ՍՈՒՐԵՆ ԶՈԼՅԱՆ. «ՉԱՐԱՇԱՀՈՒՄՆԵՐԻ ՄԱՍԻՆ ՊԱՏՄՈՒԹՅՈՒՆԸ ՆՄԱՆ ԷՐ ՕՍԿԱՆՅԱԻ ՊԱՏՄՈՒԹՅԱՆԸ»

ՍՈՒՐԵՆ ԶՈԼՅԱՆ. «ՉԱՐԱՇԱՀՈՒՄՆԵՐԻ ՄԱՍԻՆ ՊԱՏՄՈՒԹՅՈՒՆԸ ՆՄԱՆ ԷՐ  ՕՍԿԱՆՅԱԻ ՊԱՏՄՈՒԹՅԱՆԸ»

Նախորդ տարի 2015-ի փետրվարի 12-ը, երբ Գագիկ Ծառուկյանը հայտարարեց քաղաքական դաշտից դուրս գալու եւ քաղաքականությամբ չզբաղվելու մասին, ԲՀԿ արդեն նախկին առաջնորդը 2015-ի փետրվարի 5-ին  համաժողով էր կազմակերպել, որին մասնակցում էր Վալերի Բրյուսովի նախկին ռեկտոր, հասարակական գործիչ Սուրեն Զոլյանը:

«Իրավունք»-ը պրն Զոլյանից պարզեց` հնարավո՞ր  է նա ակտիվ մասնակցի քաղաքական գործընթացներին` ինչ-որ կուսակցության ցուցակով` խորհրդարանական ընտրություններին: «Ես երբեք չեմ հրաժարվում հարցազրույցներ տալուց, «Հանրային խորհուրդ»- ից դուրս չեմ եկել: Նպատակարհարմար չեմ տեսնում մտնել քաղաքական գործընթացների մեջ»,- ասաց նախկին ռեկտորը:

Հետաքրքրվեցինք` եթե  գործող կուսակցություններից մեկից հրավեր ստանա, չի՞ ընդունի այն: «Չէ, չէ, եթե տեսնում եմ, որ կա մի ուժ կամ շարժում, որին կարելի է աջակցել, ես դա անում եմ: Կանեմ այնպես, ինչպես դա արեցի նախագահական ընտրությունների ժամանակ` սատարելով Րաֆֆի Հովհաննիսյանին եւ դառնալով «Բարեւ, Երեւան» ցուցակի անդամ:  Ու քանի որ ցանկություն չունեի դառնալ ավագանու անդամ, խնդրեցի ինձ  ցուցակի վերջին  տեղերում ընդգրկել: Ես եղել եմ պատգամավոր եւ գիտեմ` անիմաստ է այնտեղ լինել, եթե դու իշխող կուսակցության անդամ չես: Բայց ես չեմ  բացառում իմ աջակցությունը այն ուժերին, որոնց ծրագրային մոտեցումներն ինձ համար ընդունելի լինեն»,- պատասխանեց հասարակական գործիչը:

Ինչ վերաբերում է ԲՀԿ-ի հետ համագորակցությանը, պրն Զոլյանն ասաց, որ երբեք չի համագործակցել ԲՀԿ-ի հետ, կուսակցական ոչ  մի միջոցառման չի մասնակցել: Եղել է հրավեր`մասնակցելու կլոր սեղանի, որը, ըստ Զոլյանի, ճիշտ գաղափար էր:

Սուրեն Զոլյանից  հետաքրքրվեցինք` ի վերջո,  ինչպե՞ս ավարտվեց իր եւ ՀՀԿ փոխնախագահ, ԿԳ նախկին նախարար Արմեն Աշոտյանի հակամարտությունը, որը վերաբերում էր Բրյուսովի համալսարանում Զոլյանի ռեկտոր եղած ժամանակ  հայտնաբերված խախտումներին: «Այդ պատմությունը նման էր Օսկանյանի պատմությանը (նկատի ունի Սիվիլիթասի գումարները յուրացնելը-խմբ.): Հետո պարզվեց, որ այդ մեկ միլիոն դրամը ես չեմ ստորագրել, այլ մեկ ուրիշը: Ինձ առաջարկեցին  վնասը հատուցել: Ես ասել եմ, որ չեմ ընդունում մեղադրանքը, բայց որպեսզի երրորդ անձանց  համար նոր խնդիրներ չառաջանան.  կվճարեմ այդ գումարը, որը մուտք է արվել համալսարանի  բյուջե»,- եզրափակեց նախկին ռեկտորը:

ՍՈՆԱ ԴԱՎԹՅԱՆ