտ Խարազյանը:

ԶՎԱՐԹ ԽԱՉԱՏՐՅԱՆ