«Ամենաշատ քննադատում են այն մարդիկ, որոնք երազում են պորտֆելների մասին». ԱԼՎԱՐԴ ՊԵՏՐՈՍՅԱՆ

«Ամենաշատ քննադատում են այն մարդիկ, որոնք երազում են

պորտֆելների մասին». ԱԼՎԱՐԴ ՊԵՏՐՈՍՅԱՆ

Մինչեւ շաբաթվա վերջ պարզ կլինի` ինչ պաշտոններ են տրվելու ՀՅԴ-ին գործադիր մարմնում: Մինչ այդ   հանրային ու քաղաքական որոշ շրջանակներ շարունակում են քննարկել` ինչ կտա կոալիցիան մեր երկրին:

«Իրավունք»-ը ՀՅԴ անդամ, գրող, հրապարակախոս, նախկին պատգամավոր Ալվարդ Պետրոսյանից պարզեց նրա վերաբերմունքը քաղաքական երկու ուժերի համագործակցության մասին:  «Ես կզարմանայի, որ ՀՅԴ-ի նման քաղաքական ուժը նման գլոբալ ճգնաժամի ժամանակ  չմտներ այդ բեռան տակ: Հայաստանն ու Սփյուռքը նորմալ են վերաբերում այս գործընթացին»,- ասաց  դաշնակցական գործիչը:

- Տիկին Պետրոսյան, Դուք տարիներ առաջ` 2008-ին, դեմ էիք, որ ՀՅԴ-ն դուրս գա կոալիցիայից, ավելին` ճիշտ էիք համարում ֆուտբոլային դիվանագիտությունը:  Փաստորեն,Դուք, ըստ էության, ճիշտ էիք, քանի որ այսօր ՀՅԴ-ն նորից կոալիցիա է կազմում ՀՀԿ-ի հետ:

- Կոալիցիայից դուրս գալու կամ չգալու մասին, ճիշտն ասած, հրապարակավ չեմ խոսել:  Ես միայն հրապարակավ  խոսել եմ` «այո»-ի եւ «ոչ»-ի մասին: Ես միշտ հրապարակավ պաշտպանել եմ Սերժ Սարգսյանին, որովհետեւ ասել եմ` պետք է մեր երկրին նախագահ, որից վառոդի հոտ է գալիս:

- Օրեր առաջ լրատվամիջոցներից մեկը քննադատական հոդված էր գրել դաշնակցության մասին, որտեղ ձեր մասին եւս ակնարկ կար: Մասնավորապես հոդվածագիրը կարծում է, որ ՀՅԴ-ը պետք է ներողություն խնդրի Ալվարդ Պետրոսյանից, քանի որ այսօր նա Սերժ Սարգսյանի ու ՀՀԿ-ի  հետ է համագործակցում, մինչդեռ  2008-ին  դաշնակցությունը պատժեց Ձեզ` Սերժ Սարգսյանին, նրա վարած արտաքին քաղաքականությունը սատարելու համար:

- Ի սեր աստծու, Ալվարդ Պետրոսյանից պետք չէ ներողություն խնդրել: Ալվարդ Պետրոսյանին ՀՅԴ-ում պատժել են կարգապահական խախտում անելու համար:

- Ինչպես կարձագանքեք այն  ՀՅԴ-ի հասցեին հնչող քննադատություններին, թե մի քանի պորտֆելի համար կոալիցիա են կազմում ՀՅԴ-ի բնութագրմամբ  հեղինակազրկված իշխանության հետ…

- Լավ էլի: Ամենաշատ քննադատում  են այն մարդիկ, որոնք երազում են պորտֆելների մասին: Ծիծաղելի է երկրի ճակատագրի առնչվող  հարցերում նման կենցաղային, ճղճիմ ձեւով խոսելը: Թող  վաղը էդ նույն  մարդիկ ակտիվ քննադատեն մեր պորտֆել վերցնողին, եթե  նա լավ կադր չի լինում:

- Սերժ Սարգսյանը  փետրվարի 12-ին  ելույթով հանդես եկավ, որից հետո հնչեցին տարբեր գնահատականներ: Ինչ տպավորություն Դուք ստացաք  այդ ելույթից:

-Ես այդ ելույթին վաղուց էի սպասում: Համապարփակ, ճիշտ, խոհեմ ելույթ էր: Կցանկանայի, որ տարեկան երկու անգամ նման ելույթ հնչեր: Ճիշտ է, որ գործադիր  իշխանության եւ այլ մարմինների ներկայացուցիչներն էին  ներկա այդ ելույթին, սակայն այդ խոսքը  ժողովրդին էր ուղղված:  շարքային քաղաքացիները պետք  էիմանան, որ մեր երկրում կա ուշադիր աչք, հայացք, որը տեսնում է ամեն ինչ:  Շատ հաճախ ենք լսում մեր քաղաքացիներին, թե  նախագահը գիտի՞ այս կամ այն  հարցի մասին: Պարզվում է, որ նախագահը գիտի ամեն ինչ, բայց միայնակ չի կարող հաղթահարել բոլոր խնդիրները: Մնում է  հանրությունն էլ սա ըմբռնի, ամեն մեկն իր գործն անի, ու մենք կդառնանք  կարգին պետւթյուն: Օգտվելով առիթից` ցանկանում եմ անդրադառնալ նաեւ ռուս-թուրքական լարված հարաբերություններին եւ ասել, որ  մենք ջուրը չտեսած չպետք  է բոբիկանանք,  չմտնենք ռուս-թուրքական խաղերի մեջ: Մենք պետք է լուծենք մեր խնդիրները:

ՍՈՆԱ ԴԱՎԹՅԱՆ