ՐԱՖՖԻ ՀՈՎՀԱՆՆԻՍՅԱՆԻ ՀՈՒՅՍՆ ՈՒ ՅՈՒՐԱՅԻՆԸ ԲԱԳՐԱՏՅԱ՞ՆՆ Է

ՐԱՖՖԻ ՀՈՎՀԱՆՆԻՍՅԱՆԻ ՀՈՒՅՍՆ ՈՒ ՅՈՒՐԱՅԻՆԸ

ԲԱԳՐԱՏՅԱ՞ՆՆ Է

ՀԱԿ խմբակցության պատգամավոր, «Ազատություն» կուսակցության ղեկավար Հրանտ Բագրատյանի առաջարկը ընդդիմադիր քաղաքական դաշտում շարունակվում է քննարկվել, թե դրական թե բացասական առումով: Հիշեցնենք` Բագրատյանն առաջարկել էր ընդդիմադիր մի քանի ուժերի  կոալիցիա կազմել եւ մասնակցել խորհրդարանական ընտրություններին:  Քանի որ Բագրատյանի առաջարկը վերաբերում էր նաեւ «Ժառանգությանը», «Իրավունք»-ը կուսակցության ղեկավար Րաֆֆի Հովհաննիսյանից պարզեց` ընդունելի՞ է նրա  համար Բագրատյանի առաջարկը:  «Քաղաքական հայտարարությամբ կարելի է առաջարկ անել, բայց  պրն Բագրատյանը որպես  լուրջ պետական գործիչ, պետք է իմանա` առաջարկից հետո լինում են դիմումներ եւ առաջարկներ:  Ես մեծ սիրով կընդունեմ նախկին վարչապետին ու պատգամավորին` նրա առաջարկը քննարկելու համար»,- ասաց կուսակցության ղեկավարը:

Րաֆֆի Հովհաննիսյանի խոսքով`Բագրատյանի  առաջարկը «Ժառանգությանը» հոգեհարազատ է, քանի որ իր ղեկավարած կուսակցությունը փնտրում է  վերկուսակցական լուծումներ, թեեւ միշտ չէ, որ վերկուսակցական լուծումներն իրենց արդարացրել են:

Ինչ արած, հաշվի առնելով իր իսկ կուսակցության վիճակը պարոն Հովհաննիսյանը ինչպես ժողովուրդն է ասում, ձեռքը գցել է փրփուրներին եւ նախկին վարչապետի առաջարկն է ընդունում:

Ի դեպ, «Ժառանգություն» կուսակցության ղեկավարից  տեղեկացանք, որ  կուսակցությունում չի քննարկվել նաեւ խորհրդարանական ընտրություններին դաշինքով, թե միայնակ են մասնակցելու հարցը:

ՍՈՆԱ ԴԱՎԹՅԱՆ