ԹԵԺ ՊԱՅՔԱՐ` ՓԵՏՐՎԱՐԻ 12-ԻՆ

ԹԵԺ ՊԱՅՔԱՐ` ՓԵՏՐՎԱՐԻ 12-ԻՆ

Ինչպես հայտնի է փետրվարի 12-ին ԱԺ պետաիրավական հարցերի մշտական հանձնաժողովում տեղի կունենա Մարդու Իրավունքների պաշտպանի նոր թեկնածու ընտրություն:

ԱԺ «Օրինաց երկիր» խմբակցությունը  ՄԻՊ ընտրություններում կառաջադրի ու կպաշտպանի ԱԺ «Ժառանգություն» խմբակցության պատգամավոր Զարուհի Փոստանջյանի թեկնածությունը, որի մասին հայտնել է խմբակցության պատգամավոր, պետաիրավական հանձնաժողովի նախագահի տեղակալ Հովհաննես Մարգարյանը:

ԱԺ ՀՅԴ խմբակցությունը, ինչպես տեղեկացրել խմբակցության քարտուղար Աղվան Վարդանյանը, դեռ չի որոշել` ում թեկնածությունն է առաջադրելու:

ՀԱԿ-ն էլ, իր սեփական շողքից վախեցած, հայտարարել է, որ ՄԻՊ-ը  ընտրությունը վերահսկվելու է ՀՀԿ-ի կողմից և, ըստ երևույթին, իրենք չեն մասնակցի գործընթացին:

«Ժառանգություն» խմբակցությունը, ամենայն հավանականությամբ, եւս կպաշտպանի Զ. Փոստանջյանի թեկնածությունը:

Ի դեպ նշենք, որ վերջինիս թեկնածությունը առաջադրել է անկախ պատգամավոր Էդմոն Մարուքյանը, ով քաղաքական թիվ մեկ ամբիոնից կուրծք է ծեծում տիկնոջ համար:

Հայտնի է նաեւ, որ Բարգավաճ Հայաստան խմբակցությունն ունի իր թեկնածուն`Մակար Եղիազարյանը:

ՀՀԿ-ն առաջադրել է արդարադատության փոխնախարար Արման Թաթոյանի թեկնածությունը:

Հետաքրքիր է` ինչո՞ւ չէ նաեւ թեժ պայքար է տեղի ունենալու, քանի որ, ըստ էության, ձայների հարաբերակցությամբ ՀՀԿ-ն այս դեպքում փոքր ինչ դժվարություն կունենա` հանդիսանալով իր թեկնածուի միակ պաշտպանն ու կողմ քվեարկողը գոնե այս պահի դրությամբ: Նշենք նաեւ, որ ընտրված թեկնածուները պետք է հավաքեն պատգամավորների ձայների 3/5-ը կամ 79 ձայն` 131 հոգուց` փակ գաղտնի քվեարկությամբ: Հանձնաժողովը բաղկացած է 12 հոգուց, որտեղ հարկավոր է մասնակիցների ձայների կեսը ՄԻՊ թեկնածու առաջադրվելու համար:

Թե ինչ զարգացումներ կլինեն, պարզ կդառնա առաջիկա ուրբաթ օրը:

Հիշեցնենք, որ հանձնաժողով դիմումներ ներկայացնելու վերջնաժամկետը լրանում է փետրվարի 9-ին`ժամը 18-ին:

ԱՐՄԵՆՈՒՀԻ ՀԱԿՈԲՅԱՆ