«ԵՍ ՅՈՒՐԱՅԻՆ ՉՈՒՆԵՄ».ՐԱՖՖԻ ՀՈՎՀԱՆՆԻՍՅԱՆԸ` ԹԵՎԱՆ ՊՈՂՈՍՅԱՆԻ ԴԻՐՔՈՐՈՇՄԱՆ ՄԱՍԻՆ

«ԵՍ ՅՈՒՐԱՅԻՆ ՉՈՒՆԵՄ».ՐԱՖՖԻ ՀՈՎՀԱՆՆԻՍՅԱՆԸ`

ԹԵՎԱՆ ՊՈՂՈՍՅԱՆԻ ԴԻՐՔՈՐՈՇՄԱՆ ՄԱՍԻՆ

Երեկ հայտնի դարձավ, որ ԱԺ-ի լիագումար նիստում առաջարկվելու է  ՀՀԿ-ի թեկնածու Արման Թաթոյանի թեկնածությունը, քանի որ երեկ ԱԺ պետաիրավական հարցերի մշտական հանձնաժողովում ձայների մեծամասնությամբ նա ընտրվեց որպես ՄԻՊ միակ թեկնածու:

Հիշեցնենք` պետաիրավական հանձնաժողովում   առաջարկվել էր երեք թեկնածու` Արման Թաթոյանը, Զարուհի Փոստանջյանը, Նարեկ Ալոյանը:

«Ժառանգություն» խմբակցության պատգամավոր Զարուհի Փոստանջյանի թեկնածությունն առաջադրել էին անկախ պատգամավոր Էդմոն Մարուքյանը, իսկ ՕԵ խմբակցությունն էլ միակ ընդդիմադիր ուժն էր որ պաշտպանեց նրան: Հետաքրքիրն այն է, որ «Ժառանգություն » խմբակցության քարտուղար Թեւան Պողոսյանն օրեր առաջ հայտարարել էր, որ նա ՄԻՊ-ի թեկնածու տեսնում է Քաղաքացիական հասարակություն ինստիտուտ ՀԿ-ի Արտակ Կիրակոսյանին:

«Իրավունք»-ը «Ժառանգություն» կուսակցության ղեկավար Րաֆֆի Հովհաննիսյանից պարզեց` եթե  նրա յուրայինը` Թեւան Պողոսյանը, չի պաշտպանում տիկին Փոստանջյանի թեկնածությունը, քաղաքական այլ ուժերից կարող է ակնկալել աջակցություն: «Նախ ես յուրային չունեմ»,- ասաց Րաֆֆի Հովհաննիսյանը, ապա հարցրեց. «Դուք ո՞ւմ յուրայինն եք»:

«Ես իմ յուրայինն եմ»,- պատասխանեցինք Հովհաննիսյանին:

«Ես էլ իմ յուրայինն եմ»,- ծիծաղելով ասաց Հովհաննիսյանը:

Թեւան Պողոսյանի դիրքորոշման մասին էլ ասաց, որ ամեն մեկն ունի իր տեսակետը, իր դիրքորոշումը: «Այդ յուրային ասվածը մեզ մոտ այնքան  օտար է, որ, բացի Ձեզ   հակաարձելով, թե ով է ձեր յուրայինը, այլ բան չեմ ասի»,- եզրափակեց Հովհաննիսյանը:

Պատահական չէ պարոն Հովհաննիսյանի այս պատասխանը, քանի որ նա շատ լավ հասկանում է, որ այլեւս ոչ թիմ ունի եւ ոչ էլ յուրաիններ: 

Ի դեպ, երեկ մինչ պետաիրավական հանձնաժողովի նիստի ավարտը  Զարուհի Փոստանջյանից հետաքրքրվեցինք` ինչպես կարձագանքի Թեւան Պողոսյանի հայտարարությանը, նա ասաց. «Տեղյակ չեմ` ինչի մասին է խոսքը»:

ՍՈՆԱ ԴԱՎԹՅԱՆ