ՀՀ ԵՎ ԼՂՀ ՏԱՂԱՆԴԱՎՈՐ ՊԱՏԱՆԻ ԵՐԱԺԻՇՏ –ԿԱՏԱՐՈՂՆԵՐԸ ՀԱՆԴԵՍ ԵԿԱՆ ՀԱՄԵՐԳՈՎ

ՀՀ ԵՎ ԼՂՀ ՏԱՂԱՆԴԱՎՈՐ ՊԱՏԱՆԻ ԵՐԱԺԻՇՏ –ԿԱՏԱՐՈՂՆԵՐԸ ՀԱՆԴԵՍ ԵԿԱՆ ՀԱՄԵՐԳՈՎ

Այսօր Կոմիտաս թանգարան-ինստիտուտի համերգասրահում տեղի ունեցավ «Հայաստանի Հանրապետության եւ Լեռնային Ղարաբաղի Հանրապետության տաղանդավոր պատանի երաժիշտ-կատարողների զարգացման եւ կատարելագործման նպատակային ծրագրի» մասնակիցների համերգը: Ծրագիրը նպատակ ունի բացահայտել եւ աջակցել    11-20 տարեկան տաղանդավոր երաժիշտ–կատարողներին՝ «Դաշնամուր», «Ջութակ» եւ «Թավջութակ» մասնագիտություններում: Այն ներառում է միջոցառումների համալիր շարք, որի իրականացումը կնպաստի միջազգային ասպարեզում հայ կատարողական դպրոցի մրցունակության ապահովմանն ու դասական կատարողական արվեստի ոլորտում բնականոն սերնդափոխության հիմքերի ապահովմանը: Ծրագրի բոլոր մասնակիցների համար խորհրդատուների եւ հրավիրյալ մասնագետների միջոցով իրականացվում են մասնագիտական խորհրդատվություններ` անհատական դասերի եւ վարպետության դասընթացների ձևաչափով: 15 պատանի երաժիշտներ ներգրավվել են նաեւ շուրջ 100 տարբեր միջոցառումներում՝ մրցույթներ, փառատոներ, համերգներ: Նրանցից շատերն արժանացել են հանրապետական եւ միջազգային մրցույթների դափնեկրի կոչման:

Համերգը ինքնատիպ ստուգատես էր կատարված աշխատաքների, որոնք ներկայացրել էր ծրագրի ղեկավար,  ՀՀ վաստակավոր արտիստ, միջազգային մրցույթների դափնեկիր, Երեւանի Կոմիտասի անվան պետական կոնսերվատորիայի դաշնամուրային ֆակուլտետի դեկան, դաշնակահար Արմեն Բաբախանյանը:

Համերգի ավարտին ՀՀ մշակույթի նախարար ՀԱՍՄԻԿ ՊՈՂՈՍՅԱՆԸ ողջունեց պատանի երաժիշտներին, մանկավարժներին, ծնողներին: Հ. Պողոսյանը գոհունակությամբ ընդգծեց հայաստանյան եւ  միջազգային բեմերում տաղանդավոր երեխաների փայլուն կատարումների եւ  բազմաթիվ մրցույթներում տարած հաղթանակների փաստը. «Շնորհակալություն բոլոր այն մանկավարժներին, ովքեր անձնվիրաբար աշխատում են տաղանդավոր երեխաների հետ, նրանց ուղեկցում արվեստում հաջողությունների հասնելու դժվարին ճանապարհին»,- նշեց  մշակույթի նախարարը:

ԶՎԱՐԹ ԽԱՉԱՏՐՅԱՆ