ԱՆՎՏԱՆԳ ԻՆՏԵՐՆԵՏՆ ՈՒ ՀԱՄԱՑԱՆՑՈՒՄ ՀԱՅԱՏԱՌ ԳՐԵԼՈՒ ԽՆԴԻՐԸ ՇԱՐՈՒՆԱԿՈՒՄ Է ԱՐԴԻԱԿԱՆ ՄՆԱԼ

ԱՆՎՏԱՆԳ ԻՆՏԵՐՆԵՏՆ ՈՒ ՀԱՄԱՑԱՆՑՈՒՄ ՀԱՅԱՏԱՌ ԳՐԵԼՈՒ ԽՆԴԻՐԸ ՇԱՐՈՒՆԱԿՈՒՄ Է ԱՐԴԻԱԿԱՆ ՄՆԱԼ

Այսօր ամբողջ աշխարհի ուշադրության կենտրոնում  անվտանգ ինտերնետ ունենալու խնդիրն է: Հայաստանում միայն անվտանգ ինտերնետից օգտվելու համար գործում է հատուկ կազմակերպություն, որը դպրոցների միջոցով տարածում է անվտանգ ինտերնետի գաղափարը: Հատուկ ծրագրի միջոցով մանկավարժները ծանոթանում են անվտանգ ինտերնետի այն բոլոր հիմքերին, որոնք առնչվում են երեխաների հետ: «Ինտերնետ հանրություն» հասարակական կազմակերպության նախագահ ԳՐԻԳՈՐԻ ՍԱՂՅԱՆԻ խոսքով` անվտանգ ինտերնետը չի առնչվում մեծահասակների հետ, ուստի խնդիր կա հասկանալու համար, թե երեխաների մոտ  մինչեւ որ տարիքում կարելի է դնել ինտերնետից օգտվելու սահմանափակումներ.«Մենք ունենք ինտերնետ կառավարման հանձնաժողով եւ առաջիկա նիստում ստանալու ենք երեխաներին առցանց պաշտպանելու հայեցակարգային նախագիծը: Այն կքննարկենք եւ նախագծի հիմնական դրույթները կներկայացնենք հանրությանը: Հաջորդ տարի հեռահաղորդակցությունների միջազգային միությունը Հայաստան կուղարկի փորձագետների մի խումբ, որոնք կօգնեն մեզ այս հարցը մշակել եւ կյանքի կոչել»,-այսօր լրագրողներ հետ հանդիպման ժամանակ նշեց Գ. Սաղյանը:

Հայաստանի պետական ճարտարագիտական համալսարանի պրոֆեսոր, տեխնիկական գիտությունների դոկտոր ԷԴՈՒՐԱԴ ՄԱՆՈՒԿՅԱՆՆ անդրադառնալով համացանցում հայատառ  գրելու խնդրին, ընդգծեց, որ անհրաժեշտ է ուշադրություն դարձնել ոչ միայն հայատառ գրելուն, այլեւ հայատառ հնչյունների վրա: Այս ուղղությամբ աշխատանքներ տանում են, սակայն արդյունքները բավարար չեն, որովհետեւ աշխատանքերին չեն աջակցում համապատասխան մարմինները` ինչպես օրինակ Լեզվի տեսչությունն է.«Բոլորն ասում է, թե այս խնդրով իրենք չեն զբաղվում, իսկ ո՞վ պետք է զբաղվի: Մենք ամեն ինչից հետ ենք մնացել»,-փաստեց Է. Մանուկյանը եւ կոչ արեց մեծ ուշադրություն դարձնել խնդրին:

ԶՎԱՐԹ ԽԱՉԱՏՐՅԱՆ