Վիլեն Գալստյանը 75 տարեկան է. «ՉԳԻՏԵՄ` ԿԱ՞ ԱՇԽԱՐՀՈՒՄ ՄԻ ԵՐԿԻՐ, ՈՐՏԵՂ ՊԱՐԱԾ ՉԼԻՆԵՄ»

Արխիվ 12-16 14 Փետրվար, 2016 19:52

Վիլեն Գալստյանը 75 տարեկան է. «ՉԳԻՏԵՄ` ԿԱ՞ ԱՇԽԱՐՀՈՒՄ ՄԻ ԵՐԿԻՐ, ՈՐՏԵՂ ՊԱՐԱԾ ՉԼԻՆԵՄ»

Հայկական բալետային արվեստի երախտավոր ՎԻԼԵՆ ԳԱԼՍՏՅԱՆԸ դարձավ 75 տարեկան, ինչի առթիվ փետրվարի 13-ին կայացած գալստյանական խորեոգրաֆիայով Ա. Խաչատրյանի «Գայանե» բալետային ներկայացումը նվիրվեց հենց հոբելյարին: Մինչ արվեստասեր հանրությունը կվայելեր «Գայանե» բալետը, տեղի ունեցավ ծննդյան տարեդարձի պաշտոնական հատվածը:

ՀՀ ժողովրդական արտիստ, Ա. Սպենդիարյանի անվան օպերայի եւ բալետի ազգային ակադեմիական թատրոնի գլխավոր բալետմայստեր Վիլեն Գալստյանը պարգեւատրվեց Մշակույթի նախարարության բարձրագույն պարգեւով, ապա Մշակույթի նախարարի տեղակալ ԱՐԹՈՒՐ ՊՈՂՈՍՅԱՆՆ ընթերցեց ՀՀ նախագահ Սերժ Սարգսյանի ուղերձը, որում մասնավորապես ասված էր. «Ձեր անցած երկար ու բեղմնավոր ուղին նշանավորվել է բազում ձեռքբերումներով: Դուք մեծ ավանդ եք ներդրել հայ եւ համաշխարհային դասական պարարվեստի զարգացման եւ տարածման գործում, կերտել մնայուն եւ անմոռաց կերպարներ: Այսօր էլ շարունակելով Ձեր հայրենանվեր գործունեությունը` որակական նոր աստիճանի եք հասցրել Հայաստանի բալետային արվեստը»: Վարպետին շնորհավորելու համար բեմ բարձրացավ նաեւ ՀԹԳՄ նախագահ ՀԱԿՈԲ ՂԱԶԱՆՉՅԱՆԸ եւ ընդգծեց. «Կցանկանայի, որ մեզնից հետո եկող սերունդներն իմանան, որ եթե Վիլեն Գալստյանն իր բեմական, արտիստական տարիները չանցկացներ Սովետական Միությունում` ազատ, հանգիստ կարող էր զարդարել աշխարհի լավագույն բեմերը: Աշխատանքի բերումով շատ եմ շփվում միջազգային տարբեր թատերական գործիչների հետ, եւ միշտ նրա անունն են տալիս... Մենք ունեցել ենք եւ ունենք համաշխարհային բեմերին հարիր մեծություններ, որոնց շարքում է Վիլեն Գալստյանը: Եվ շատ ուրախ եմ, որ նա շարունակում է բեմի, թատրոնի կախարդական աշխարհում` կանաչ ճանապարհ տալ երիտասարդ սերնդին»: Ի դեպ, իր համաշխարհային ճանաչման մասին մի առիթով համեստորեն անկեղծացել է հենց ինքը` Վ. Գալստյանն` ասելով. «Չգիտեմ` կա աշխարհում մի պետություն, մի երկիր, որտեղ ես պարած չլինեմ»:

ՀՐԱՆՏ ՍԱՐԱՖՅԱՆ

Հ.Գ.- Նյութն ամբողջությամբ կարդացե՛ք «Իրավունք» թերթի երեքշաբթի օրվա համարում: