ԱՎԵՏԱՐԱՆ՝ ԸՍՏ ԱՐՄԵՆ ԱՇՈՏՅԱՆԻ

ԱՎԵՏԱՐԱՆ՝ ԸՍՏ ԱՐՄԵՆ ԱՇՈՏՅԱՆԻ

Այսօր խորհրդարանում քննարկվում է  մի օրինագիծ, որով առաջարկվում է անվճար տեղեր հատկացնել Հայաստանի  սահմանամերձ շրջանների դիմորդների համար, որպեսզի ուսումնառության ավարտից հետո նրանք վերադառնան սահմանամերձ գյուղ` այնտեղ դասավանդելու: ԲՀԿ առաջնորդ Նաիրա Զոհրաբյանը մտավախություն ունի, որ այդ տեղերը կարող են լրացնել  կիսագրագետները: Թեմայի քննարկումը առանց  հումորների չանցավ:  ԱԺ փոխնախագահ Էդուարդ Շարմազանովը ողջունեց նախաձեռնությունը, ապա ԿԳ նախարարին  մաղթեց առողջություն. «Հուսամ` պրն Աշոտյանը արագ  կապաքինվի եւ առողջացած կգա ԱԺ»:

Նաիրա Զոհրաբյանը տեղից արձագանքեց. որքանով լսելի եղավ, տիկին Զոհրաբյանն ասաց. «Բա որ մյուս ոտքն էլ կոտրված լինի»:

Արմեն Աշոտյանը, ով այդ ընթացքում արդեն ամբիոնին էր մոտեցել, կատակով ասաց.«Փաստորեն, հայտնի դարձավ, թե ում պատճառով է ոտքս կոտրվել»:

Նախարարն իր ելույթի ընթացքում անդրադաձավ ՀԱԿ խմբակցության քարտուղար Արամ Մանուկյանի մեղադրանքին, թե   ուսուցիչները  պարտադրանքով դառնում են ՀՀԿ-ական, ծառայում իշխանությանը: «ԵՊՀ-ի ֆիզիկայի ամբիոնն իր «ոչ»-ը ասաց սահմանադրությանը: Ինչ ահաբեկման մասին է խոսքը»,- ասաց  գործադիրի անդամը եւ հերքեց Մանուկյանի մեղադրանքները:

Նախաձեռնության մասին խոսելիս էլ Աշոտյանը հորդորեց պատգամավորներին իրենց առաջարկները գրավոր ներկայացնել. «Դուք Քրիստոսը չեք, ես էլ  Ղուկասը չեմ (նկատի ունի Ղուկաս ավետարանիչը-խմբ.),  որ ձեր ետեւից ման գամ ու գրեմ այն, ինչ  ասում եք»: Ա. Աշոտյանը նաեւ հավելեց, որ հնարավորություն դեպքում կցանկանար ապրել 90 տարի:

ՀԳ. Դե ինչ, պարոն Աշոտյան, աստված Ձեզ առողջություն եւ երկար տարիների կյանք տա, բայց Ղուկաս ավետարանիչի դերում Ձեզ ոչ ոք չէր էլ պատկերացնում:

ՍՈՆԱ ԴԱՎԹՅԱՆ