ՀՀՇ-Ը ԳՈՐԾԱԴԻՐ ՔԱՐՏՈՒՂԱՐԸ ՉԻ ԲԱՑԱՌՈՒՄ ԲԱԳՐԱՏՅԱՆԻ ՀԵՏ ՀԱՄԱԳՈՐԾԱԿՑՈՒԹՅՈՒՆԸ

ՀՀՇ-Ը ԳՈՐԾԱԴԻՐ ՔԱՐՏՈՒՂԱՐԸ ՉԻ ԲԱՑԱՌՈՒՄ`

ԲԱԳՐԱՏՅԱՆԻ ՀԵՏ ՀԱՄԱԳՈՐԾԱԿՑՈՒԹՅՈՒՆԸ

«Ազատություն»  կուսակցության ղեկավար, ՀԱԿ պատգամավոր Հրանտ Բագրատյանն այսօր   ընդդիմադիր մի քանի  կուսակցություններին` ՀՀՇ-ին, «Հանրապետությանը», «քաղաքացիական պայմանագրին», «Ազատ դեմոկրատներին»,  առաջարկել է խորհրդարանական ընտրություններից առաջ կոալիցիա կազմել:  «Իրավունք»-ը ՀՀՇ գործադիր քարտուղար Կարեն Կարապետյանից պարզեց` Բագրատյանի առաջարկն ընդունելի՞ է: «Ճիշտն ասած, քաղաքում չէի, չեմ լսել  այդ հայտարարությունը»,- ասաց գործադիր քարտուղարը:

«Իրավունք»-ի հարցին` ՀՀՇ-ը Բագրատյանի կուսակցության հետ հանդիպում ունեցե՞լ է, Կարեն Կարապետյանի խոսքով. «Ալեքսանդր Արզումանյանը Հրանտ Բագրատյանի հետ խորհրդարանում հաճախ հանդիպում է: Բայց պաշտոնապես ՀՀՇ-Ազատություն կուսակցութունների հանդիպում դեռ չի եղել»:

ՀՀՇ անդամը, սակայն, տեսականորեն չի բացառում, որ հնարավոր է համագործակցություն Բագրատյանի կուսակցության հետ:

ՀՀՇ-ը նաեւ հայտարարել էր, որ հանդիպումներ է ունենում քաղաքական ուժերի հետ եւ չի բացառվում` դաշինքով մասնակցի խորհրդարանական ընտրություններին: Ինչ փուլում են այդ հանդիպումները: «Մենք մշտապես հանդիպումներ ունեցել ենք, բայց դրանք կոնսուլտատիվ բնույթ են ունենում: Որեւէ հստակեցում չկա»,- եզրափակեց պրն Կարապետյանը:

Ի դեպ, ՀՀՇ վարչության անդամ Արարատ Զուրաբյանը դեռ արտերկրում է: Նա Հայաստանում կլինի փետրվարի տասից հետո:

ՍՈՆԱ ԴԱՎԹՅԱՆ