Մայր թատրոնի բեմում ազգային խորհրդանիշ լավաշը` որպես ներքնազգե՞ստ

Համացանցում բուռն քննարկման առիթ էր դարձել Սունդուկյանի անվան ազգային ակադեմիական թատրոնում կայանալիք ներկայացման ազդագիրը, որը, մեղմ ասած, վիրավորական բնույթ էր կրում: 2013 թվականին ՅՈւՆԵՍԿՕ-ի ոչ նյութական մշակութային ժառանգության պաշտպանության ցանկում տեղ գտած հայկական լավաշը ո՛չ ավել, ո՛չ պակաս գովազդային ազդագրի վրա վերածվել էր ռուս արտիստների համար ներքնազգեստի: Թերեւս վերջին անգամ լավաշ հագել էր հայտնի մուլտֆիլմի Նաղաշը, բայց այն բոլորովին այլ բնույթ էր կրում, մինչդեռ այս դեպքում` ուղղակի անարգանք կարելի է դիտարկել:

Այս մասին «Իրավունքը» փորձեց պարզաբանում ստանալ այդ ներկայացման համար Մայր թատրոնում հարթակ տրամադրած Սունդուկյանի անվան ազգային ակադեմիական թատրոնի տնօրեն ՎԱՐԴԱՆ ՄԿՐՏՉՅԱՆԻՑ, սակայն նա համառորեն զանգերին չէր պատասխանում: Իսկ ավելի ուշ ասաց, որ թատրոնի ֆեյսբուքյան էջում տնօրինության անունից հրապարակված հայտարարությունից բացի՝ «ավելացնելու ոչինչ չունի»:

Հայտարարության մեջ ասված էր հետեւյալը. «Համացանցում տարածվող գովազդային պաստառի կապակցությամբ հարկ ենք համարում մանրամասնել, որ քննարկվող ներկայացումը, իհարկե, Գաբրիել Սունդուկյանի անվան ազգային ակադեմիական թատրոնի խաղացանկի հետ որեւէ առնչություն չունի: Երբ պայմանագրային հիմունքներով թատրոնում տեղի են ունենում այլ թատերախմբերի կամ ստենդափային ներկայացումներ, դրանց համառոտ նկարագրերը եւ գովազդային պաստառները համաձայնեցվում են թատրոնի հետ։ Սակայն տվյալ ներկայացման կազմակերպման շուրջ բանակցությունները չեն հասել պայմանագրի կնքման փուլին, հետեւաբար պաստառի էսքիզը չի ներկայացվել եւ չի ստացել թատրոնի համաձայնությունը»:

Ըստ էության, թատրոնի տնօրինությունն այդպես էլ չի հստակեցնում, թե բանակցությունները շարունակելո՞ւ են, վերոնշյալ ներկայացումը չեղարկվելո՞ւ է կամ գոնե գովազդային խայտառակ պաստառը հանվելո՞ւ է: Եվ, վերջիվերջո, արդյոք այս հայտարարությունը կարելի է համարել սրտի մխիթարանք, երբ անգամ ներողության խոսք չկա ասված: Այսինքն` ստացվում է, որ եթե մեծ աղմուկ չբարձրանար, դավադիր լռությամբ՝ այս ամենը հանդուրժելո՞ւ էր թատրոնի տնօրինությունը, քանի որ արդեն օրեր շարունակ սոցցանցերում տեղադրված էր ներկայացման գովազդը` խայտառակ ազդագրով:

Ի դեպ, հավելենք, որ խոսքը ռուսական մի ներկայացման մասին է, որի սցենարի հիմքում չորս հոգու պատմություն է, ովքեր Հայաստանում լավ կյանք են փնտրում: Գլխավոր դերերում են «Comedy woman»-ի աստղերից Եկատերինա Վառնավան, Նատալյա Եփրիկյանը, Ալեքսանդր Գուդկովը եւ Եվգենի Բորոդենկոն: Այնպես որ, մնում է հուսալ, որ Մայր թատրոնն իր մեջ ողջախոհություն կգտնի եւ Նաղաշից հետո` լավաշը, որպես ներքնազգեստ, չեն կրի նատաշաներն ու սաշաները՝ այն էլ Մայր թատրոնի բեմում:

ՀՐԱՆՏ ՍԱՐԱՖՅԱՆ

Այս թեմայով ՀՐԱՏԱՊ. Վարդանի շուրջ 19-ամսյա կալանքը նշանակում է արդեն հարյուր հազարավոր դոլարների հանրային միջոցների ծախս Թե բա 82 միլիոն դրամ էլ դեռ ես եմ ներդրել փողոցի լայնացման և բորդուրների համար ՀՐԱՏԱՊ. ԴՕԿ կուսակցության պատվավոր նախագահ Վարդան Ղուկասյանի հայտնի փաստաբանը հայտարարությամբ է հանդես եկել Մեզի կարմիր է տված, տրամադրությո՞ւնս՝ փառք Տիրոջը․ Վարդան Ղուկասյանին ոստիկաններն ուղեկցեցին դատարան Ուկրաինայի պատերազմը 21-րդ դարի գլխավոր ռազմական լաբորատորիան է. ԿՀՎ նախկին տնօրեն