ՄԻՊ ԹԵԿՆԱԾՈՒԻՆ ՕԵԿ-Ը ՎԵՐՋՆԱԿԱՆ ՊԱՏԱՍԽԱՆ ՉՏՎԵՑ

ՄԻՊ ԹԵԿՆԱԾՈՒԻՆ ՕԵԿ-Ը ՎԵՐՋՆԱԿԱՆ ՊԱՏԱՍԽԱՆ ՉՏՎԵՑ

Երեկ խորհրդարանում Մարդու իրավունքների պաշտպանի այժմ արդեն միակ թեկնածու ԱՐՄԱՆ ԹԱԹՈՅԱՆԸ հանդիպեց ՀՀԿ, ՀՅԴ եւ «Օրինաց երկիր» խմբակցությունների պատգամավորների հետ: Եվ եթե առաջին երկուսի դեպքում, միանշանակ էր, որ նա ԱԺ լիագումար նիստում կստանա նրանց կողմից վստահության քվե, ՕԵԿ-ի դեպքում` միանշանակ ոչինչ ասել չկարողացավ: Ինչպես «Իրավունքի» հետ զրույցում նշեց Ա. Թաթոյանը. «Երեւի թե, պետք է «Օրինաց երկիր» խմբակցությանը հարցնեք»:

– Պարոն Թաթոյան, իսկ ինչի՞ մասին ծավալվեց Ձեր քննարկումը "Օրինաց երկիր" խմբակցության պատգամավորների հետ:

– Մենք քննարկեցինք, թե հայեցակարգային հարցերի հետ կապված ինչպիսի խնդիրներ կան պաշտպանի գործունեության ոլորտում: Պետք է ասեմ, որ շատ օգտակար հանդիպում էր, որովհետեւ խմբակցության կողմից բարձրացվեցին առանձին իրավունքների հետ կապված խնդիրներ, որոնք կան, եւ նաեւ անդրադարձանք այն պատկերացումներին, թե ինչպես կարելի է դրանց հասնել` համագործակցելով իրար հետ:

– Մյուս խմբակցությունների հետ նման հանդիպումներ սպասվո՞ւմ են:

– Ասեմ ձեզ, որ լիարժեք պատրաստ եմ բոլորի հետ հանդիպել, քննարկել: Հանդիպում կլինի նաեւ «Բարգավաճ Հայաստան» խմբակցության հետ, եւ կա պայմանավորվածություն «Ժառանգության» հետ:

– Իսկ ՀԱԿ-ի՞:

– Դեռ այս պահին հստակ տեղեկություն չունեմ` դրա հետ կապված ու չեմ կարող որեւէ բան ասել:

– Կան պատգամավորներ, որոնք դուրս են եկել խմբակցությունից, օրինակ, ՀԱԿ-ի եւ «Ժառանգության» դեպքում ո՞ւմ հետ եք հանդիպելու:

– Այդ հարցին ես չեմ կարող պատասխանել, հանդիպումը կլինի կերեւա:

ՀՐԱՆՏ ՍԱՐԱՖՅԱՆ