Սահմանազատումը կունենա տնտեսական հետևանքներ, կլինեն  մի շարք անհարմարություններ

Հայաստանի և Ռուսաստանի  արտգործնախարարներ Արարատ Միրզոյանն ու Սերգեյ Լավրովը  հեռախոսազրույց են ունեցել, որի ընթացքում քննարկել են  սահմանազատման և սահմանային անվտանգության հարցերով հանձնաժողովին առնչվող հարցերը։ Սահմանագծման և սահմանազատման  տնտեսական հետևանքների մասին Իրավունք կայքը զրուցել է տնտեսագետ  Գագիկ  Վարդանյանի հետ։ Տնտեսագետն անդրադառնալով սահմանազատման տնտեսական հետևանքներին ասաց․ «Վերջին հայտարարություններից հասկացանք, որ նրանք  Գորիս-Կապան  ճանապարհով չեն բավարարվի և   այլ ոլորաններ էլ ցանկանում են վերցնել և բնականաբար ինչպես եղավ  Իրանից տեղափոխվող  բեռնափոխադրումների հետ նույնն էլ լինելու է այդ  նոր ճանապարհներին։ Հիշում ենք, որ նրանք Գորիս-Կապան ավտոճանապարհին նրանք  որպես մաքսատուրք միլիոնավոր դոլարներ են գանձել,  հիմա եթե երկու այլ կետերում էլ դա անեն  նշանակում է, որ բեռնափոխադրումները մեզ համար դառնում են  խնդրահարույց, այսինքն մեր  բեռները, որ պետք է գան Հայաստան և Հայաստանից  արտահանվեն ունենալու են լուրջ խնդիրներ և  լրացուցիչ վճարներ են լինելու։ Այստեղ մեկ այլ խնդիր կա, եթե հաղորդակցային ուղիները քո տարածքով  չեն գնում կամ  այլ  երկրի տարածքով են գնում  նաև խնդիրներ են առաջացնում ներդրողների համար՝ ազատ տեղաշարժվելու խնդիր, ստացվում է որ  բեռնափոխադրողը պետք է մտնի ուրիշ սահման հետո ուրիշ ու  առաջանա  տեղաշարժի խնդիր։ Ես չեմ կարծում, որ սահմանագծման և սահմանազատման աշխատանքները այդքան շտապ են, նույն հաջողությամբ նրանք  ցանկանում են անկլավները վերցնել, բայց անկլավները վարչական ղեկավարության տակ են։ Այսինքն նայել են  բնակչության խտությունը ըստ ազգային պատկանելության  և   դարձրել են վարչական ենթակայության, դա չի նշանակում, որ  այդ տարածքը իրենցն է։ Այսինքն  այստեղ  տեղի են ունենում անհասկանալի զարգացումներ, առանց այն էլ մեր տնտեսությունը  լավ վիճակում չէ և նման  գործողությունները հանգեցնելու են ավելի վատ վիճակի։ Ամեն դեպքում  այս թեմայով շտապելը ճիշտ չի և պետք է  սպասենք մի շարք հայտնի իրադարձությունների ավարտին, դրանից հետո հասկանանք   ինչ է լինում, գուցե  մեր սահմանը անցնի Ղազախով, որի մասին մենք չգիտենք։ Սահմանազատումը կունենա տնտեսական հետևանքներ, կլինեն  անհարմարություններ, բեռնափոխադրումների և ուղևորափոխադրումների առումով կլինի  անհարմար  իրավիճակ, ինչպես  նաև Հայաստանում տեղաշարժվելը դեպի  Նախիջևան, Հյուսիս-Հարավ կդառնա լուրջ խնդիր»։ 

Սոնա Գիշյան